Chiranjeevi: ప్రముఖ సినీ నటుడు, మెగాస్టార్ చిరంజీవి (Chiranjeevi) తన పేరు, ఫొటో, వాయిస్ మరియు ఇతర గుర్తింపు చిహ్నాల దుర్వినియోగంపై పోరాటం గెలిచారు. తన వ్యక్తిత్వ హక్కులను కాపాడుకోవాలని కోరుతూ ఆయన దాఖలు చేసిన పిటిషన్‌పై హైదరాబాద్ సిటీ సివిల్ కోర్టు (Hyderabad City Civil Court) మధ్యంతర ఉత్తర్వులు జారీ చేసింది.
కోర్టు తీర్పు ప్రకారం, చిరంజీవి పేరు, ఫొటోలు, వాయిస్, చిత్రాలను అనుమతి లేకుండా ఎవరూ వాణిజ్య ప్రయోజనాల కోసం వినియోగించకూడదు.
చిరంజీవికి అనుకూలంగా కోర్టు ఆదేశాలు
సిటీ సివిల్ కోర్టు ఇచ్చిన తీర్పు మెగాస్టార్ అభిమానులకు, న్యాయపోరాటం చేస్తున్న ఇతర సినీ ప్రముఖులకు ఊరటనిచ్చింది.
- వాణిజ్య ప్రయోజనాలకు ఆంక్షలు: ఏ వ్యక్తి లేదా సంస్థ అయినా చిరంజీవి వ్యక్తిత్వ, ప్రచార హక్కులను ఉల్లంఘించే విధంగా, ఆయన పేరును, ఫోటోలు, వాయిస్‌ను అనుమతి లేకుండా వాణిజ్య ప్రయోజనాల కోసం వినియోగించరాదు.
- మారుపేర్లపైనా ఆంక్షలు: ‘మెగాస్టార్’, ‘చిరు’, ‘అన్నయ్య’ వంటి ఆయన మారుపేర్లను కూడా వాణిజ్య అవసరాలకు వాడకూడదు.
- AI మార్ఫింగ్‌పై నిషేధం: ఆర్టిఫిషియల్ ఇంటెలిజెన్స్ (AI) మార్ఫింగ్ సహా డిజిటల్ వేదికలపై ఆయన రూపం లేదా వాయిస్‌ను మార్ఫింగ్ చేయడంపై కోర్టు ఆంక్షలు విధించింది.
- చర్యలకు ఆదేశం: టీఆర్‌పీ, లాభాల కోసం చిరంజీవి పేరును దుర్వినియోగం చేస్తే వారిపై కఠిన చర్యలు తీసుకోవాలని కోర్టు ఆదేశించింది.
- నోటీసులు జారీ: చిరంజీవి పేరు, ఫొటోలు దుర్వినియోగం చేసిన 30 మందికి సిటీ సివిల్ కోర్టు నోటీసులు జారీ చేసింది. తదుపరి విచారణను అక్టోబర్ 27కి వాయిదా వేసింది.
ఇది కూడా చదవండి: Amitabh Bachchan: బిగ్‌ బి అమితాబ్‌ బ్లాగ్‌లో చేసిన వ్యాఖ్యలతో ఫ్యాన్స్‌లో ఆందోళన
సీపీని కలిసిన చిరంజీవి
ఈ నెల 11వ తేదీన చిరంజీవి హైదరాబాద్ సీపీ వి.సి సజ్జనార్‌ను వ్యక్తిగతంగా కలిసి, కోర్టు ఉత్తర్వుల ప్రతిని అందజేశారు. ఇటువంటి ఉల్లంఘనలను అరికట్టడానికి శిక్షా చట్టాలు మరింత కఠినంగా ఉండాల్సిన అవసరంపై ఇరువురూ సవివరంగా చర్చించుకున్నారు.
పెరుగుతున్న ఏఐ ప్రభావం – నటుల పోరాటం
ఇటీవల కాలంలో డీప్ ఫేక్ టెక్నాలజీ (AI) ప్రభావంతో కోర్టులను ఆశ్రయిస్తున్న నటుల సంఖ్య పెరుగుతోంది. గతంలో నాగార్జున ఢిల్లీ హైకోర్టును ఆశ్రయించి సానుకూల తీర్పు పొందారు. అదే బాటలో అమితాబచ్చన్, అక్షయ్ కుమార్, అభిషేక్ బచ్చన్, ఐశ్వర్యరాయ్, హృతిక్ రోషన్, కరణ్ జోహార్, ఆశా భోస్లే, రజనీకాంత్‌ వంటి దిగ్గజాలు కూడా తమ వ్యక్తిత్వ హక్కులను కాపాడాలని కోరుతూ న్యాయస్థానాలను ఆశ్రయించారు. చిరంజీవికి అనుకూలంగా వచ్చిన ఈ తీర్పు ఇతర ప్రముఖులకు కూడా ఉపశమనం కలిగించే అంశంగా మారింది.