Gold Price Today: తెలుగు రాష్ట్రాల్లో ఉగాది పండుగ వాతావరణం నెలకొన్న తరుణంలో బంగారం కొనుగోలు చేయాలనుకునే వారికి మార్కెట్ గట్టి ఊరటనిచ్చింది. గత కొన్ని రోజులుగా ఆకాశాన్ని తాకుతూ వస్తున్న పసిడి ధరలు ఒక్కసారిగా దిగివచ్చాయి. మార్చి నెల ప్రారంభం నుంచి చూసుకుంటే ఈరోజు నాటికి బంగారం ధరలు ఏకంగా 9.77 శాతం మేర పతనం కావడం విశేషం. నిన్నటి వరకు స్వల్పంగా పెరుగుతూ కనిపించిన ధరలు, ఈరోజు అనూహ్యంగా యూ-టర్న్ తీసుకుని భారీగా పడిపోవడంతో కొనుగోలుదారులు హర్షం వ్యక్తం చేస్తున్నారు.
దేశవ్యాప్తంగా ప్రధాన నగరాల్లో ఈరోజు పసిడి ధరలు గమనిస్తే.. 24 క్యారెట్ల బంగారం 10 గ్రాముల ధర రూ. 1,50,270 వద్ద ఉండగా, ఆభరణాల తయారీకి వాడే 22 క్యారెట్ల బంగారం ధర రూ. 1,37,740కి చేరింది. దేశ ఆర్థిక రాజధాని ముంబైతో పాటు కోల్కతా, బెంగళూరు నగరాల్లోనూ ఇవే ధరలు కొనసాగుతున్నాయి. అయితే జాతీయ రాజధాని ఢిల్లీలో మాత్రం 24 క్యారెట్ల పసిడి రూ. 1,50,420గా ఉంది. అటు చెన్నైలో ధరలు మిగిలిన నగరాల కంటే కాస్త ఎక్కువగా ఉండి, 24 క్యారెట్ల బంగారం రూ. 1,51,630 వద్ద ట్రేడ్ అవుతోంది.
తెలుగు రాష్ట్రాల విషయానికి వస్తే, హైదరాబాద్, విజయవాడ మరియు విశాఖపట్నంలో బంగారం ధరలు ఒకే రకంగా ఉన్నాయి. ఇక్కడ 24 క్యారెట్ల బంగారం 10 గ్రాముల ధర రూ. 1,50,270గా ఉండగా, 22 క్యారెట్ల ధర రూ. 1,37,740కి పడిపోయింది. పండుగ వేళ విపరీతంగా పెరిగిన ధరల నుంచి ఇది సామాన్యులకు గొప్ప ఉపశమనమని చెప్పాలి. అటు వెండి ధరలు కూడా పసిడి బాటలోనే భారీగా తగ్గుముఖం పట్టాయి. ప్రస్తుతం దేశీయ మార్కెట్లో కిలో వెండి ధర రూ. 2,64,900 వద్ద కొనసాగుతోంది.
బంగారం, వెండి ధరలు అంతర్జాతీయ మార్కెట్ పరిస్థితులపై ఆధారపడి ప్రతి నిమిషం మారుతూ ఉంటాయి. ఈ ధరలు కేవలం నేటి ఉదయం 8 గంటల వరకు అందిన సమాచారం ప్రకారం మాత్రమేనని గమనించాలి. పండుగకు నగలు చేయించుకోవాలనుకునే వారికి ఇది మంచి సమయమని నిపుణులు అభిప్రాయపడుతున్నారు. అయితే కొనుగోలు చేసే ముందు స్థానిక నగల దుకాణాల్లో తాజా ధరలను సరిచూసుకోవడం ఉత్తమం.