CM Chandrababu: బంగాళాఖాతంలో ఏర్పడిన తీవ్ర అల్పపీడనం కారణంగా ఆంధ్రప్రదేశ్‌లోని పలు ప్రాంతాల్లో భారీ వర్షాలు కురుస్తున్న నేపథ్యంలో, ముఖ్యమంత్రి ఎన్. చంద్రబాబు నాయుడు విదేశీ పర్యటనలో ఉండి కూడా పరిస్థితిని పర్యవేక్షించారు. ప్రస్తుతం దుబాయ్ పర్యటనలో ఉన్న సీఎం, రాష్ట్రంలోని ఉన్నతాధికారులతో, మంత్రులతో, అలాగే ప్రభుత్వ ప్రధాన కార్యదర్శి (సీఎస్), రియల్ టైమ్ గవర్నెన్స్ (ఆర్‌టిజి) అధికారులతో వీడియో కాన్ఫరెన్స్ ద్వారా అత్యవసర సమీక్ష నిర్వహించారు.
ప్రమాదకర ప్రాంతాలపై ప్రత్యేక దృష్టి: నెల్లూరు, ప్రకాశం, బాపట్ల, కడప, తిరుపతి జిల్లాల్లోని వర్ష ప్రభావిత ప్రాంతాల పరిస్థితిని సీఎం అడిగి తెలుసుకున్నారు. ముఖ్యంగా ప్రాణ నష్టం, ఆస్తి నష్టం జరగకుండా అధికారులు ముందస్తు జాగ్రత్తలు తీసుకోవాలని, ఈ విషయంలో ఏమాత్రం అలసత్వం వహించవద్దని ఆయన స్పష్టం చేశారు.
సీఎం ఇచ్చిన ముఖ్య ఆదేశాలు:
సురక్షిత ప్రాంతాలకు తరలింపు: లోతట్టు ప్రాంతాల్లో నివసిస్తున్న ప్రజలను వెంటనే సురక్షిత శిబిరాలకు తరలించాలి.
ఎన్డీఆర్‌ఎఫ్ బృందాలు: ఎన్డీఆర్‌ఎఫ్, ఎస్డీఆర్‌ఎఫ్ బృందాలను వర్ష ప్రభావిత ప్రాంతాలకు పంపి, సహాయక చర్యలు చేపట్టాలి.
గండ్లు పడకుండా: చెరువులు, కాలువల గట్లకు గండ్లు పడకుండా ఎప్పటికప్పుడు పటిష్టం చేయాలి. ఇరిగేషన్ అధికారులు ప్రత్యేక శ్రద్ధ వహించాలి.
సమష్టిగా పనిచేయాలి: రెవెన్యూ, విపత్తుల నిర్వహణ, పోలీస్, ఇరిగేషన్, మున్సిపల్, ఆర్ అండ్ బి, విద్యుత్ శాఖల అధికారులు సమన్వయంతో పనిచేయాలని సీఎం సూచించారు.
వైద్య శిబిరాల ఏర్పాటు: అంటువ్యాధులు ప్రబలకుండా నివారించేందుకు తక్షణమే వైద్య శిబిరాలను ఏర్పాటు చేయాలని ఆదేశించారు.
దక్షిణ కోస్తాంధ్ర, రాయలసీమ జిల్లాలలో ఇప్పటికే కంట్రోల్ రూమ్‌లను ఏర్పాటు చేసినట్టు అధికారులు సీఎంకు వివరించారు. హోంమంత్రితో మాట్లాడిన సీఎం, యంత్రాంగం నిరంతరం అప్రమత్తంగా ఉండేలా చూడాలని సూచించారు. ప్రజలకు ఎటువంటి ఇబ్బందులు కలగకుండా తక్షణ చర్యలు తీసుకోవాలని ఆయన ఆదేశించారు.