Cloudburst: జమ్మూ కాశ్మీర్‌లోని కథువా జిల్లాలో క్లౌడ్‌బరస్ట్ భయంకర పరిస్థితి సృష్టించింది. శనివారం రాత్రి నుంచి ఆదివారం తెల్లవారుజామున కురిసిన కుండపోత వర్షం కారణంగా అకస్మాత్తుగా వరదలు, కొండచరియలు విరిగిపడటంతో ఏడుగురు ప్రాణాలు కోల్పోగా, ఆరుగురు తీవ్రంగా గాయపడ్డారు. మృతులలో ఐదుగురు చిన్నారులే ఉండటంతో ఆ ప్రాంతమంతా విషాద ఛాయలు అలుముకున్నాయి.
ఘటన వివరాలు
కథువా జిల్లాలోని రాజ్‌బాగ్ మండలం – జోధ్ ఘాటిలో తెల్లవారుజామున 3.30 నుంచి 4 గంటల మధ్య ఆకస్మిక వరదలు, కొండచరియలు విరిగిపడ్డాయి. గ్రామానికి వెళ్లే మార్గాలు పూర్తిగా తెగిపోవడంతో రాకపోకలు నిలిచిపోయాయి. అనేక ఇళ్లు శిథిలమైపోయాయి. మొదట నలుగురు మృతిచెందినట్లు సమాచారం వచ్చినా, అనంతరం శిథిలాల నుంచి మరో ముగ్గురి మృతదేహాలు వెలికితీయడంతో మృతుల సంఖ్య ఏడుకి పెరిగింది.
మృతులలో జాంగ్లోట్ ప్రాంతానికి చెందిన రేణు దేవి (39), ఆమె కుమార్తె రాధిక (9) ఉన్నారు. జోధ్ ఘాటికి చెందిన సుర్ము దిన్ (30), అతని కుమారులు ఫాను (6), షేడు (5), తహు (2), జుల్ఫాన్ (15) మరణించారు.
రక్షణ చర్యలు
పోలీసులు, SDRF బృందాలు స్థానికులతో కలిసి సహాయక చర్యల్లో పాల్గొంటున్నాయి. గాయపడిన ఆరుగురిని హెలికాప్టర్ ద్వారా పొరుగున ఉన్న పంజాబ్‌లోని పఠాన్‌కోట్ మామూన్ సైనిక ఆసుపత్రికి తరలించారు.
SSP శోభిత్ సక్సేనా మాట్లాడుతూ – ఇది నిజమైన క్లౌడ్‌బరస్టేనా అన్నది తేలాల్సి ఉన్నప్పటికీ, ఆకస్మిక వరదలు, కొండచరియలు విరిగిపడటం పెద్ద ఎత్తున నష్టం కలిగించిందని తెలిపారు.
ఇది కూడా చదవండి: Krushna Rever: కృష్ణా న‌ది వరద ప్ర‌వాహం.. నాగార్జున సాగ‌ర్‌ 22 గేట్లెత్తి దిగువ‌కు నీటి విడుద‌ల
ప్రభావిత ప్రాంతాలు
-
పారిశ్రామిక ప్రాంతం, జాంగ్లోట్ పోలీస్ స్టేషన్, కేంద్ర విద్యాలయ క్యాంపస్ వరకు వరద నీరు చేరింది.
-
రైల్వే ట్రాక్‌లు, జాతీయ రహదారులు దెబ్బతిన్నాయి.
-
కథువా పోలీస్ స్టేషన్ ప్రాంగణం వరద నీటితో మునిగిపోయింది.
-
బగార్డ్, చాంగ్డా, దిల్వాన్, హుట్లి గ్రామాల్లో కూడా కొండచరియలు విరిగినా, అదృష్టవశాత్తూ పెద్ద నష్టం జరగలేదని అధికారులు తెలిపారు.
అధికారుల స్పందన
-
కేంద్ర మంత్రి జితేంద్ర సింగ్ కథువా SSPతో మాట్లాడి పరిస్థితిని సమీక్షించారు. “స్థానిక పరిపాలన, సైన్యం, పారామిలిటరీ దళాలు వెంటనే చర్యలు ప్రారంభించాయి. పరిస్థితిని నిరంతరం పర్యవేక్షిస్తున్నాం” అని X వేదికగా తెలిపారు.
-
ముఖ్యమంత్రి ఒమర్ అబ్దుల్లా మృతుల కుటుంబాలకు సానుభూతి తెలుపుతూ, గాయపడినవారు త్వరగా కోలుకోవాలని ఆకాంక్షించారు.
-
లెఫ్టినెంట్ గవర్నర్ మనోజ్ సిన్హా కూడా తీవ్ర విచారం వ్యక్తం చేస్తూ, హోంమంత్రి అమిత్ షాకు పరిస్థితిని వివరించారు.
-
హోంమంత్రి అమిత్ షా సహాయక చర్యలకు పూర్తి మద్దతు ఇస్తామని భరోసా ఇచ్చారు.
గతంలోనూ ఇలాగే…
ఇటీవలే జమ్మూ కాశ్మీర్‌లోని కిష్త్వార్ జిల్లా – చసోటి గ్రామం వద్ద మచైల్ మాత యాత్ర మార్గంలో క్లౌడ్‌బరస్ట్ కారణంగా 60 మంది యాత్రికులు ప్రాణాలు కోల్పోయిన ఘటన జరిగింది. ఆ సంఘటన ఇంకా మర్చిపోకముందే కథువా విషాదం సంభవించింది.