Rain Alert: తెలంగాణ రాష్ట్రంలో మరోసారి వర్షాలు పడనున్నాయి. హైదరాబాద్ వాతావరణ కేంద్రం ఈ మేరకు కొత్త హెచ్చరికలు జారీ చేసింది. విదర్భ, దాని పక్కనే ఉన్న మరాఠ్వాడా ప్రాంతంలో ఏర్పడిన ఉపరితల గాలి సుడిగుండం కారణంగా, రాష్ట్రంలోని చాలా జిల్లాల్లో రాబోయే మూడు రోజుల పాటు ఒక మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ తెలిపింది.
హైదరాబాద్ వాతావరణ శాఖ విడుదల చేసిన వివరాల ప్రకారం, గత ఆదివారం బలంగా ఉన్న గాలి సుడిగుండం సోమవారం నాటికి కాస్త బలహీనపడింది. అయినప్పటికీ, దీని ప్రభావంతో తెలంగాణలోని పలు జిల్లాల్లో తేలికపాటి నుంచి మోస్తరు వర్షాలు పడతాయని అంచనా వేస్తున్నారు. ముఖ్యంగా సోమవారం, మంగళవారం, బుధవారం ఈ వర్షాలు కొనసాగుతాయి. కొన్ని పశ్చిమ జిల్లాల్లో అయితే, ఉరుములు, మెరుపులతో పాటు గంటకు 30 నుంచి 40 కి.మీ వేగంతో ఈదురు గాలులు వీచే అవకాశం ఉందని అధికారులు తెలిపారు.
ఇప్పటికే కురిసిన భారీ వర్షాల వల్ల పంట పొలాలు నీట మునిగి రైతులు చాలా నష్టపోయారు. ఈసారి అలాంటి నష్టం జరగకుండా ఉండేందుకు రైతులు ముందు జాగ్రత్త చర్యలు తీసుకోవాలని అధికారులు సూచిస్తున్నారు. ముఖ్యంగా, పొలాల వద్ద లేదా కళ్లాలలో ఆరబెట్టిన ధాన్యం ఉంటే, వాటిని వెంటనే సురక్షితమైన ప్రాంతాలకు తరలించుకోవాలని హెచ్చరించారు. అంతేకాకుండా, వర్షాలు పడే సమయంలో కరెంట్ స్తంభాలు విరిగిపడే ప్రమాదం ఉంది కాబట్టి, రైతులు పొలాలకు వెళ్లేటప్పుడు చాలా జాగ్రత్తగా ఉండాలని కోరారు.