Mexico: మెక్సికోలోని గ్వానాహువాటో రాష్ట్రంలో చోటుచేసుకున్న భీకర కాల్పుల ఘటన తీవ్ర విషాదాన్ని నింపింది. సలమంకా నగరంలోని లోమా డి ఫ్లోర్స్ ప్రాంతంలో ఒక ఫుట్బాల్ మ్యాచ్ ముగిసిన ఆనందంలో ఉన్న జనంపైకి దుండగులు అకస్మాత్తుగా వచ్చి తూటాల వర్షం కురిపించారు. వాహనాల్లో వచ్చిన సాయుధ ముఠా సభ్యులు విచక్షణారహితంగా కాల్పులు జరపడంతో మైదానం ఒక్కసారిగా రక్తసిక్తమైంది. ఈ దారుణ ఘటనలో ఒక మహిళ, చిన్నారితో సహా మొత్తం 11 మంది ప్రాణాలు కోల్పోగా, మరో 12 మంది తీవ్రంగా గాయపడి ఆసుపత్రిలో చికిత్స పొందుతున్నారు. ప్రత్యక్ష సాక్షుల కథనం ప్రకారం దుండగులు దాదాపు వంద రౌండ్ల కాల్పులు జరిపి అక్కడి నుంచి పరారయ్యారు.
ఈ దాడుల వెనుక స్థానిక డ్రగ్ ముఠాల మధ్య ఉన్న ఆధిపత్య పోరే ప్రధాన కారణమని అధికారులు భావిస్తున్నారు. ముఖ్యంగా చమురు దొంగతనం, మాదకద్రవ్యాల అక్రమ రవాణాపై పట్టు కోసం సాంటా రోసా డి లిమా గ్యాంగ్, జలిస్కో న్యూ జనరేషన్ కార్టెల్ అనే రెండు ముఠాల మధ్య గత కొంతకాలంగా గొడవలు జరుగుతున్నాయి. ఈ ముఠాల గొడవలే సామాన్య ప్రజల ప్రాణాలను బలితీసుకుంటున్నాయి. సలమంకా మేయర్ సీజర్ ప్రిటో ఈ ఘటనను తీవ్రంగా ఖండిస్తూ, నేర ముఠాలు స్థానిక యంత్రాంగాన్ని భయపెట్టడానికి ఇటువంటి పిరికిపంద చర్యలకు పాల్పడుతున్నాయని మండిపడ్డారు.
Also Read: Chinmayi: కాస్టింగ్ కౌచ్పై చిరంజీవి వ్యాఖ్యలకు చిన్మయి కౌంటర్
శాంతి భద్రతలను కాపాడేందుకు మెక్సికో అధ్యక్షురాలు క్లాడియా షీన్బామ్ తక్షణమే జోక్యం చేసుకోవాలని మేయర్ విజ్ఞప్తి చేశారు. ప్రస్తుతం ఆ ప్రాంతంలో నేషనల్ గార్డ్, ఫెడరల్ పోలీసులు భారీగా మోహరించి నిందితుల కోసం గాలింపు చర్యలు చేపట్టారు. గ్వానాహువాటో రాష్ట్రం గత కొంతకాలంగా మెక్సికోలోనే అత్యధిక హత్యలు జరుగుతున్న ప్రాంతంగా మారుతుండటం ఇప్పుడు సర్వత్రా ఆందోళన కలిగిస్తోంది. ఫుట్బాల్ వంటి క్రీడల ద్వారా సంతోషంగా గడపాలనుకున్న పౌరులపై జరిగిన ఈ దాడి అంతర్జాతీయంగా కూడా కలకలం రేపింది.