Fire Accident: ఆంధ్రప్రదేశ్లోని కాకినాడ జిల్లాలో శనివారం మధ్యాహ్నం పెను ప్రమాదం సంభవించింది. సామర్లకోట మండలం వేట్లపాలెం శివారులో ఉన్న ‘సూర్యశ్రీ ఫైర్ వర్క్స్’ బాణసంచా తయారీ కేంద్రంలో ఒక్కసారిగా భారీ పేలుడు చోటుచేసుకుంది. గోదావరి కెనాల్ పక్కనే ఉన్న ఈ పరిశ్రమలో మధ్యాహ్నం 2 గంటల సమయంలో జరిగిన ఈ ప్రమాదం చూస్తుండగానే పెద్ద ఎత్తున మంటలు ఎగసిపడేలా చేసింది. ఈ ఘోర ఘటనలో ఇప్పటివరకు 21 మంది ప్రాణాలు కోల్పోవడం రాష్ట్రవ్యాప్తంగా తీవ్ర దిగ్భ్రాంతిని కలిగిస్తోంది.
ఈ పేలుడు ధాటికి ఆ ప్రాంతమంతా దట్టమైన పొగతో నిండిపోయింది. పేలుడు శబ్దం ఎంత తీవ్రంగా ఉందంటే, దాదాపు 5 కిలోమీటర్ల మేర జనం ఉలిక్కిపడ్డారు. పక్క గ్రామంలోని ఒక ప్రైవేటు పాఠశాల భవనానికి కూడా పగుళ్లు వచ్చాయంటే ఈ ప్రమాదం ఎంత భీభత్సంగా జరిగిందో అర్థం చేసుకోవచ్చు. సమాచారం అందుకున్న అగ్నిమాపక సిబ్బంది రెండు ఫైర్ ఇంజిన్లతో సంఘటనా స్థలానికి చేరుకుని మంటలను అదుపులోకి తెచ్చేందుకు శ్రమిస్తున్నారు.
మృతుల్లో ఎక్కువ మంది మహిళా కార్మికులే ఉన్నట్లు తెలుస్తోంది, ఇది మరింత బాధాకరమైన విషయం. తీవ్రంగా గాయపడిన మరో 8 మందిని అంబులెన్స్లలో వెంటనే స్థానిక ఆసుపత్రులకు తరలించి చికిత్స అందిస్తున్నారు. అడపా నాని కుటుంబ సభ్యులు నిర్వహిస్తున్న ఈ పరిశ్రమలో, అనుమతించిన పరిమితికి మించి బాణసంచా నిల్వ చేయడం వల్లే ఇంత పెద్ద ప్రమాదం జరిగిందని స్థానికులు ఆరోపిస్తున్నారు.
ప్రస్తుతం సహాయక చర్యలు కొనసాగుతున్నాయి. మృతుల కుటుంబ సభ్యుల రోదనలతో ఆ ప్రాంతమంతా శోకసంద్రంగా మారింది. అధికారులు ఈ ఘటనపై విచారణ చేపట్టి, ప్రమాదానికి గల ఖచ్చితమైన కారణాలను తెలుసుకునే పనిలో ఉన్నారు. నిబంధనల ఉల్లంఘన జరిగిందా అనే కోణంలో పోలీసులు కేసు నమోదు చేసి దర్యాప్తు చేస్తున్నారు.