Hydraa: భూకబ్జాదారులకు చెక్ పెట్టిన హైడ్రా (HYDRA) అధికారులు, మియాపూర్లోని కోట్లాది రూపాయల ప్రభుత్వ స్థలాన్ని తిరిగి స్వాధీనం చేసుకున్నారు. సుమారు 5 ఎకరాల విస్తీర్ణంలో ఉన్న ఈ భూమి విలువ బహిరంగ మార్కెట్లో దాదాపు రూ. 600 కోట్లుగా అంచనా.
భారీ స్థాయి కబ్జా వెలుగులోకి..
హైదరాబాద్ నగరంలో ప్రభుత్వ భూముల ఆక్రమణలు ఏ స్థాయిలో జరుగుతున్నాయో నిరూపించే ఘటనా మియాపూర్లో జరిగింది. ముక్తామహబూబ్ కుంటకు ఆనుకుని ఉన్న సర్వే నెంబర్ 44/5లోగల ఈ విలువైన కుంట భూభాగాన్ని కొందరు కబ్జాదారులు అడ్డగోలుగా ఆక్రమించుకున్నారు.
అసలు సర్వే నెంబర్ 44/5 కాగా, కబ్జాదారులు అక్రమ మార్పులు చేసి దానిని 44/4గా చూపించేందుకు ప్రయత్నించినట్లు హైడ్రా దర్యాప్తులో స్పష్టమైంది.
ఇది కూడా చదవండి: Bhatti vikramarka: అంతర్జాతీయ భాగస్వాముల పాత్ర ఎంతో ముఖ్యం
కుంట కట్టపై దాదాపు 200 మీటర్ల మేర 18 అక్రమ షెడ్లను నిర్మించారు. వీటి ద్వారా నెలకు ఒక్కో షెడ్డుకు రూ. 50 వేల చొప్పున అద్దె వసూలు చేస్తున్నారు.
అంతేకాకుండా, ఖాళీ స్థలాన్ని ప్రైవేట్ బస్సుల పార్కింగ్ కోసం ఉపయోగించి, కేవలం పార్కింగ్ నుంచే నెలకు రూ. 8 లక్షల వరకు అక్రమంగా సంపాదిస్తున్నట్లు హైడ్రా అధికారుల విచారణలో తేలింది.
క్షణాల్లో చర్యలు.. ప్రభుత్వ ఆస్తి రక్షణ!
కబ్జాదారుల వద్ద ఈ భూమికి సంబంధించిన ఎలాంటి చట్టబద్ధమైన పత్రాలు లేవని హైడ్రా అధికారులు ధృవీకరించుకున్న వెంటనే వేగంగా స్పందించారు.
వెంటనే రంగంలోకి దిగిన అధికారులు, అక్రమంగా నిర్మించిన 18 షెడ్లనూ పూర్తిగా తొలగించారు. భవిష్యత్తులో తిరిగి ఆక్రమణకు గురి కాకుండా, మొత్తం భూభాగం చుట్టూ ఫెన్సింగ్ (కంచె) ఏర్పాటు చేసి ప్రభుత్వ ఆస్తిని పటిష్టంగా రక్షించారు.
కీలక నిందితుల గుర్తింపు.. బడా బాబుల పాత్రపై అనుమానాలు!
ఈ భారీ స్థాయి కబ్జాకు కూన సత్యం గౌడ్, బండారి అశోక్ ముదిరాజ్ ప్రధాన కారకులుగా హైడ్రా గుర్తించింది. అయితే, వీరి వెనుక కొన్ని బడా బాబుల మద్దతు కూడా ఉన్నట్లు అధికారులు బలంగా అనుమానిస్తున్నారు. ఈ కబ్జా వెనుక ఉన్న పెద్ద తలకాయల కోసం దర్యాప్తు కొనసాగుతోంది.
హైదరాబాద్లో విలువైన ప్రభుత్వ స్థలాలను కాపాడే విషయంలో హైడ్రా తీసుకుంటున్న కఠిన చర్యలు.. భూకబ్జాదారులకు ఒక గట్టి హెచ్చరికగా నిలుస్తున్నాయి.