Messi Kolkata Event: అర్జెంటీనా ఫుట్బాల్ స్టార్ లియోనెల్ మెస్సీ కోల్కతా పర్యటనలో జరిగిన కార్యక్రమంలో ఏర్పడిన గందరగోళం, పశ్చిమ బెంగాల్ రాష్ట్రంలో పెద్ద వివాదాన్ని సృష్టించింది. ఈ ఘటనపై రాష్ట్ర ప్రభుత్వం దర్యాప్తు చేపట్టిన నేపథ్యంలో, క్రీడాశాఖ మంత్రి అరూప్ బిశ్వాస్ తన పదవికి రాజీనామా చేశారు. ఆయన రాజీనామాను ముఖ్యమంత్రి మమతా బెనర్జీ ఆమోదించారు.
సాధారణంగా కొన్ని నిమిషాలపాటు మైదానంలో ఉండాల్సిన మెస్సీ త్వరగా వెళ్ళిపోవడంతో, ప్రేక్షకులు ఆగ్రహానికి గురై సీసాలు, ప్లాస్టిక్ కుర్చీలు మైదానంలోకి విసిరారు. కొంత మంది మైదానంలోకి దూసుకెళ్లి బారికేడ్లను తోసుకుంటూ దాడి చేశారు. ఈ ఘటనలో మంత్రి అరూప్ బిశ్వాస్, ఈవెంట్ నిర్వాహకుడు శతద్రు దత్తాను అరెస్ట్ చేయాలని నినాదాలు వెల్లువెత్తాయి.
Also Read: Rammohan Naidu: భోగాపురం అంతర్జాతీయ ఎయిర్పోర్ట్ త్వరలో ప్రారంభం : రామ్మోహన్నాయుడు
ఈ ఘటనపై విచారణ కోసం బెంగాల్ ప్రభుత్వం ఇప్పటికే కమిటీని ఏర్పాటు చేసింది. విచారణ కమిటీ సూచనల మేరకు, డీజీపీ రాజీవ్ కుమార్, బిధన్నగర్ పోలీస్ కమిషనర్ ముఖేష్ కుమార్, యువజన, క్రీడాశాఖ ప్రిన్సిపల్ సెక్రటరీ రాజేష్ కుమార్ సిన్హాలకు షోకాజ్ నోటీసులు జారీ చేశారు. 24 గంటల్లో వివరణ ఇవ్వాలని ఆదేశించారు. కాగా, బిధన్నగర్ డిప్యూటీ కమిషనర్ ఆఫ్ పోలీస్ అనీష్ సర్కార్ ను విధుల నుంచి సస్పెండ్ చేసి, శాఖాపరమైన చర్యలు ప్రారంభించారని అధికారులు తెలిపారు.
ఘటనా సమయంలో కోల్కతా స్టేడియంలో ఏర్పాట్ల లోపం, సరిపడా క్రౌడ్ మేనేజ్మెంట్ లేకపోవడం వంటి కారణాల వల్లే ఈ గందరగోళం చోటుచేసుకుంది. దీనిపై ముఖ్యమంత్రి మమతా బెనర్జీ ఈ రోజు క్రీడాకారులకు క్షమాపణలు తెలిపారు. కాగా, ఈ ఘటనకు ముందే ఈవెంట్ నిర్వాహకులపై పోలీసులు చర్యలు తీసుకున్నారు.