Donald Trump: అమెరికా అధ్యక్షుడు డొనాల్డ్ ట్రంప్ భారత్, రష్యా దేశాలపై మరోసారి తీవ్ర విమర్శలు గుప్పించారు. ఈ రెండు దేశాల ఆర్థిక వ్యవస్థలను “మృత ఆర్థిక వ్యవస్థలు” (డెడ్ ఎకానమీలు)గా అభివర్ణిస్తూ, ఇవి కలిసి మరింతగా దిగజారిపోతాయని వ్యాఖ్యానించారు. భారత దిగుమతులపై 25 శాతం సుంకాలతో పాటు జరిమానాలను ప్రకటించిన కొన్ని గంటల్లోనే, ట్రంప్ తన సోషల్ మీడియా ప్లాట్‌ఫాం ‘ట్రుత్’లో ఈ వివాదాస్పద వ్యాఖ్యలు చేశారు.
ట్రంప్ తన పోస్ట్‌లో, “రష్యాతో భారత్ ఎలాంటి సంబంధాలు కొనసాగిస్తుందో నాకు అనవసరం. ఆ దేశాలు తమ మృత ఆర్థిక వ్యవస్థలను మరింతగా దిగజార్చుకోవచ్చు. భారత్‌తో మేం చాలా తక్కువ వాణిజ్యం చేస్తున్నాం. ప్రపంచంలోనే అత్యధికంగా భారత్ టారిఫ్‌లు ఉన్నాయి” అని పేర్కొన్నారు. ఉక్రెయిన్‌లో దాడులను ఆపాలని ప్రపంచమంతా కోరుతుంటే, భారత్ మాత్రం రష్యా నుంచి ఆయుధాలు, ఇంధనం కొనుగోలు చేస్తోందని ఆయన ఆరోపించారు.
ట్రంప్ వ్యాఖ్యలపై భారత్, రష్యా నుంచి తీవ్ర స్పందనలు వ్యక్తమయ్యాయి. కేంద్ర వాణిజ్యశాఖ మంత్రి పీయూష్ గోయల్ ఈ వ్యాఖ్యలకు స్పందిస్తూ, భారత్ ప్రపంచంలోనే అత్యంత వేగంగా అభివృద్ధి చెందుతున్న అతిపెద్ద ఆర్థిక వ్యవస్థ అని, మరికొన్ని సంవత్సరాల్లోనే మూడో అతిపెద్ద ఆర్థిక వ్యవస్థగా అవతరిస్తుందని స్పష్టం చేశారు. ప్రపంచ ఆర్థిక సంస్థలు ఇప్పుడు భారత్ వైపే చూస్తున్నాయని ఆయన అన్నారు. అమెరికా సుంకాలు, వాణిజ్య ఒప్పందం అంశానికి సంబంధించి భారత్ తన జాతీయ ప్రయోజనాలకు అనుగుణంగా వ్యవహరిస్తుందని గోయల్ పార్లమెంటులో ప్రకటించారు.
రష్యా మాజీ అధ్యక్షుడు, దేశ భద్రతా మండలి ఉపాధ్యక్షుడు దిమిత్రి మెద్వెదేవ్, ట్రంప్ వ్యాఖ్యలపై తీవ్ర స్థాయిలో మండిపడ్డారు. “ట్రంప్‌కు చాలా ఇష్టమైన జాంబీ (రక్తపిశాచాలు) సినిమాలు ఆయన్ని ఇంకా భయపెడుతున్నట్టు ఉన్నాయి. మెద్వెదేవ్ ఘాటుగా స్పందిస్తూ, ట్రంప్‌కు ఇష్టమైన ‘వాకింగ్ డెడ్’ (జాంబీ) సినిమాలను గుర్తుంచుకోవాలని, అలాగే భయంకరమైన ‘డెడ్ హ్యాండ్’ను కూడా స్మరించుకోవాలని వ్యాఖ్యానించారు. ‘డెడ్ హ్యాండ్’ అనేది ప్రచ్ఛన్న యుద్ధ కాలం నాటి ఆటోమేటిక్ అణ్వస్త్ర నియంత్రణ వ్యవస్థను సూచిస్తుంది, ఇది అవసరమైతే అణు దాడికి కూడా సిద్ధమనే హెచ్చరికగా భావిస్తున్నారు.
భారత కంపెనీలపై ఆంక్షలు, ఉద్యోగాలపై ప్రభావం:
మరోవైపు, ఇరాన్ పెట్రో ఉత్పత్తులతో వ్యాపారం చేస్తున్న ఆరు భారతీయ కంపెనీలతో సహా మొత్తం 20 సంస్థలపై అమెరికా ఆంక్షలు విధించింది. ఇరాన్ ఈ నిధులతో ఉగ్రవాదులకు సహకారం అందిస్తోందని ఆరోపించింది. ఈ ఆంక్షలు విధించిన భారతీయ కంపెనీలలో కాంచన్ పాలిమర్స్, అల్కెమికల్ సొల్యూషన్స్, రామ్‌నిక్‌లాల్ ఎస్ గోసాలియా అండ్ కో, జూపిటర్ డై కెమ్ ప్రైవేట్ లిమిటెడ్, గ్లోబల్ ఇండస్ట్రియల్ కెమికల్స్ లిమిటెడ్, పర్సిస్టెంట్ పెట్రోకెమ్ ప్రైవేట్ లిమిటెడ్ ఉన్నాయి. ఈ ఆంక్షల వల్ల అమెరికాతో ఈ సంస్థలు ఎలాంటి లావాదేవీలు నిర్వహించలేవు.
భారత దిగుమతులపై 25 శాతం టారిఫ్ విధించాలన్న ట్రంప్ నిర్ణయం భారత రత్నాలు, ఆభరణాల రంగంపై తీవ్ర ప్రభావం చూపనుందని నిపుణులు హెచ్చరిస్తున్నారు. ఆల్ ఇండియా జెమ్ అండ్ జ్యువెలరీ డొమెస్టిక్ కౌన్సిల్ ఛైర్మన్ రాజేష్ రోక్డే మాట్లాడుతూ, ఈ కొత్త టారిఫ్ ఆగస్టు 1 నుండి అమలులోకి వస్తుందని, ఇదివరకు 10 శాతం టారిఫ్ ఉన్నప్పుడు 50,000 మందికి పైగా ఉద్యోగాలు కోల్పోయారని, ఇప్పుడు 25 శాతం టారిఫ్ వల్ల లక్ష మందికి పైగా ఉద్యోగాలు కోల్పోయే ప్రమాదం ఉందని ఆందోళన వ్యక్తం చేశారు. ముఖ్యంగా హస్తకళాకారులు తయారుచేసే ఆభరణాలపై దీని ప్రభావం తీవ్రంగా ఉంటుందని ఆయన అన్నారు.
ట్రంప్ వ్యాఖ్యలను కాంగ్రెస్ అగ్రనేత రాహుల్ గాంధీ సమర్థించగా, బీజేపీ దీనిపై తీవ్రంగా మండిపడింది. రాహుల్ గాంధీ దేశాన్ని, ప్రజలను అవమానిస్తున్నారని, ఆయనకు భారత వ్యతిరేక మనస్తత్వం అలవడిపోయిందని బీజేపీ ఐటీ సెల్ చీఫ్ అమిత్ మాలవీయ, ఎంపీ అనురాగ్ ఠాకూర్ వంటి బీజేపీ నాయకులు విమర్శించారు.
ఈ పరిణామాల నేపథ్యంలో, ఆగస్టు నెలాఖరులో జరగబోయే ఆరో విడత భారత్-అమెరికా ద్వైపాక్షిక వాణిజ్య చర్చలపై అందరి దృష్టి పడింది. ఈ చర్చల్లో ఆభరణాల పరిశ్రమకు ఏదైనా ఉపశమనం లభిస్తుందేమోనని ఆశతో ఎదురుచూస్తున్నారు. రాజకీయ పరిష్కారం, ద్వైపాక్షిక చర్చలే ఈ కొత్త సంక్షోభాన్ని అధిగమించడానికి మార్గమని పరిశ్రమ నిపుణులు స్పష్టం చేస్తున్నారు.