Danam Nagender: తెలంగాణ రాజకీయాల్లో విమర్శలు, ప్రతివిమర్శలు ముదురుతున్నాయి. ముఖ్యమంత్రి రేవంత్ రెడ్డిని ఉద్దేశించి బీఆర్ఎస్ వర్కింగ్ ప్రెసిడెంట్ కేటీఆర్ చేసిన వ్యాఖ్యలపై ఎమ్మెల్యే దానం నాగేందర్ తీవ్రంగా స్పందించారు. కేటీఆర్ తీరును తప్పుబడుతూ ఆయన ఘాటైన వ్యాఖ్యలు చేశారు.
ముఖ్యమంత్రి పదవిలో ఉన్న వ్యక్తిని గౌరవించడం నేర్చుకోవాలని దానం నాగేందర్ హితవు పలికారు. రేవంత్ రెడ్డిని ఏకవచనంతో సంబోధించడం సరైన పద్ధతి కాదని, ఆ పదవికి ఒక గౌరవం ఉంటుందని ఆయన గుర్తుచేశారు. రాజకీయాల్లో విమర్శలు చేయడం సహజమే అని, అయితే ఒకరిని విమర్శించినప్పుడు అవతలి వైపు నుంచి వచ్చే ప్రతి విమర్శలను కూడా ఎదుర్కోవడానికి సిద్ధంగా ఉండాలని ఆయన కేటీఆర్కు సూచించారు.
తన రాజకీయ ఎదుగుదల గురించి ప్రస్తావిస్తూ.. తాను ఈ స్థాయిలో ఉండటానికి కారణం తన కార్యకర్తలేనని దానం నాగేందర్ స్పష్టం చేశారు. కార్యకర్తల అండదండలతోనే తాను ఆరుసార్లు ఎమ్మెల్యేగా గెలిచానని, తన బలం, బలగం అంతా వారేనని ఆయన భావోద్వేగంగా చెప్పారు. తనపై నమ్మకంతో గెలిపించిన ప్రజల కోసం ఎప్పుడూ అందుబాటులో ఉంటానని తెలిపారు.
ప్రస్తుతం వినిపిస్తున్న ఉప ఎన్నికల ప్రచారంపై కూడా ఆయన స్పష్టత ఇచ్చారు. ఒకవేళ ఉప ఎన్నికలు వచ్చినా తాను సిద్ధమని, మళ్ళీ గెలిచి తీరుతానని ధీమా వ్యక్తం చేశారు. తన నియోజకవర్గ ప్రజలు, కార్యకర్తలు తన వెంటే ఉన్నారని, ఎటువంటి సవాల్నైనా ఎదుర్కోవడానికి తాను వెనకాడనని దానం నాగేందర్ తేల్చి చెప్పారు.