Hyderabad: హైదరాబాద్ ఐటీ హబ్ గచ్చిబౌలిలో మరోసారి డ్రగ్స్ వ్యవహారం కలకలం రేపింది. కొండాపూర్లోని ప్రముఖ పబ్ ‘క్వాక్ ఎరీనా’ (Quake Arena) పై ఏసీబీ ‘ఈగల్ టీం’ శనివారం రాత్రి ఆకస్మిక దాడులు నిర్వహించింది. వీకెండ్ సందర్భంగా ‘డిజే బ్లాక్ కాఫీ’ పేరిట నిర్వహించిన భారీ ఈవెంట్లో డ్రగ్స్ వినియోగం జరుగుతోందన్న పక్కా సమాచారంతో అధికారులు రంగంలోకి దిగారు. ఈ సోదాల్లో భాగంగా అత్యాధునిక పరికరాలతో అక్కడికక్కడే పరీక్షలు నిర్వహించగా, ఎనిమిది మంది డ్రగ్స్ సేవించినట్లు నిర్ధారణ అయ్యింది. వీరిని వెంటనే అదుపులోకి తీసుకున్న పోలీసులు గచ్చిబౌలి పోలీస్ స్టేషన్కు తరలించారు.
ఈ పబ్ వివాదాల్లో చిక్కుకోవడం ఇది మొదటిసారి ఏమీ కాదు. కేవలం రెండు నెలల క్రితమే ఇక్కడ జరిగిన ఒక పార్టీలో ఏకంగా 15 మంది డ్రగ్స్ తీసుకుంటూ పట్టుబడ్డారు. ఆ ఘటన మరువక ముందే, మళ్ళీ అదే పబ్లో డ్రగ్స్ దందా బయటపడడం స్థానికంగా సంచలనంగా మారింది. పదే పదే నిబంధనలు ఉల్లంఘిస్తున్నా ఈ పబ్ యాజమాన్యంపై కఠిన చర్యలు తీసుకోవడంలో జాప్యం జరుగుతోందన్న విమర్శలు వస్తున్నాయి. తాజాగా జరిగిన ఘటనతో ఈ పబ్ లైసెన్స్ రద్దు చేసే దిశగా పోలీసులు అడుగులు వేస్తున్నారు.
ఇదే పబ్లో జరిగిన దాడుల సమయంలో టాలీవుడ్ సీనియర్ నటి హేమ కూడా అక్కడే ఉండటం చర్చనీయాంశమైంది. దీనిపై ఆమె స్పందిస్తూ సోషల్ మీడియాలో ఒక వీడియోను విడుదల చేశారు. తాను ఆ పబ్కు వెళ్లిన మాట నిజమేనని, అయితే తనకు నిర్వహించిన డ్రగ్స్ పరీక్షల్లో ‘నెగిటివ్’ వచ్చిందని ఆమె స్పష్టం చేశారు. “హేమ ఎప్పుడూ తప్పు చేయదు, జెన్యూన్ గా ఉంటుంది” అని ఆమె ఆ వీడియోలో పేర్కొన్నారు. ఈవెంట్లో పాల్గొన్నప్పటికీ తనకు డ్రగ్స్ అలవాటు లేదని ఆమె వివరణ ఇచ్చారు.
ప్రస్తుతం పోలీసులు పట్టుబడిన ఆ ఎనిమిది మంది యువకులు డ్రగ్స్ ఎక్కడి నుండి తెచ్చారు? పబ్ యాజమాన్యమే వీటిని సరఫరా చేసిందా? అనే కోణంలో విచారణ ముమ్మరం చేశారు. ఐటీ కారిడార్లోని పబ్లపై నిఘా మరింత పెంచుతామని, యువతను పెడదారి పట్టిస్తున్న ఇలాంటి పబ్ల విషయంలో కఠినంగా వ్యవహరిస్తామని అధికారులు హెచ్చరిస్తున్నారు.