Road Accident: రంగారెడ్డి జిల్లా, చేవెళ్ల మండలం మీర్జాగూడ వద్ద తాండూరు డిపోకు చెందిన ఆర్టీసీ బస్సును కంకర లారీ ఢీకొట్టిన ఘోర ప్రమాదంపై ముఖ్యమంత్రి ఎ. రేవంత్ రెడ్డి తీవ్ర దిగ్భ్రాంతి వ్యక్తం చేశారు. ఈ దుర్ఘటనలో బస్సు, లారీ డ్రైవర్లు సహా 20 మంది మృతి చెందడం, మరియు పలువురు ప్రయాణికులు గాయపడటంపై ఆయన ప్రగాఢ విచారం వ్యక్తం చేశారు. ముగ్గురి పరిస్థితి విషమంగా ఉందని తెలుస్తోంది. ప్రమాదం జరిగిన వెంటనే, అధికారులు తక్షణం ఘటనా స్థలికి వెళ్లి సహాయక చర్యలను ముమ్మరం చేయాలని జిల్లా కలెక్టర్‌ను ముఖ్యమంత్రి ఆదేశించారు.
క్షతగాత్రులకు మెరుగైన వైద్యంపై ఆదేశాలు
ప్రమాద వివరాలను ఎప్పటికప్పుడు తనకు తెలియజేయాలని సీఎం రేవంత్ రెడ్డి జిల్లా అధికారులకు సూచించారు. గాయపడిన ప్రయాణికులను ఆలస్యం చేయకుండా వెంటనే హైదరాబాద్‌కు తరలించి, వారికి మెరుగైన వైద్యం అందించాలని ప్రభుత్వ ప్రధాన కార్యదర్శి (సీఎస్) మరియు డీజీపీకి కీలక ఆదేశాలిచ్చారు. అంతేకాకుండా, అందుబాటులో ఉన్న మంత్రులు వెంటనే ఘటనాస్థలికి వెళ్లి సహాయక చర్యలను పర్యవేక్షించాలని ముఖ్యమంత్రి కోరారు. ప్రయాణికుల ఆర్తనాదాలతో అక్కడ హృదయ విదారక వాతావరణం నెలకొందని అధికారులు సీఎంకు వివరించారు.
Also Read: Road Accident: రంగారెడ్డి జిల్లాలో ఘోర రోడ్డు ప్రమాదం.. 20 మంది మృతి
మంత్రి పొన్నం ప్రభాకర్ స్పందన
ఈ రోడ్డు ప్రమాదంపై రవాణా శాఖ మంత్రి పొన్నం ప్రభాకర్ కూడా తీవ్ర దిగ్భ్రాంతి వ్యక్తం చేశారు. ఆయన వెంటనే ఆర్టీసీ ఎండీ నాగిరెడ్డితో ఫోన్‌లో మాట్లాడి, ఆర్టీసీ అధికారులు హుటాహుటిన ఘటనా స్థలికి వెళ్లాలని ఆదేశించారు. టిప్పర్ రాంగ్ రూట్‌లో వచ్చి బస్సును ఢీకొట్టడం వల్లే ఈ ఘోరం జరిగిందని అధికారులు మంత్రికి వివరించారు. క్షతగాత్రులకు అన్ని రకాల వైద్య సదుపాయాలు అందేలా చూడాలని మంత్రి ఆదేశించారు.
ఏపీ డిప్యూటీ సీఎం పవన్ కల్యాణ్ సంతాపం
ఆంధ్రప్రదేశ్ ఉప ముఖ్యమంత్రి పవన్ కల్యాణ్ సైతం ఈ దుర్ఘటనపై దిగ్భ్రాంతిని వ్యక్తం చేశారు. మృతి చెందిన వారి కుటుంబాలకు తన ప్రగాఢ సానుభూతిని తెలియజేస్తూ, గాయపడిన వారికి మెరుగైన వైద్యం అందించాలని ఆయన తెలంగాణ ప్రభుత్వాన్ని కోరారు.