Pahalgam Attack: జమ్మూ కాశ్మీర్‌లోని పహల్గామ్ సమీపంలోని బైసరన్.. ప్రకృతి ప్రేమికులకు పరిపూర్ణ నేస్తం, గడ్డి మైదానాలతో నిండి, మంచు కొండల మధ్య వెలసిన ఆ స్వర్గధామ ఇప్పుడు కన్నీటి కథను వినిపిస్తోంది. శాంతి కోసం వచ్చిన పర్యాటకులపై ఉగ్రవాదులు జరిపిన దాడిలో ఓ సాధారణ హార్స్ రైడర్ అసాధారణ వీరుడిగా నిలిచాడు.
మరణించినా వీరత్వాన్ని చాటిన ఆదిల్
బైసరన్ ప్రాంతంలో పోనీ రైడ్ ద్వారా జీవనం నడిపిస్తున్న సయ్యద్ ఆదిల్ హుస్సేన్ షా.. ఓ పర్యాటకుడిని గుర్రంపై తీసుకెళ్తున్న సమయంలో ఉగ్రదాడి జరిగింది. సాధారణంగా ఎవరు పడే భయాన్ని పక్కన పెట్టి, పర్యాటకుడిని రక్షించాలనే తపనతో ఉగ్రవాదితో గట్టిగా ఎదురయ్యాడు. ఒకరి నుంచి రైఫిల్ లాక్కొనే ప్రయత్నం చేశాడు. ఆ ప్రయత్నం ఆయనకు ప్రాణాల మీదకు వచ్చింది. కానీ అతని ధైర్యం, మానవత్వం మాత్రం మరణించలేదు.
ఇది కూడా చదవండి: Pahalgam Terror Attack: అట్టారి సరిహద్దు మూసివేత.. నేడు అఖిలపక్ష సమావేశాలు
వీరుడు వెనుక కన్నీటి ప్రపంచం
ఆదిల్ మృతి అతడి కుటుంబాన్ని నిశ్చలంగా మార్చింది. వృద్ధ తల్లిదండ్రులు, భార్య, చిన్నారులు.. అందరూ ఆదిల్ పై ఆధారపడి జీవించేవారు. ఇప్పుడు వారంతా జీవన పోరాటంలో ఒంటరయ్యారు. ఆదిల్ తండ్రి హైదర్ షా వాపోతూ మాట్లాడుతూ.. “నాతో మాట్లాడిన నా కొడుకు చివరి మాట ఏమిటో కూడా గుర్తు లేదు.. ఇప్పుడు అతని లేకపోవడం మాకు భరించలేనిది” అన్నారు.
ప్రజల రక్షణ కోసం ప్రాణం త్యాగం
ఆదిల్ చేసిన త్యాగం చిన్న విషయం కాదు. తుపాకులు చేతిలో ఉన్న ఉగ్రవాదుల్ని ఎదుర్కొనడం సాధారణం కాదు. కానీ ఒక సాధారణ వ్యక్తి, తన దగ్గర ఏముంది అని కాకుండా, తనతో ఉన్నవారిని ఎలా కాపాడాలనే ధైర్యంతో ముందుకు వెళ్లాడు. ఆయన కథను దేశం మర్చిపోకూడదు. ఇది ఒక ఊరి గర్వం కాదు.. ఒక దేశపు గర్వం కావాలి.
ప్రభుత్వం స్పందించాలి
ఈ దాడి బాధ్యతలను తీసుకుని, ఆదిల్ కుటుంబానికి ఆర్థిక, మానవతా సహాయం అందించాల్సిన అవసరం ఉంది. ఆయన పరోక్షంగా దేశ సేవలో ప్రాణత్యాగం చేశాడు. అలాంటి కుటుంబాన్ని ఆదుకోవడం మనందరి బాధ్యత.