CM Chandrababu: గుంటూరు వేదికగా జరుగుతున్న ప్రపంచ తెలుగు మహాసభలు మాతృభాష ప్రాభవాన్ని చాటుతూ అట్టహాసంగా జరిగాయి. ఈ వేడుకల్లో ముఖ్యఅతిథిగా పాల్గొన్న ఆంధ్రప్రదేశ్ ముఖ్యమంత్రి నారా చంద్రబాబు నాయుడు తెలుగు భాషా పరిరక్షణ, సాంకేతికత వినియోగం, తెలుగు రాష్ట్రాల మధ్య ఉండాల్సిన సామరస్యంపై కీలక ప్రసంగం చేశారు. సంక్రాంతి పండుగ కంటే ముందే తెలుగువారికి ఇది ఒక పెద్ద పండుగ అని ఆయన అభివర్ణించారు.
తెలుగు భాషా వైభవం, చరిత్ర
మన తెలుగు భాషకు దేశంలోనే ఘనమైన చరిత్ర ఉందని, భారత్ లోని వందలాది భాషల్లో కేవలం ఆరింటికే ‘ప్రాచీన హోదా’ లభించగా, అందులో తెలుగు ఒకటి కావడం మనందరికీ గర్వకారణమని ముఖ్యమంత్రి పేర్కొన్నారు. హిందీ, బెంగాలీ, మరాఠీ తర్వాత దేశంలో అత్యధికంగా మాట్లాడే భాషగా తెలుగు నిలిచిందని, ప్రపంచవ్యాప్తంగా దాదాపు 10 కోట్ల మంది తెలుగు వారు ఉన్నారని ఆయన వెల్లడించారు. సుమారు 40 దేశాల నుండి వచ్చిన ప్రతినిధులు ఈ సభల్లో పాల్గొనడం తెలుగు భాషా వ్యాప్తికి నిదర్శనమని చెప్పారు.
తెలుగువారి ఆత్మగౌరవాన్ని ప్రపంచవ్యాప్తంగా చాటిచెప్పిన దివంగత నేత ఎన్టీఆర్ పేరును ఈ సభా వేదికకు పెట్టడం అత్యంత సంతోషదాయకమని చంద్రబాబు అన్నారు. “నేను తెలుగువాణ్ణి.. నాది తెలుగుదేశం” అని సగర్వంగా ప్రకటించిన ఏకైక నాయకుడు ఎన్టీఆర్ అని ఆయన గుర్తుచేశారు. అలాగే, గ్రాంథిక భాషలో ఉన్న తెలుగును వాడుక భాషలోకి తెచ్చి సామాన్యులకు చేరువ చేసిన గిడుగు వెంకట రామ్మూర్తి సేవలను తెలుగు జాతి ఎప్పటికీ మరవదని కొనియాడారు. 1985లో ఎన్టీఆర్ స్థాపించిన పొట్టి శ్రీరాములు తెలుగు విశ్వవిద్యాలయాన్ని, రాష్ట్ర విభజన అనంతరం ఇప్పుడు రాజమహేంద్రవరంలో ఏర్పాటు చేస్తున్నామని ప్రకటించారు.
Also Read: Bhatti vikramarka: ఆ పార్టీ నేతలు భయపడి సభను వదిలి వెళ్లారు
సాంకేతికతతో భాషకు రక్షణ
టెక్నాలజీ వల్ల మాతృభాష కనుమరుగవుతుందనే ఆందోళన అవసరం లేదని, నిజానికి సాంకేతికతతోనే భాషను సులువుగా కాపాడుకోవచ్చని ముఖ్యమంత్రి స్పష్టం చేశారు. ప్రస్తుతం అందుబాటులోకి వచ్చిన కొత్త యాప్ల ద్వారా తెలుగులో మాట్లాడితే తెలుగులోనే సమాధానం వస్తుందని, టైపింగ్ తెలియని వారు కూడా టెక్నాలజీ సాయంతో భాషను వాడుకునే వెసులుబాటు ఉందని ఆయన వివరించారు. ఆంగ్లం అవసరమే అయినప్పటికీ, మాతృభాషను విస్మరిస్తే మన ఉనికిని కోల్పోయినట్లేనని ఆయన హెచ్చరించారు.
నదీ జలాలు, రాష్ట్రాల మధ్య సామరస్యం
నదీ జలాల వివాదాలపై స్పందిస్తూ, తెలుగు రాష్ట్రాల మధ్య విద్వేషాలు కాకుండా సామరస్యపూర్వక పరిష్కారాలు ఉండాలని చంద్రబాబు ఆకాంక్షించారు. ఉమ్మడి రాష్ట్రంలో ఎన్నో ప్రాజెక్టులకు శ్రీకారం చుట్టామని, తెలంగాణ వాసులు గోదావరి నీటిని వాడుకుంటున్నప్పుడు తాము ఎప్పుడూ అభ్యంతరం చెప్పలేదని గుర్తుచేశారు. కాళేశ్వరం ప్రాజెక్టు కడుతున్నప్పుడు కూడా అడ్డుపడలేదని, కృష్ణా డెల్టా అభివృద్ధి చేస్తున్నప్పుడే తెలంగాణకు నీళ్లు ఇచ్చామని ఆయన పేర్కొన్నారు. భవిష్యత్తులో గోదావరి-పెన్నా నదుల అనుసంధానం జరగాలని, గంగా-కావేరి నదులు కలిసి దేశంలో నీటి కష్టాలు తీరాలన్నదే తన కోరిక అని చెప్పారు.
ఈ కార్యక్రమంలో భాగంగా తెలుగు భాషాభివృద్ధికి కృషి చేసిన ప్రముఖులకు ‘పూర్ణకుంభ’ వంటి పురస్కారాలను అందజేసి సత్కరించారు. ఆంధ్ర సారస్వత పరిషత్ 1949లో హైదరాబాద్లో ప్రారంభమై, 2017లో పునరుత్తేజం పొంది, నేడు ఈ స్థాయిలో మహాసభలు నిర్వహించడం పట్ల ముఖ్యమంత్రి హర్షం వ్యక్తం చేశారు.