Hyderabad: తెలంగాణలో జరగనున్న పట్టభద్రుల ఎమ్మెల్సీ ఎన్నికలకు కాంగ్రెస్ అధిష్టానం అభ్యర్థిని ప్రకటించింది. మెదక్-నిజామాబాద్-ఆదిలాబాద్-కరీంనగర్ పట్టభద్రుల ఎమ్మెల్సీ అభ్యర్థిగా వి. నరేందర్ రెడ్డిని (V. Narender Reddy) ఖరారు చేసినట్లు శుక్రవారం ఏఐసీసీ అధికారికంగా ప్రకటించింది.
ఈ ఎన్నికలు జరిగే ప్రాంతంలో 42 అసెంబ్లీ నియోజకవర్గాలు, ఆరు పార్లమెంట్ నియోజకవర్గాలు ఉన్నాయి. మొత్తం 3.41 లక్షల పట్టభద్రుల ఓటర్లు ఉన్నారు. ఒకప్పుడు ఈ ప్రాంతం బీఆర్ఎస్‌కు కంచుకోటగా ఉండగా, ప్రస్తుతం బీఆర్ఎస్ ఈ ఎన్నికలకు దూరంగా ఉండటం రాజకీయంగా చర్చనీయాంశంగా మారింది.
ఉపాధ్యాయ, పట్టభద్రుల ఎమ్మెల్సీ ఎన్నికలు
తెలంగాణలో మొత్తం మూడు ఎమ్మెల్సీ స్థానాలకు ఎన్నికలు జరుగనున్నాయి. ఇందులో రెండు ఉపాధ్యాయ ఎమ్మెల్సీ స్థానాలు, ఒక పట్టభద్రుల ఎమ్మెల్సీ స్థానం ఉన్నాయి.
ప్రస్తుతం ఈ పట్టభద్రుల నియోజకవర్గం నుంచి టి. జీవన్ రెడ్డి ఎమ్మెల్సీగా కొనసాగుతున్నారు, ఉపాధ్యాయ ఎమ్మెల్సీగా రఘోత్తంరెడ్డి ఉన్నారు. వీరి పదవీకాలం మార్చి 29తో ముగియనుంది.
ఎన్నికల షెడ్యూల్
భారత ఎన్నికల సంఘం విడుదల చేసిన షెడ్యూల్ ప్రకారం:
ఫిబ్రవరి 3 – ఎన్నికల నోటిఫికేషన్ జారీ, నామినేషన్ల స్వీకరణ ప్రారంభం
ఫిబ్రవరి 11 – నామినేషన్ల పరిశీలన
ఫిబ్రవరి 13 – నామినేషన్ల ఉపసంహరణకు చివరి తేది
ఫిబ్రవరి 27 – ఉదయం 8 గంటల నుంచి సాయంత్రం 4 గంటల వరకు పోలింగ్
మార్చి 3 – ఓట్ల లెక్కింపు, ఫలితాల ప్రకటన
ఈ ఎన్నికలు రాష్ట్ర రాజకీయాల్లో కీలకంగా మారనున్నాయి.