Nara Lokesh: ఇంటర్నెట్ దిగ్గజం గూగుల్ సంస్థ తన భారీ డేటా మరియు ఏఐ హబ్ ప్రాజెక్ట్ కోసం ఏకంగా 15 బిలియన్ డాలర్లు (దాదాపు ₹1.33 లక్షల కోట్లు) ఆంధ్రప్రదేశ్‌లోని విశాఖపట్నంలో పెట్టుబడి పెట్టనున్నట్లు ప్రకటించడం పొరుగు రాష్ట్రం తమిళనాడులో తీవ్ర రాజకీయ దుమారం రేపింది. ఈ అంశంపై తమిళనాడులోని అధికార డీఎంకే, ప్రతిపక్ష అన్నాడీఎంకే మధ్య మాటల యుద్ధం జరుగుతుండగా, ఆంధ్రప్రదేశ్ ఐటీ, విద్యాశాఖ మంత్రి నారా లోకేష్ ఇచ్చిన కౌంటర్ ఇప్పుడు చర్చనీయాంశంగా మారింది.
తమిళనాడులో రాజకీయ వాగ్వాదం
గూగుల్ సీఈఓ సుందర్ పిచాయ్ తమిళనాడులోని మధురైలో జన్మించినప్పటికీ, ఆయన నేతృత్వంలోని గూగుల్ సంస్థను తమ రాష్ట్రంలో పెట్టుబడి పెట్టమని ఆకర్షించడంలో ముఖ్యమంత్రి ఎంకే స్టాలిన్ ప్రభుత్వం విఫలమైందని అన్నాడీఎంకే (AIADMK) తీవ్రంగా ఆరోపించింది.
- బీజేపీ మిత్రపక్షమైన అన్నాడీఎంకే అధినేత ఎడప్పాడి పళనిస్వామి ఈ విషయంలో స్టాలిన్ ప్రభుత్వాన్ని లక్ష్యంగా చేసుకున్నారు.
- అన్నాడీఎంకే సీనియర్ నాయకుడు ఆర్బీ ఉదయకుమార్, గూగుల్‌ను రాష్ట్రానికి తీసుకురావడంలో విఫలమవడం వల్ల డీఎంకే ప్రభుత్వం ‘చారిత్రక అవకాశాన్ని’ కోల్పోయిందని విలేకరులతో అన్నారు.
- దీనికి డీఎంకే తరపున పరిశ్రమల మంత్రి టీఆర్‌బీ రాజా స్పందిస్తూ, ఫాక్స్‌కాన్ వంటి సంస్థల నుంచి దాదాపు ₹15,000 కోట్ల భారీ పెట్టుబడిని తమిళనాడు ఆకర్షించిందని బదులిచ్చారు.
ఇది కూడా చదవండి: Layoffs: అమెరికా తర్వాత మన దేశంలోనే..!టెక్ స్టార్టప్ కంపెనీల్లో 4 వేల ఉద్యోగుల తొలగింపు
నారా లోకేష్ ‘భారత్’ కౌంటర్
తమిళనాడులో జరుగుతున్న ఈ రాజకీయ దుమారానికి సంబంధించిన ఒక వార్తా నివేదిక స్క్రీన్‌షాట్‌ను ఆంధ్రప్రదేశ్ మంత్రి నారా లోకేష్ తన సోషల్ మీడియా వేదిక ‘ఎక్స్’ (గతంలో ట్విట్టర్)లో పోస్ట్ చేస్తూ, కేవలం మూడు పదాల సందేశంతో స్పందించారు.
He chose Bharat 🇮🇳 https://t.co/hASGC1Mz8F pic.twitter.com/bcT72KeZRd
— Lokesh Nara (@naralokesh) October 21, 2025
“HE CHOOSE BHARAT” (ఆయన భారత్‌ను ఎంచుకున్నారు) అంటూ భారత జాతీయ జెండా ఎమోజీని జోడించి లోకేష్ చేసిన ఈ వ్యాఖ్య తెలుగు రాష్ట్రాల్లో చర్చకు దారితీసింది. అంటే, “పెట్టుబడి కేవలం ఒక రాష్ట్రానికి మాత్రమే పరిమితం కాదు, సుందర్ పిచాయ్ గూగుల్ డేటా సెంటర్‌ను పెడుతోంది భారతదేశంలోనే కదా, దీనిని దేశ విజయంగా చూడాలి” అనే బలమైన సందేశాన్ని లోకేష్ పరోక్షంగా తెలియజేశారు.
విశాఖ ఆర్టిఫిషియల్ ఇంటెలిజెన్స్ హబ్‌గా..
గూగుల్‌తో ఢిల్లీలో జరిగిన ఒప్పందం ప్రకారం, విశాఖపట్నంలో ఈ భారీ డేటా సెంటర్, ఏఐ హబ్ ఏర్పాటు కానుంది. ఈ ప్రాజెక్టు ద్వారా విశాఖ నగరం రాబోయే ఐదేళ్లలో ఆర్టిఫిషియల్ ఇంటెలిజెన్స్ (AI) మరియు సాంకేతికత కేంద్రంగా మారుతుందని ఆంధ్రప్రదేశ్ ప్రభుత్వం ధీమా వ్యక్తం చేస్తోంది.
కాగా, గత వారం గూగుల్ పెట్టుబడిని ధృవీకరించిన తర్వాత లోకేష్, కర్ణాటక ఐటీ మంత్రి ప్రియాంక్ ఖర్గేతో కూడా తీవ్ర వివాదానికి దిగారు. బెంగళూరులోని మౌలిక సదుపాయాలు సరిగా లేకపోవడంపై అక్కడి వ్యాపారులు విమర్శలు చేయగా, లోకేష్ వైజాగ్ వైపు ఆ వ్యాపారాలను ఆహ్వానిస్తూ ట్వీట్లు చేశారు. ఇప్పుడు తమిళనాడు రాజకీయాలపై లోకేష్ స్పందన, దక్షిణాది రాష్ట్రాల మధ్య పెట్టుబడుల ఆకర్షణలో నెలకొన్న తీవ్రమైన పోటీని సూచిస్తోంది.