CM Chandrababu: భయంకరమైన ‘మొంథా’ తుఫాన్ ప్రభావిత ప్రాంతాల్లో ఆంధ్రప్రదేశ్ ముఖ్యమంత్రి శ్రీ నారా చంద్రబాబు నాయుడు గారు నేడు పర్యటనకు బయలుదేరారు. తుఫాన్ కారణంగా సర్వం కోల్పోయి, పునరావాస కేంద్రాలలో తలదాచుకుంటున్న బాధితులకు ఊరటనిచ్చేలా ప్రభుత్వం తక్షణమే ఆర్థిక సహాయాన్ని ప్రకటించింది.
బాధితులకు తక్షణ ఆర్థిక సాయం
రాష్ట్రంలో భీకరమైన ‘మొంథా’ తుఫాన్ సృష్టించిన బీభత్సంతో ఇళ్లు వదిలి పునరావాస కేంద్రాలకు చేరుకున్న ప్రతి కుటుంబానికి ₹3,000 చొప్పున ఆర్థిక సహాయం అందించాలని ప్రభుత్వం నిర్ణయం తీసుకుంది. ప్రత్యేకించి పునరావాస కేంద్రాల నుంచి బాధితులు తమ ఇళ్లకు తిరిగి వెళ్లే ముందు ఈ ‘మొంథా సైక్లోన్ స్పెషల్ స్కేల్ ఆఫ్ అసిస్టెన్స్’ ను అందించాలని సీఎం చంద్రబాబు అధికారులకు స్పష్టమైన ఆదేశాలు జారీ చేశారు. కుటుంబంలో ఎంత మంది ఉన్నా, గరిష్టంగా ₹3,000 మాత్రమే ఇవ్వాలని ప్రభుత్వం ఉత్తర్వులు జారీ చేసింది. ఒంటరి వ్యక్తులకు (బాధితుడికి) ₹1,000 చొప్పున సహాయం అందుతుంది. ఈ మేరకు స్పెషల్ సీఎస్ సాయి ప్రసాద్ గారు అధికారికంగా ఉత్తర్వులు జారీ చేశారు.
సీఎం ఏరియల్ సర్వే, సహాయక చర్యలపై సమీక్ష
మొంథా తుఫాన్ వలన నష్టపోయిన ప్రాంతాలను స్వయంగా పరిశీలించేందుకు ముఖ్యమంత్రి చంద్రబాబు నాయుడు గారు నేడు పర్యటనను ప్రారంభించారు. ఆయన హెలికాప్టర్ ద్వారా బాపట్ల, పల్నాడు, కృష్ణా, కోనసీమ, ఏలూరు జిల్లాలలో ఏరియల్ విజిట్ చేయనున్నారు. చిలకలూరిపేట, పర్చూరు, చీరాల, కోడూరు, నాగాయలంక మీదుగా ఓడలరేవు వరకు ఈ ఏరియల్ విజిట్ కొనసాగుతుంది. కోనసీమ జిల్లా అల్లవరం మండలం ఓడలరేవులో ల్యాండ్ అయిన అనంతరం, రోడ్డు మార్గంలో ప్రయాణించి, వర్షాలకు నీట మునిగిన పంట పొలాలను పరిశీలించి, రైతులను పరామర్శించనున్నారు.
Also Read: Pawan Kalyan: తుఫాను బాధితులకు భరోసా.. డిప్యూటీ సీఎం పవన్ కళ్యాణ్ కీలక ప్రకటన!
మొంథా తుఫాన్ ప్రభావంతో రాష్ట్రంలో ఎడతెరిపి లేకుండా కురుస్తున్న భారీ వర్షాలు మరియు బలమైన గాలులు కారణంగా జనజీవనం పూర్తిగా స్తంభించింది. అనేక ప్రాంతాలలో వాగులు, కాలువలు, నదులు పొంగిపొర్లుతున్నాయి. గాలుల ధాటికి చెట్లు, విద్యుత్ స్తంభాలు నేలకొరగడంతో రాకపోకలు నిలిచిపోయి, విద్యుత్ సరఫరాకు తీవ్ర అంతరాయం కలిగింది.
ముందస్తు చర్యల్లో భాగంగా, అధికారులు తుఫాన్ ముప్పు ఉన్న ప్రాంతాల ప్రజలను సురక్షితంగా పునరావాస కేంద్రాలకు తరలించారు. ఈ కేంద్రాల ప్రజలకు బియ్యంతో పాటు తక్షణమే నిత్యావసర సరకులు పంపిణీ చేయాలని ముఖ్యమంత్రి అధికారులను ఆదేశించారు.
నష్ట నివారణపై సీఎం ప్రశంస
తుఫాన్ నష్టం అంచనాలను త్వరగా పూర్తి చేసి కేంద్రానికి నివేదిక పంపాలని సీఎం చంద్రబాబు, కలెక్టర్లు, మంత్రులు, అధికారులతో నిర్వహించిన టెలీకాన్ఫరెన్స్‌లో సూచించారు. ఈ సందర్భంగా ఆయన సహాయక చర్యల్లో పాలుపంచుకున్న ప్రతి ఒక్కరినీ అభినందించారు.
“సీఎం నుంచి సచివాలయం సిబ్బంది వరకు అందరం ఒక బృందంగా (టీమ్‌గా) సమర్థంగా వ్యవహరించడం వల్లే చాలా వరకు నష్టాన్ని నివారించగలిగాం. ఎస్డీఆర్‌ఎఫ్‌, పోలీసులు, అగ్నిమాపక సిబ్బంది అద్భుతంగా పనిచేశారు. మున్సిపాలిటీల్లో డ్రెయిన్లను ముందుగానే శుభ్రం చేయడం వల్ల ముంపును నివారించగలిగాం. దెబ్బతిన్న విద్యుత్ వ్యవస్థ పునరుద్ధరణ కోసం 10 వేల మంది సిబ్బందిని అందుబాటులో ఉంచాం, ఇవాళ మధ్యాహ్నానికి సాధారణ స్థితి ఏర్పడుతుంది. కష్టకాలంలో ప్రభుత్వం ప్రజలకు అందుబాటులో ఉండడం వల్లే ప్రజలకు ప్రభుత్వంపై భరోసా పెరిగింది.” – ముఖ్యమంత్రి చంద్రబాబు నాయుడు
తుఫాన్ కారణంగా ఇద్దరు వ్యక్తులు మరణించినట్లు ఆయన తెలిపారు. మంత్రులు, అధికారులు ప్రభావిత ప్రాంతాల్లో పర్యటించి, ప్రభుత్వం అందిస్తున్న సాయాన్ని వివరిస్తూ, ప్రజల సమస్యలను అడిగి తెలుసుకోవాలని సూచించారు.