CM Chandrababu: ఆంధ్రప్రదేశ్ రాష్ట్ర ప్రజలందరికీ ముఖ్యమంత్రి నారా చంద్రబాబు నాయుడు ఆంగ్ల నూతన సంవత్సర శుభాకాంక్షలు తెలియజేశారు. 2026వ సంవత్సరంలోకి అడుగుపెడుతున్న శుభవేళ, రాష్ట్ర ప్రజలందరూ సుఖసంతోషాలతో, ఆయురారోగ్యాలతో వర్ధిల్లాలని ఆయన ఆకాంక్షించారు. ఈ సందర్భంగా సామాజిక మాధ్యమం ‘ఎక్స్’ వేదికగా స్పందించిన ఆయన, గడిచిన 2025 సంవత్సరం రాష్ట్ర చరిత్రలో ఒక సాధారణ సంవత్సరం కాదని, అది గత ప్రభుత్వ విధ్వంసం నుండి రాష్ట్రాన్ని ప్రగతి పథంలోకి నడిపించిన గొప్ప మలుపు అని అభివర్ణించారు. కూటమి ప్రభుత్వ పాలనలో ఎన్నో సవాళ్లు, సమస్యలు ఎదురైనప్పటికీ, వాటన్నింటినీ అధిగమించి అభివృద్ధి, సంక్షేమ రంగాల్లో గణనీయమైన పురోగతి సాధించామని ఆయన గుర్తుచేశారు.
గత ఏడాది కాలంలో ప్రభుత్వం ఎన్నో కీలక మైలురాళ్లను అధిగమించిందని ముఖ్యమంత్రి వెల్లడించారు. ముఖ్యంగా నిరుపేదల సంక్షేమానికి పెద్దపీట వేస్తూ అమలు చేసిన పలు పథకాలు సత్ఫలితాలను ఇచ్చాయని, సుపరిపాలన ద్వారా ప్రజల జీవితాల్లో సానుకూల మార్పులు తీసుకురాగలిగామని పేర్కొన్నారు. ఏ రంగంలో చూసినా 2025లో చేపట్టిన అభివృద్ధి పనులు రాష్ట్రాన్ని వికాసం వైపు నడిపించాయని, అనేక కొత్త ప్రాజెక్టులకు ఈ ఏడాది గట్టి పునాది వేసిందని ఆయన వివరించారు. ఇదే స్ఫూర్తితో 2026లో మరింత వేగంగా ముందుకు సాగాల్సిన అవసరం ఉందని ముఖ్యమంత్రి అభిప్రాయపడ్డారు.
Also Read: Bandi Sanjay: తెలంగాణే టార్గెట్.. బీజేపీ నెక్స్ట్ ప్లాన్ ఇదే!
రానున్న ఏడాదిలో ప్రజలకు “రెట్టింపు సంతోషం, రెట్టింపు సంక్షేమం, రెట్టింపు అభివృద్ధి” అందించడమే తన ప్రధాన లక్ష్యమని చంద్రబాబు నాయుడు భరోసా ఇచ్చారు. “హెల్తీ, వెల్తీ, హ్యాపీ ఏపీ” (ఆరోగ్యకరమైన, సంపన్నమైన, ఆనందకరమైన ఆంధ్రప్రదేశ్) నినాదంతో రాష్ట్రాన్ని దేశంలోనే అగ్రగామిగా నిలిపేందుకు మరిన్ని విప్లవాత్మక అడుగులు వేయనున్నట్లు ఆయన తెలిపారు. ప్రజల ఆశలు, ఆకాంక్షలు నెరవేర్చే దిశగా ప్రభుత్వం అహర్నిశలు కృషి చేస్తుందని, ఈ నూతన సంవత్సరం ప్రతి ఒక్కరి ఇంట్లో కొత్త కాంతులు నింపాలని మనసారా కోరుకుంటున్నట్లు సీఎం తన సందేశంలో పేర్కొన్నారు.