Delhi Liquor Case: దేశవ్యాప్తంగా సంచలనం సృష్టించిన ఢిల్లీ లిక్కర్ పాలసీ కేసులో సోమవారం ఒక కీలక పరిణామం చోటు చేసుకుంది. గతంలో ఈ కేసులో నిందితులుగా ఉన్న అరవింద్ కేజ్రీవాల్, మనీశ్ సిసోడియా మరియు ఎమ్మెల్సీ కల్వకుంట్ల కవిత సహా మొత్తం 23 మందికి ఢిల్లీ హైకోర్టు నోటీసులు జారీ చేసింది. ఈ నోటీసులపై స్పందిస్తూ కౌంటర్ దాఖలు చేయాలని కోర్టు ఆదేశించింది. తదుపరి విచారణను మార్చి 16వ తేదీకి వాయిదా వేస్తున్నట్లు న్యాయస్థానం స్పష్టం చేసింది.
అసలు ఈ వివాదం ఎందుకు మొదలైందంటే.. ఢిల్లీలోని రౌస్ ఎవెన్యూ ప్రత్యేక కోర్టు ఇటీవల కేజ్రీవాల్, కవిత తదితరులకు ఈ కేసులో ‘క్లీన్ చిట్’ ఇచ్చింది. అంటే వారిపై వచ్చిన ఆరోపణలకు సరైన ఆధారాలు లేవని పేర్కొంటూ వారిని నిర్దోషులుగా పరిగణించింది. అయితే, ట్రయల్ కోర్టు ఇచ్చిన ఈ తీర్పును సవాల్ చేస్తూ సీబీఐ ఢిల్లీ హైకోర్టును ఆశ్రయించింది. ఈ పిటిషన్పై విచారణ సందర్భంగా సీబీఐ తరఫున సొలిసిటర్ జనరల్ తుషార్ మెహతా తన వాదనలు వినిపించారు.
మద్యం పాలసీ వెనుక జరిగిన పెద్ద కుట్రను గుర్తించడంలో ట్రయల్ కోర్టు పొరబడిందని సీబీఐ వాదించింది. కేసులోని అన్ని అంశాలను విడివిడిగా చూడటం వల్ల దర్యాప్తు సంస్థ నైతిక స్థైర్యం దెబ్బతిందని, అసలు నిజాలు బయటకు రాకుండా పోయాయని కోర్టుకు వివరించారు. ఈ కేసులో కేజ్రీవాల్, కవిత వంటి వారి పాత్రను తక్కువగా అంచనా వేశారని, అందుకే ట్రయల్ కోర్టు ఇచ్చిన తీర్పుపై స్టే ఇవ్వాలని సీబీఐ కోరింది.
సీబీఐ వాదనలను పరిగణనలోకి తీసుకున్న ఢిల్లీ హైకోర్టు.. దర్యాప్తు సంస్థపై ట్రయల్ కోర్టు చేసిన కొన్ని వ్యాఖ్యలపై స్టే విధించింది. అంతేకాకుండా, ఈ హైకోర్టు విచారణ ముగిసే వరకు ఈడీ దాఖలు చేసిన కేసులో కూడా ట్రయల్ కోర్టు విచారణను నిలిపివేయాలని ఆదేశాలు జారీ చేసింది. తాజా పరిణామాలతో ఈ లిక్కర్ కేసు మళ్లీ మొదటికి చేరినట్లయింది. మార్చి 16న జరిగే తదుపరి విచారణలో కోర్టు ఎలాంటి నిర్ణయం తీసుకుంటుందోనని అందరూ ఆసక్తిగా ఎదురుచూస్తున్నారు.