Harish Rao: ఆంధ్రప్రదేశ్ మంత్రి నారా లోకేశ్ బనకచర్ల ప్రాజెక్టును కట్టి తీరుతామని ధీమాగా ప్రకటించడాన్ని బీఆర్ఎస్ సీనియర్ నేత తన్నీరు హరీశ్ రావు తీవ్రంగా తప్పుబట్టారు. కేంద్ర ప్రభుత్వంలో ఉన్నామన్న ధైర్యంతో లోకేశ్ మాట్లాడుతున్నారని వ్యాఖ్యానించిన ఆయన, తెలంగాణ హక్కులను తాకేటప్పుడు కాంగ్రెస్ మౌనంగా ఉండడం ఆందోళనకరం అన్నారు.
“కాంగ్రెస్ ఎందుకు మౌనంగా ఉంది?” – హరీశ్ రావు ప్రశ్న
“తెలంగాణలో అధికారంలో ఉన్న కాంగ్రెస్ నేతలు బనకచర్లపై ఎందుకు నోరు మెదపడం లేదు? ముఖ్యమంత్రి రేవంత్ రెడ్డి, నీటి పారుదల శాఖ మంత్రి, ఇతర నేతలు స్పందించకపోవడం వెనుక ఎలాంటి లోపాయికారి ఒప్పందాలున్నాయా?” అంటూ హరీశ్ రావు ఆగ్రహంతో ప్రశ్నించారు.
ఢిల్లీ సమావేశం… రాత్రికి రాత్రి అంగీకారమా?
గోదావరి-బనకచర్ల అంశం కేంద్రం ఏర్పాటు చేసిన ఉమ్మడి రాష్ట్రాల సమావేశాల అజెండాలో ఉన్నా, తెలంగాణ ప్రభుత్వం ముందుగా కేంద్రానికి లేఖ రాస్తూ తాము హాజరుకాలేమని చెప్పిందని హరీశ్ గుర్తుచేశారు. కానీ ఆ తర్వాత రాత్రికి రాత్రి ఢిల్లీ వెళ్లి, అదే బనకచర్ల అంశం మొదటి పాయింట్‌గా ఉండగా సమావేశంలో పాల్గొని, కమిటీ వేయడానికి అంగీకరించడం శంకాస్పదంగా ఉందన్నారు.
“తెలంగాణ కాంగ్రెస్ ధైర్యం చూసే లోకేశ్ ధైర్యం”
“తెలంగాణ కాంగ్రెస్ మౌనం చూసే నారా లోకేశ్ ధైర్యంగా ‘బనకచర్ల కట్టి తీరుతాం’ అంటున్నాడు. కాంగ్రెస్ పార్టీ ఏమీ చెప్పకపోవడమే చంద్రబాబు బుల్డోజింగ్ విధానం పునరుజ్జీవానికి కారణం,” అంటూ హరీశ్ మండిపడ్డారు.
“రేవంత్ రెడ్డి గురు దక్షిణ – బీజేపీ మౌనం”
రేవంత్ రెడ్డి “బనకచర్ల కడితే గానీ అడ్డుకుంటాం” అన్న వ్యాఖ్యను హరీశ్ ఘాటుగా విమర్శించారు. “ఇది వింతమైన న్యాయం. అసలు నష్టాన్ని జరిగిన తర్వాతే అర్థం చేసుకోవాలా? సీఎం పదవిని కాపాడుకోవాలన్న వ్యూహంలో రేవంత్ చంద్రబాబుకి గురుదక్షిణ చెల్లిస్తున్నట్టున్నారు. అదే సమయంలో బీజేపీ పీఠాన్ని కాపాడుకునేందుకు మౌనంగా ఉందంటూ” హరీశ్ ధ్వజమెత్తారు.