Uttar Pradesh: భార్యాభర్తల గొడవలు కొత్తేమీ కావు, కానీ ఇవి నలుగురిలో, నడిరోడ్డుపైకి వస్తే మాత్రం హై-వోల్టేజ్ డ్రామా అవుతుంది. ఒకప్పుడు ఇలాంటి సీన్లు సినిమాల్లోనే చూసేవాళ్లం. కానీ, ఇప్పుడు ఇవి తరచుగా నిజ జీవితంలో కనిపిస్తూ వార్తల్లో నిలుస్తున్నాయి.
తాజాగా ఉత్తరప్రదేశ్‌లోని కాన్పూర్‌లో జరిగిన ఒక సంఘటన సోషల్ మీడియాలో వైరల్ అవుతోంది. భర్త, అతని ప్రియురాలు కలిసి హోటల్ నుంచి బయటకు వస్తుండగా, భార్య వారిని అడ్డంగా పట్టుకుంది. అంతే! ఆ తర్వాత రోడ్డుపై జరిగిన రచ్చ అంతా ఇంతా కాదు.
ఏం జరిగింది?
ఈ సంఘటన కాన్పూర్‌లోని మహారాజ్‌పూర్ పోలీస్ స్టేషన్ పరిధి, నార్వాల్ మోడ్ సమీపంలో జరిగింది.
మహారాజ్‌పూర్‌కు చెందిన ఒక మహిళకు 2018లో వివాహమైంది, వారికి ముగ్గురు పిల్లలు ఉన్నారు. ఆమె భర్త రాజ్‌కోట్‌లో నివసిస్తూ, దీపావళికి రెండు రోజుల ముందు ఇంటికి వచ్చాడు. మంగళవారం ఉదయం, భర్త తన స్నేహితురాలిని (ప్రియురాలిని) కలవడానికి నార్వాల్ మోర్‌లోని ఒక హోటల్‌కి వెళ్లాడు.
Also Read: Myanmar: మయన్మార్‌లో విషాదం.. బౌద్ధ ఉత్సవంపై బాంబు దాడి, 24 మంది మృతి!
భర్తపై అనుమానం వచ్చిన భార్య కూడా అతన్ని రహస్యంగా అనుసరించింది. సరిగ్గా అదే సమయంలో, తన భర్త ఆ మహిళతో చేతులు పట్టుకుని హోటల్ నుంచి బయటికి రావడం చూసి భార్యకు కోపం కట్టలు తెంచుకుంది.
రెడ్ హ్యాండెడ్‌గా పట్టుకున్న భార్య.. మొదలైన గొడవ
తన భర్త గత మూడేళ్లుగా ఆ మహిళతో అక్రమ సంబంధం పెట్టుకున్నాడని, గతంలో కూడా చాలాసార్లు వారిని రెడ్ హ్యాండెడ్‌గా పట్టుకున్నానని భార్య ఆరోపించింది.
హోటల్ వెలుపల, భార్య, భర్త, ప్రియురాలు… మూడు వర్గాల మధ్య ముందుగా మాటల యుద్ధం జరిగింది. ఆ తర్వాత అది శారీరక ఘర్షణగా మారింది. భార్య ఆవేశంతో భర్త ప్రియురాలిని కొట్టడమే కాకుండా, అడ్డుకోవడానికి ప్రయత్నించిన తన భర్తను కూడా చెంపదెబ్బ కొట్టింది.
దీంతో ఇద్దరు మహిళలు ఒకరి జుట్టు మరొకరు పట్టుకుని, నడివీధిలో తీవ్రంగా కొట్టుకున్నారు. ఈ హై-వోల్టేజ్ డ్రామా దాదాపు గంటసేపు కొనసాగింది. దారిన పోయే వారంతా గుంపుగా చేరి ఈ గొడవను చూశారు. కొందరు ఈ దృశ్యాన్ని వీడియో తీసి సోషల్ మీడియాలో పోస్ట్ చేశారు.
ప్రేక్షకపాత్ర వహించిన పోలీసులు
ఈ రచ్చ అంతా జరుగుతున్నా, ఘటనా స్థలంలో ఉన్న పోలీస్ అధికారులు మౌనంగా ఉండిపోవడం ఆశ్చర్యకరం. దాదాపు గంటసేపు గొడవ జరిగిన తర్వాత, అటుగా వెళ్తున్న కొందరు వ్యక్తులు జోక్యం చేసుకుని పరిస్థితిని అదుపులోకి తీసుకువచ్చారు. చివరకు భర్తను అక్కడి నుంచి పంపించి వేశారు.
ఈ సంఘటనపై తమకు ఎటువంటి లిఖితపూర్వక ఫిర్యాదు అందలేదని పోలీసులు తెలిపారు. అయితే, వైరల్ అయిన వీడియోపై దర్యాప్తు చేస్తున్నామని, ఫిర్యాదు అందితే తప్పకుండా చర్యలు తీసుకుంటామని వారు చెప్పారు.
నిజ జీవితంలో ఇలాంటి సంఘటనలు జరగడం, వాటిని పోలీసులు అదుపు చేయకపోవడంపై ప్రజల నుంచి విమర్శలు వ్యక్తమవుతున్నాయి.