Cm chandrababu: ఆంధ్రప్రదేశ్‌ను పారిశ్రామిక రంగంలో అగ్రగామిగా మార్చేందుకు ప్రభుత్వం కట్టుబడి ఉందని ముఖ్యమంత్రి నారా చంద్రబాబు నాయుడు తెలిపారు. రాష్ట్రంలో పెట్టుబడులకు అనుకూల వాతావరణం కల్పించి, పారిశ్రామికవేత్తలకు ఎర్రగడ్డపైనే స్వాగతం పలుకుతామని ఆయన స్పష్టం చేశారు. ఢిల్లీలో జరిగిన సీఐఐ (కాన్ఫెడరేషన్ ఆఫ్ ఇండియన్ ఇండస్ట్రీ) వార్షిక సదస్సులో పాల్గొన్న సీఎం, రాష్ట్ర పారిశ్రామిక విధానాల గురించి వివరించారు.
‘‘ఇప్పుడే సరైన సమయం’’ – సీఎం హామీ
ఈ సందర్భంలో చంద్రబాబు మాట్లాడుతూ, ‘‘పెట్టుబడుల కోసం ఆంధ్రప్రదేశ్‌కి ఇదే సరైన సమయం. పారిశ్రామికవేత్తలకు అవసరమైన అనుమతులు వేగంగా మంజూరు చేస్తాం. ఈజ్ ఆఫ్ డూయింగ్ బిజినెస్‌కి మరో మెట్టు – స్పీడ్ ఆఫ్ డూయింగ్ బిజినెస్‌తో ముందుకు వెళ్తాం’’ అని చెప్పారు. పరిశ్రమల వృద్ధే రాష్ట్ర సంపదకు, సంక్షేమానికి ఆధారం అవుతుందని పేర్కొన్నారు.
అమరావతిలో ‘‘క్వాంటం వ్యాలీ’’ – విశాఖలో టీసీఎస్, గూగుల్
భవిష్యత్తు ప్రాజెక్టుల వివరాలు వెల్లడించిన చంద్రబాబు, దేశంలో తొలిసారి అమరావతిలో ‘‘క్వాంటం వ్యాలీ’’ స్థాపన జరుగుతుందని చెప్పారు. ఇది సాంకేతిక రంగంలో విప్లవాత్మక మార్పులకు దారితీయనుంది. విశాఖపట్నంలో టీసీఎస్ కార్యకలాపాలు ప్రారంభం కానున్నాయని, ఆర్సెలార్ మిట్టల్ పరిశ్రమ ప్రారంభ దశలో ఉందని తెలిపారు. గూగుల్ వంటి టెక్ దిగ్గజం కూడా విశాఖకు రానుందని చెప్పారు. ఈ ప్రాజెక్టులు లక్షలాది ఉద్యోగాలు సృష్టిస్తాయని విశ్వాసం వ్యక్తం చేశారు.
గ్రీన్ ఎనర్జీలో ఏపీ ముందే!
ఆంధ్రప్రదేశ్ గ్రీన్ ఎనర్జీ రంగంలో ముందంజలో ఉందని సీఎం తెలిపారు. సోలార్, విండ్, పంప్డ్ స్టోరేజ్ రంగాల్లో రాష్ట్రం పెద్దస్థాయిలో పెట్టుబడులను ఆకర్షిస్తోంది. గత ఏడాది కాలంలో రూ.5 లక్షల కోట్ల విలువైన ప్రాజెక్టులకు ప్రతిపాదనలు వచ్చాయని, వీటితో 4.5 లక్షల ఉద్యోగాలు లభిస్తాయని పేర్కొన్నారు. గ్రీన్ హైడ్రోజన్, గ్రీన్ అమెానియా ఉత్పత్తిలో ఏపీని గ్లోబల్ హబ్‌గా తీర్చిదిద్దే లక్ష్యముందని చెప్పారు.
175 పారిశ్రామిక పార్కులు – ప్రతినియోజకవర్గానికి ఒక్కటి
ప్రతి నియోజకవర్గంలో ఒక పారిశ్రామిక పార్కును ఏర్పాటు చేయాలనే లక్ష్యంతో ముందుకెళ్తున్నామని చంద్రబాబు తెలిపారు. మైనింగ్, టూరిజం రంగాల్లోనూ పెట్టుబడులకు అనేక అవకాశాలు ఉన్నాయని, రతన్ టాటా సహకారంతో ఇన్నోవేషన్ హబ్ కూడా ఏర్పాటవుతుందని చెప్పారు. ప్రతి ఇంట్లోనూ ఓ పారిశ్రామికవేత్త రావాలన్నదే తన ఆశయమని తెలిపారు.
మోదీ నాయకత్వం దేశానికి బలం
ఈ సందర్భంగా ప్రధాని మోదీ నాయకత్వాన్ని ప్రశంసించిన చంద్రబాబు – ‘‘ఈ సమయానికి మోదీ లాంటి నేత దేశానికి దిశానిర్దేశం చేయడం గొప్ప అదృష్టం. గతంలో పీవీ నరసింహారావు చేపట్టిన ఆర్థిక సంస్కరణలు దేశాన్ని కొత్త దిశగా నడిపించాయి. నేను కూడా తొలితరం ఐటీ విప్లవ నాయకుడిని,’’ అని గుర్తుచేశారు.