Harish Rao: బీఆర్ఎస్ వర్కింగ్ ప్రెసిడెంట్ కేటీఆర్ మీద గవర్నర్ ఏసీబీ విచారణకు పర్మిషన్ ఇవ్వడంపై మాజీ మంత్రి, బీఆర్ఎస్ ముఖ్య నాయకులు హరీష్ రావు గట్టిగా స్పందించారు. ఇది రాజకీయ కక్ష సాధింపు తప్ప మరొకటి కాదని ఆయన విమర్శించారు. ముఖ్యంగా స్థానిక సంస్థల ఎన్నికలు దగ్గర పడుతున్న ఈ సమయంలో, ముఖ్యమంత్రి రేవంత్ రెడ్డి ఇలాంటి ‘చిల్లర డ్రామాలు’ ఆడుతున్నారని, ప్రజలు ఇదంతా గమనిస్తున్నారని హరీష్ రావు అన్నారు.
ప్రభుత్వంలో ముఖ్యమైన స్థానంలో ఉండి కూడా రేవంత్ రెడ్డి, తమ ప్రభుత్వాన్ని ప్రశ్నించే గొంతులను అణచివేయడానికి ప్రయత్నిస్తున్నారని హరీష్ రావు ఆరోపించారు. కేటీఆర్ హయాంలో జరిగిన ఫార్ములా ఈ రేస్ విషయంలో కాంగ్రెస్ ప్రభుత్వం పదేపదే అనవసరమైన ఆరోపణలు చేస్తోందన్నారు. ఈ రేస్ చాలా పారదర్శకంగా జరిగిందని, కానీ కాంగ్రెస్ ప్రభుత్వం రెండేళ్లుగా దానిపై ‘కోడిగుడ్డుపై ఈకలు పీకుతున్నట్లు’ తప్పులు వెతకడానికి ప్రయత్నిస్తోందని ఆయన ఎద్దేవా చేశారు.
హరీష్ రావు మాట్లాడుతూ, హైదరాబాద్ నగరానికి మంచి పేరు తెచ్చిన కేటీఆర్పై తప్పుడు కేసులు పెట్టి, ఆయనను ఇబ్బంది పెట్టాలనేదే రేవంత్ రెడ్డి లక్ష్యంగా పెట్టుకున్నారని ఆగ్రహం వ్యక్తం చేశారు. అయితే, కేటీఆర్కు బీఆర్ఎస్ పార్టీ ఎప్పుడూ పూర్తిగా అండగా ఉంటుందని ఆయన స్పష్టం చేశారు. రేవంత్ రెడ్డి అవలంబిస్తున్న ఈ ‘దుర్మార్గపు వైఖరి’ని తాము న్యాయపరంగా ధైర్యంగా ఎదుర్కొంటామని హరీష్ రావు గట్టిగా ప్రకటించారు.