Pawan Kalyan: ఆంధ్రప్రదేశ్ ఉప ముఖ్యమంత్రి, పంచాయతీరాజ్ గ్రామీణాభివృద్ధి శాఖ మంత్రి శ్రీ పవన్ కల్యాణ్ నేడు (శనివారం) తూర్పుగోదావరి జిల్లాలో పర్యటించనున్నారు. నిడదవోలు నియోజకవర్గంలోని పెరవలి గ్రామం వేదికగా ప్రతిష్టాత్మక ‘అమరజీవి జలధార’ (జె.జె.ఎం. వాటర్ గ్రిడ్) ప్రాజెక్టు పనులకు ఆయన శంకుస్థాపన చేయనున్నారు.
అమరజీవికి అరుదైన నివాళి
తెలుగు జాతి కోసం, ప్రత్యేక రాష్ట్రం కోసం 56 రోజుల పాటు అన్నపానీయాలు విడిచి ప్రాణత్యాగం చేసిన మహనీయుడు పొట్టి శ్రీరాములు గారి స్మృత్యర్థం, ఈ తాగునీటి పథకానికి ‘అమరజీవి జలధార’ అని నామకరణం చేయడం విశేషం. శుక్రవారం సాయంత్రమే మంగళగిరిలో ఈ ప్రాజెక్టు పోస్టర్ను పవన్ కల్యాణ్ విడుదల చేశారు.
పవన్ కల్యాణ్ పర్యటన షెడ్యూల్:
- ఉదయం 09:20: మంగళగిరి క్యాంప్ కార్యాలయం నుంచి రోడ్డు మార్గంలో బయలుదేరుతారు.
- ఉదయం 10:00: గన్నవరం విమానాశ్రయం చేరుకుంటారు.
- ఉదయం 10:10: హెలికాప్టర్ ద్వారా పెరవలికి ప్రయాణం.
- ఉదయం 10:50: పెరవలి హెలిప్యాడ్కు చేరుకుంటారు.
- ఉదయం 11:00 – మధ్యాహ్నం 01:00: అమరజీవి జలధార బహిరంగ సభ, శంకుస్థాపన కార్యక్రమంలో పాల్గొంటారు.
- మధ్యాహ్నం 01:10: తిరుగు ప్రయాణం ప్రారంభమవుతుంది.
ఇది కూడా చదవండి: Telangana News: ప్రజలకు తెలిసేలా చర్యలు తీసుకోండి
ప్రాజెక్టు ముఖ్యాంశాలు: రూ. 7,910 కోట్లతో బృహత్తర ప్రణాళిక
రాష్ట్రవ్యాప్తంగా ఐదు ఉమ్మడి జిల్లాల (ప్రకాశం, చిత్తూరు, పల్నాడు, తూర్పుగోదావరి, పశ్చిమగోదావరి) పరిధిలో దాహార్తిని తీర్చేలా ఈ ప్రాజెక్టును ప్రభుత్వం రూపొందించింది.
రాబోయే 30 ఏళ్ల అవసరాలను దృష్టిలో ఉంచుకుని, సుమారు 1.21 కోట్ల మందికి స్వచ్ఛమైన తాగునీరు అందించడం.
నేడు ప్రారంభించబోయే పనుల వివరాలు (గోదావరి జిల్లాల వాటా):
- మొత్తం వ్యయం: రూ. 3,050 కోట్లు.
- ప్రయోజనం: 23 నియోజకవర్గాల్లోని 68 లక్షల మందికి తాగునీరు అందుతుంది.
- ఉమ్మడి పశ్చిమ గోదావరి: రూ. 1,400 కోట్లు.
- ఉమ్మడి తూర్పు గోదావరి: రూ. 1,650 కోట్లు.
ఏర్పాట్లు పూర్తి
డిప్యూటీ సీఎం పర్యటన నేపథ్యంలో రాష్ట్ర పర్యాటక శాఖ మంత్రి శ్రీ కందుల దుర్గేష్ దగ్గరుండి ఏర్పాట్లను పర్యవేక్షిస్తున్నారు. పెరవలిలో భారీ బహిరంగ సభకు ఏర్పాట్లు పూర్తి చేయడమే కాకుండా, పోలీసు యంత్రాంగం కట్టుదిట్టమైన భద్రతను కల్పించింది.
గ్రామీణ ప్రాంతాల్లో ప్రతి ఇంటికి స్వచ్ఛమైన గంగమ్మను చేర్చడమే లక్ష్యంగా కూటమి ప్రభుత్వం చేపట్టిన ఈ ‘అమరజీవి జలధార’ పథకం, రాష్ట్ర అభివృద్ధిలో మైలురాయిగా నిలవనుంది.