ICICI Bank Charges: డిజిటల్ చెల్లింపుల రంగంలో కీలక మార్పులకు సిద్ధమవుతోంది. వచ్చే ఏడాది ఆగస్టు 1 నుంచి, ప్రైవేట్ రంగ దిగ్గజం ఐసీఐసీఐ బ్యాంక్, యూనిఫైడ్ పేమెంట్స్ ఇంటర్ఫేస్ (UPI) ద్వారా జరిగే లావాదేవీలపై కొత్త ఛార్జీలను అమలు చేయనుంది. ఈ నిర్ణయం డిజిటల్ చెల్లింపుల పరిశ్రమలో, ముఖ్యంగా పేమెంట్ అగ్రిగేటర్లపై గణనీయమైన ప్రభావాన్ని చూపనుంది.
కొత్త ఛార్జీల వివరాలు:
ICICI బ్యాంక్ తన ఎస్క్రో ఖాతాలు కలిగిన పేమెంట్ అగ్రిగేటర్లపై ప్రతి UPI లావాదేవీకి 2 బేసిస్ పాయింట్ల (bps) ఛార్జీని విధిస్తుంది. ఈ ఛార్జీ ఒక్కో లావాదేవీకి గరిష్టంగా రూ. 6 వరకు ఉంటుంది. ఎస్క్రో ఖాతా లేని అగ్రిగేటర్లకు అయితే, ఈ ఛార్జీలు రెట్టింపు అవుతాయి. అంటే, 4 బేసిస్ పాయింట్లతో గరిష్టంగా రూ.10 వరకు ఉంటుంది.
ఎవరిపై ప్రభావం?
ఈ ఛార్జీలు ప్రధానంగా పేమెంట్ అగ్రిగేటర్లను ప్రభావితం చేస్తాయి. ఆన్లైన్ షాపింగ్ ప్లాట్ఫారమ్లు, ఈ-కామర్స్ సైట్లు లేదా ఆఫ్లైన్ వ్యాపారుల కోసం డిజిటల్ చెల్లింపులను సులభతరం చేసే సంస్థలే పేమెంట్ అగ్రిగేటర్లు. ICICI బ్యాంక్ ఖాతా కలిగిన వ్యాపారులకు ఈ ఛార్జీలు వర్తించవు. సాధారణ వినియోగదారులపై ఈ ఛార్జీలు నేరుగా ప్రభావం చూపవు, ఎందుకంటే అవి వ్యాపారులు లేదా అగ్రిగేటర్లకు మాత్రమే వర్తిస్తాయి.
Also Read: UPI Payments: UPI పాస్వర్డ్ మర్చిపోయారా.. ఇక మీద కళ్లతో పేమెంట్ చేయండి
UPI వ్యవస్థ నిర్వహణకు అయ్యే ఖర్చులు గణనీయంగా ఉంటాయి. బ్యాంకులు, నేషనల్ పేమెంట్స్ కార్పొరేషన్ ఆఫ్ ఇండియా (NPCI) వంటి సంస్థలు సాంకేతిక మౌలిక సదుపాయాలు, సర్వర్లు, సాఫ్ట్వేర్ నిర్వహణ కోసం భారీగా ఖర్చు చేస్తున్నాయి. ఇప్పటివరకు, ఈ ఖర్చులను ప్రభుత్వం సబ్సిడీల రూపంలో భరించింది. ఇటీవల రిజర్వ్ బ్యాంక్ ఆఫ్ ఇండియా (RBI) గవర్నర్ సంజయ్ మల్హోత్రా, UPI వ్యవస్థ ఆర్థిక స్థిరత్వం కోసం ఈ ఖర్చులను ఎవరైనా భరించాల్సి ఉంటుందని స్పష్టం చేశారు. ఈ నేపథ్యంలోనే ICICI బ్యాంక్ ఈ కొత్త ఛార్జీలను ప్రవేశపెట్టింది.
UPI లావాదేవీల సంఖ్య, విలువ రోజురోజుకూ పెరుగుతున్నందున, బ్యాంకులు, NPCI, ఇతర సర్వీస్ ప్రొవైడర్లపై ఒత్తిడి పెరుగుతోంది. ప్రభుత్వం అమలు చేస్తున్న జీరో మర్చంట్ డిస్కౌంట్ రేట్ (MDR) విధానంతో, యూపీఐ లావాదేవీల ద్వారా బ్యాంకులకు ఎలాంటి ఆదాయం రావడం లేదు. ఈ ఆర్థిక భారాన్ని తగ్గించుకునేందుకే ఐసీఐసీఐ బ్యాంక్ ఈ ఛార్జీలను ప్రవేశపెట్టింది.
ఈ నిర్ణయం డిజిటల్ చెల్లింపుల పరిశ్రమలో మరింత చర్చకు దారితీసే అవకాశం ఉంది. ఇతర బ్యాంకులు కూడా భవిష్యత్తులో ఇలాంటి ఛార్జీలను ప్రవేశపెడతాయా అనేది చూడాలి. అయితే, ప్రస్తుతం సాధారణ వినియోగదారులపై ఎలాంటి ప్రత్యక్ష ప్రభావం ఉండదని బ్యాంక్ స్పష్టం చేసింది.