Hyderabad: భాగ్యనగరంలో మరోసారి రేవ్ పార్టీల కలకలం రేగింది. తాజాగా, కొండాపూర్‌లోని ఒక సర్వీస్ అపార్ట్‌మెంట్‌లో గుట్టుగా నిర్వహిస్తున్న రేవ్ పార్టీని ఎక్సైజ్ పోలీసులు భగ్నం చేశారు. ఈ ఘటనలో ఆంధ్రప్రదేశ్‌కు చెందిన 11 మందిని అరెస్ట్ చేసినట్లు పోలీసులు తెలిపారు. అరెస్ట్ అయిన వారిలో మంగళగిరి, విజయవాడ, కాకినాడ, రాజమండ్రికి చెందిన వ్యక్తులు ఉన్నట్లు గుర్తించారు.
పోలీసులు తెలిపిన వివరాల ప్రకారం, ఈ రేవ్ పార్టీలో గంజాయితో పాటు పలు రకాల మాదక ద్రవ్యాలను స్వాధీనం చేసుకున్నారు. విచ్చలవిడిగా పార్టీని నిర్వహిస్తున్న అశోక్ నాయుడు అనే వ్యక్తిని పోలీసులు అదుపులోకి తీసుకున్నారు. డబ్బున్న బడాబాబులను లక్ష్యంగా చేసుకుని ఇటువంటి రేవ్ పార్టీలు నిర్వహిస్తున్నట్లు పోలీసులు ప్రాథమికంగా గుర్తించారు.
Also Read: Haridwar: హరిద్వార్‌లోని మానసాదేవి ఆలయంలో తొక్కిసలాట
కొండాపూర్‌లోని ఎస్వీ నిలయం అనే సర్వీస్ అపార్ట్‌మెంట్‌లో ఆంధ్రప్రదేశ్ రాష్ట్రానికి చెందిన కొన్ని ముఠాలు వీకెండ్ సందర్భంగా హైదరాబాద్‌కు వచ్చి ఇటువంటి రేవ్ పార్టీలను నిర్వహిస్తున్నట్లు సమాచారం. ఈ ముఠాలు యువతను డ్రగ్స్‌కు బానిసలను చేస్తున్నాయని దిశ పత్రిక నివేదించింది. గతంలో కూడా మాదాపూర్‌లోని సైబర్ టవర్స్ సమీపంలో ఇలాంటి రేవ్ పార్టీ భగ్నమైన విషయం తెలిసిందే. ఈ కేసుపై మరింత సమాచారం తెలియాల్సి ఉంది. రేవ్ పార్టీల నియంత్రణకు పోలీసులు నిఘా పెంచుతున్నట్లు తెలుస్తోంది.