Hyderabad: హైదరాబాద్ నగరంలో మరోసారి ఆహార కల్తీ బాగోతం బయటపడింది. కొంతమంది వ్యాపారులు డబ్బుల కోసం ప్రజల ప్రాణాలతో ఎలా చెలగాటం ఆడుతున్నారో ఈ ఘటన చూస్తే అర్థమవుతుంది. తాజాగా జియాగూడ ప్రాంతంలో కుళ్లిపోయిన పదార్థాలతో సమోసాలు తయారు చేస్తున్న ఒక కేంద్రాన్ని టాస్క్ ఫోర్స్ అధికారులు రట్టు చేశారు. బయట దొరికే వేడివేడి సమోసాలను ఇష్టంగా తినే వారు, ఈ వార్త వింటే ఇకపై వాటి జోలికి వెళ్లాలంటేనే భయపడే పరిస్థితి నెలకొంది.
కుల్సుంపురా పోలీసులతో కలిసి హెచ్-ఫాస్ట్ బృందం నిర్వహించిన ఈ దాడుల్లో నమ్మలేని నిజాలు వెలుగులోకి వచ్చాయి. ఎటువంటి ఫుడ్ సేఫ్టీ లైసెన్స్ లేకపోవడమే కాకుండా, అత్యంత మురికిగా ఉన్న ప్రదేశంలో ఈ సమోసాల తయారీ జరుగుతోందని అధికారులు గుర్తించారు. ముఖ్యంగా కుళ్లిపోయిన కోడిగుడ్లు, ఇప్పటికే అనేకసార్లు వాడిన పాత నూనెను ఉపయోగించి ఇక్కడ సమోసాలు వండుతున్నారు. తనిఖీల్లో భాగంగా అధికారులు సుమారు 500 పాడైపోయిన గుడ్లు, ఐదు కిలోల వాడిన నూనెతో పాటు వందలాది ఉల్లిపాయ, స్వీట్ కార్న్ సమోసాలను స్వాధీనం చేసుకున్నారు.
ఈ అక్రమ కేంద్రాన్ని నిర్వహిస్తున్న 73 ఏళ్ల అబ్దుల్ రషీద్ అనే వ్యక్తిని పోలీసులు గుర్తించి, అతనిపై కేసు నమోదు చేశారు. ఇలాంటి కల్తీ ఆహారం వల్ల ప్రజలు తీవ్రమైన అనారోగ్య సమస్యలకు గురయ్యే ప్రమాదం ఉందని అధికారులు హెచ్చరిస్తున్నారు. ఆహార కల్తీకి పాల్పడే వారిపై కఠిన చర్యలు తీసుకుంటామని టాస్క్ ఫోర్స్ డీసీపీ వైభవ్ రఘునాథ్ స్పష్టం చేశారు. బయట ఆహారం ఎంత ఆకర్షణీయంగా కనిపించినా, అది ఎక్కడ, ఎలా తయారవుతుందో తెలుసుకోవడం మన బాధ్యత. సాధ్యమైనంత వరకు ఇంట్లో వండుకున్న స్వచ్ఛమైన ఆహారాన్ని తినడమే ఆరోగ్యానికి మేలని నిపుణులు సూచిస్తున్నారు.