Rain Alert: బంగాళాఖాతంలో ఉన్న ‘దిత్వా’ తుపాను వాయుగుండం కాస్తా బలపడింది. అయితే, ఇది చెన్నై వైపు కాకుండా పుదుచ్చేరి వైపు తన దారిని మార్చుకుందని వాతావరణ శాఖ చెప్పింది. ఈ వాయుగుండం ఈ రోజు నాటికి కొంచెం బలహీనపడి, తీవ్ర అల్పపీడనంగా మారే అవకాశం ఉంది. దీని ప్రభావం వల్ల ఇప్పటికే ఆంధ్రప్రదేశ్లోని కొన్ని జిల్లాల్లో వానలు మొదలయ్యాయి.
ముఖ్యంగా నెల్లూరు, తిరుపతి జిల్లాల్లో కొన్ని చోట్ల పిడుగులతో కూడిన భారీ వర్షాలు పడుతున్నాయి. మిగిలిన జిల్లాలైన కృష్ణా, గుంటూరు, ఎన్టీఆర్, బాపట్ల, పల్నాడు, ప్రకాశం, మరియు రాయలసీమ ప్రాంతాల్లో సాధారణ వర్షాలు కురుస్తాయని అధికారులు తెలిపారు. నెల్లూరు, తిరుపతి, ప్రకాశం, బాపట్ల, కృష్ణా, పశ్చిమ గోదావరి, బీఆర్ అంబేద్కర్ కోనసీమ జిల్లాల వారికి మరో ముఖ్యమైన హెచ్చరిక ఏంటంటే, గంటకు 55 కిలోమీటర్ల వేగంతో గాలి వీచే అవకాశం ఉంది. అందుకే అందరూ కొంచెం జాగ్రత్తగా ఉండాలి.
నిన్న కూడా తిరుపతి జిల్లాలోని మల్లంలో ఏకంగా 5.3 సెంటీమీటర్ల వర్షం పడింది. నెల్లూరు జిల్లాలోని తడ, చిత్తమూరు ప్రాంతాల్లో కూడా భారీ వర్షపాతం నమోదైంది. తీర ప్రాంతాలలో నిన్న మధ్యాహ్నం 3 గంటల నుంచే ఉరుములు, మెరుపులతో కూడిన వానలు కురుస్తున్నాయి. వాకాడు వద్ద సముద్రం దాదాపు 30 మీటర్ల వరకు ముందుకు రావడాన్ని బట్టి పరిస్థితి తీవ్రతను అర్థం చేసుకోవచ్చు. వాయుగుండం దారి మార్చుకున్నా, తమిళనాడులో మాత్రం వర్షాలు ఇంకా పడుతున్నాయి. ఈ రోజు కూడా ఆ రాష్ట్రంలోని చాలా జిల్లాలకు ‘ఆరెంజ్ అలర్ట్’ ఇచ్చారు. ఈ రోజు బుధవారం పుదుచ్చేరి, మహాబలిపురం మధ్య తీరాన్ని ఈ వాయుగుండం తాకే అవకాశం ఉందని అంచనా వేస్తున్నారు.
తెలంగాణలో చలి తగ్గుముఖం!
ఇక తెలంగాణ విషయానికి వస్తే, రాష్ట్రంలో చలి కాస్త తగ్గుముఖం పట్టింది. నిన్న నమోదైన ఉష్ణోగ్రతల వివరాలను చూస్తే, ఆదిలాబాద్లో అత్యల్పంగా 10.2 డిగ్రీల చలి నమోదైంది. మిగిలిన ప్రాంతాలైన పటాన్ చెరువు, మెదక్, రాజేంద్ర నగర్, హనుమకొండ, నిజామాబాద్ వంటి చోట్ల 14 నుండి 16 డిగ్రీల మధ్య ఉష్ణోగ్రతలు ఉన్నాయి. రాజధాని హైదరాబాద్లో కూడా 18.3 డిగ్రీల వరకు ఉష్ణోగ్రత నమోదైంది. అంటే, గతంతో పోలిస్తే చలి తీవ్రత కొంచెం తగ్గి, వాతావరణం కాస్త వెచ్చగా మారిందని చెప్పవచ్చు.