Gold & Silver Rate: గత కొద్దిరోజులుగా ఆకాశమే హద్దుగా పెరుగుతూ వచ్చిన బంగారం, వెండి ధరలకు ఒక్కసారిగా బ్రేక్ పడింది. శుక్రవారం అంతర్జాతీయ మార్కెట్లో ఏర్పడిన పరిణామాల వల్ల పసిడి, వెండి ధరలు భారీగా పతనమయ్యాయి. గత 15 ఏళ్లలో ఎన్నడూ లేని విధంగా ఒకే రోజులో ఇంత పెద్ద స్థాయిలో ధరలు తగ్గడం విశేషం.
హైదరాబాద్ మార్కెట్లో తాజా ధరలు: హైదరాబాద్ బులియన్ మార్కెట్లో శుక్రవారం రాత్రి సమయానికి ధరలు ఇలా ఉన్నాయి:
- మేలిమి బంగారం (24 క్యారెట్లు): 10 గ్రాముల బంగారం ధర ఏకంగా రూ. 21,860 తగ్గి రూ. 1,57,840 వద్ద ముగిసింది. అంతకుముందు రోజు ఇది రూ. 1,79,700 గా ఉండేది.
- వెండి: కిలో వెండి ధర ఊహించని విధంగా రూ. లక్ష పతనమై రూ. 2,99,000 కు చేరుకుంది. గురువారం నాడు కిలో వెండి ధర రూ. 3,99,600 వద్ద ముగియడం గమనార్హం.
ఇది కూడా చదవండి: KCR: రేపు కేసీఆర్ విచారణ.. స్టే తెచ్చుకుంటారా? హాజరవుతారా?
ధరలు తగ్గడానికి ప్రధాన కారణాలు:
- లాభాల స్వీకరణ: బంగారం, వెండి ధరలు రికార్డు స్థాయికి చేరడంతో, లాభాలను దక్కించుకోవడానికి మదుపర్లు తమ వద్ద ఉన్న నిల్వలను విక్రయించడం మొదలుపెట్టారు.
- డాలర్ బలోపేతం: అమెరికా ఫెడరల్ రిజర్వ్ ఛైర్మన్ నియామకం నేపథ్యంలో అంతర్జాతీయ మార్కెట్లో డాలర్ విలువ పెరిగింది. సాధారణంగా డాలర్ బలపడితే బంగారం ధరలు తగ్గుతాయి.
- అంతర్జాతీయ ప్రభావం: ప్రపంచ మార్కెట్లో ఔన్సు బంగారం ధర 11 శాతం, వెండి ధర 32 శాతం కుప్పకూలడం దేశీయ మార్కెట్లపై తీవ్ర ప్రభావం చూపింది.
ఎంసీఎక్స్ (MCX) మార్కెట్లో పరిస్థితి: మల్టీ కమొడిటీ ఎక్స్ఛేంజ్లో కూడా ట్రేడింగ్ భారీ నష్టాలతో ముగిసింది. బంగారం సుమారు 18 శాతం, వెండి దాదాపు 27 శాతం మేర నష్టపోయాయి. వెండి ధర ఒక్కరోజే ఇంతలా పడిపోవడం 2011 తర్వాత ఇదే మొదటిసారి అని విశ్లేషకులు చెబుతున్నారు. పెళ్లిళ్ల సీజన్ సమీపిస్తున్న తరుణంలో ధరలు ఇలా తగ్గడం సామాన్య కొనుగోలుదారులకు పెద్ద ఊరట అనే చెప్పాలి.