DK Aruna: పాలమూరు జిల్లా అభివృద్ధిని మాజీ ముఖ్యమంత్రి కేసీఆర్, ప్రస్తుత సీఎం రేవంత్ రెడ్డి ఇద్దరూ విస్మరించారని బీజేపీ జాతీయ ఉపాధ్యక్షురాలు, ఎంపీ డీకే అరుణ తీవ్రస్థాయిలో విమర్శించారు. కేవలం రాజకీయ ప్రయోజనాల కోసమే ఈ ప్రాంతాన్ని వాడుకుంటున్నారని, రైతులకు సాగునీరు అందించాలనే చిత్తశుద్ధి ఇద్దరిలోనూ కనిపించడం లేదని ఆమె మండిపడ్డారు. పవర్ పాయింట్ ప్రజెంటేషన్లతో ఒకరిపై ఒకరు తప్పులు నెట్టుకుంటూ కాలయాపన చేస్తున్నారే తప్ప, క్షేత్రస్థాయిలో పనులు జరగడం లేదని ఆమె ఆరోపించారు.
గత పదేళ్ల కాలంలో కేసీఆర్ పాలమూరు ప్రజలను మోసం చేశారని, ఆ నమ్మకంతోనే ప్రజలు కాంగ్రెస్ పార్టీకి ఏడుగురు ఎమ్మెల్యేలను ఇచ్చారని డీకే అరుణ గుర్తు చేశారు. అయితే, ఇప్పుడు అధికారంలో ఉన్న కాంగ్రెస్ కూడా పాత తప్పులను ఎత్తిచూపుతూ నాటకాలు ఆడుతోందని ఆమె విమర్శించారు. జూరాల ప్రాజెక్టు నుంచి నీళ్లు తీసుకోవాలని మొదటి డీపీఆర్ లో ఉన్నప్పటికీ, దానిని పట్టించుకోకుండా పాలమూరు రైతులతో ఆటలాడుతున్నారని ఆగ్రహం వ్యక్తం చేశారు.
పాలమూరు-రంగారెడ్డి ప్రాజెక్టు విషయంలో ప్రభుత్వం అనుసరిస్తున్న తీరుపై ఆమె పలు ప్రశ్నలు సంధించారు. డిండి ప్రాజెక్టుకు నీళ్లు తరలించడం వల్ల పాలమూరు ప్రాంతానికి తీవ్ర అన్యాయం జరుగుతుందని, గతంలో దీనిని అన్ని పార్టీలు వ్యతిరేకించాయని ఆమె గుర్తు చేశారు. ప్రస్తుత ప్రాజెక్టులో పాలమూరు, రంగారెడ్డి జిల్లాల ఊసే లేదని, దీనికి బదులుగా నాగర్ కర్నూల్ లేదా నల్గొండ ప్రాజెక్టు అని పేరు పెట్టాలని ఎద్దేవా చేశారు. ఇంత జరుగుతున్నా పాలమూరు ప్రాంత ఎమ్మెల్యేలు ఎందుకు నోరు మెదపడం లేదని ఆమె నిలదీశారు.
చివరగా, పాలమూరు-రంగారెడ్డి ప్రాజెక్టుపై ముఖ్యమంత్రి రేవంత్ రెడ్డి వెంటనే సమీక్షా సమావేశం ఏర్పాటు చేయాలని డీకే అరుణ డిమాండ్ చేశారు. ఇరిగేషన్ నిపుణులు, అధికారులు మరియు అన్ని పార్టీల ప్రజా ప్రతినిధులతో కలిసి నిర్ణయాలు తీసుకోవాలని సూచించారు. రాజకీయాలు పక్కన పెట్టి, వచ్చే మూడేళ్లలో ఈ ప్రాజెక్టును పూర్తి చేసి రైతులకు నీళ్లు అందించేలా సీఎం చొరవ చూపాలని ఆమె కోరారు.