Revanth Reddy: తెలంగాణ రాజకీయ క్షేత్రంలో మాటల యుద్ధం ముదిరింది. పదేళ్ల పాలన తర్వాత ప్రతిపక్షానికే పరిమితమైన కేసీఆర్, సుదీర్ఘ విరామం తర్వాత చేసిన వ్యాఖ్యలపై ముఖ్యమంత్రి రేవంత్ రెడ్డి గర్జించారు. అబద్ధాల పునాదుల మీద రాజకీయం చేయడం కేసీఆర్ నైజం అంటూ రేవంత్ రెడ్డి ధ్వజమెత్తారు.
1. ఆనాడు సంతకం పెట్టి.. ఈనాడు నీతులు చెబుతారా?
కృష్ణా జలాల పంపిణీ అంశంపై రేవంత్ రెడ్డి సంధించిన ప్రశ్నలు ఇప్పుడు చర్చనీయాంశంగా మారాయి. ఉమ్మడి రాష్ట్రాల విభజన తర్వాత కృష్ణా నది నీటిలో తెలంగాణకు రావాల్సిన వాటాను కేసీఆర్ తాకట్టు పెట్టారని రేవంత్ ఆరోపించారు. ఏపీకి 64%, తెలంగాణకు కేవలం 36% వాటాకు అంగీకరిస్తూ సంతకం చేసిన కేసీఆర్, ఇప్పుడు తెలంగాణకు అన్యాయం జరుగుతోందని మాట్లాడటం “దెయ్యాలు వేదాలు వల్లించినట్లు” ఉందని విమర్శించారు.
2. ఫ్యామిలీ పాలిటిక్స్పై ఘాటు విమర్శలు
కేసీఆర్ కుటుంబ సభ్యులైన కేటీఆర్, హరీష్ రావుల తీరును రేవంత్ రెడ్డి తీవ్రంగా తప్పుబట్టారు. కేసీఆర్ ఉనికిని ఆయన కొడుకు కేటీఆర్, అల్లుడు హరీష్ రావులే చెరిపేస్తున్నారని, ఆ పాపం తనది కాదని రేవంత్ ఎద్దేవా చేశారు. ఎమ్మెల్సీ కవిత విషయంలో కేసీఆర్ కుటుంబం వ్యవహరించిన తీరుపై సంచలన వ్యాఖ్యలు చేశారు. కవితను రాజకీయంగా బలిపశువును చేసి, కనీసం కుటుంబ సభ్యురాలిగా ఇవ్వాల్సిన గౌరవం కూడా ఇవ్వలేదని విమర్శించారు.
ఇది కూడా చదవండి: Bigg Boss Telugu 9 Winner: బిగ్ బాస్ 9 విజేతగా సామాన్యుడి సంచలనం.. కళ్యాణ్ పడాల గెలుచుకున్న ప్రైజ్ మనీ, రెమ్యునరేషన్ ఎంతంటే?
3. చెక్ డ్యామ్లు & టెక్నాలజీపై క్లారిటీ
పాలనలో సంస్కరణలను కేసీఆర్ తప్పుబట్టడాన్ని రేవంత్ ఆక్షేపించారు. చెక్ డ్యామ్లపై దాడులు జరుగుతున్నాయన్నది కేసీఆర్ ఊహజనితమని, ఆధారాలు ఉంటే చూపాలని సవాల్ విసిరారు. యూరియా పంపిణీలో అక్రమాలను అరికట్టడానికి యాప్ ఉపయోగిస్తుంటే, దాన్ని విమర్శించడం కేసీఆర్ టెక్నాలజీ పట్ల ఉన్న అజ్ఞానాన్ని సూచిస్తుందని మండిపడ్డారు.
బాటమ్ లైన్: అసెంబ్లీ వేదికగా ‘సవాల్’
“ట్విట్టర్లో, ఫామ్ హౌస్ లో కూర్చుని మాట్లాడటం కాదు.. దమ్ముంటే అసెంబ్లీకి రా.. నీ జలదోపిడీని సాక్ష్యాలతో సహా బయటపెడతా” అంటూ రేవంత్ రెడ్డి విసిరిన సవాల్ ఇప్పుడు రాజకీయ వర్గాల్లో హాట్ టాపిక్. కేసీఆర్ ఈ సవాల్ను స్వీకరించి అసెంబ్లీకి వస్తారా లేదా అన్నది ఇప్పుడు ఆసక్తికరంగా మారింది.