Divyang Shakti Scheme: ఆంధ్రప్రదేశ్ ప్రభుత్వం దివ్యాంగుల కోసం ఒక గొప్ప ముందడుగు వేసింది. వారి సంక్షేమం కోసం ఉద్దేశించిన ‘దివ్యాంగ శక్తి’ పథకాన్ని ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ కలిసి ఈరోజు గుంటూరు జిల్లా మంగళగిరిలో ఘనంగా ప్రారంభించనున్నారు. ఉదయం 11:30 గంటలకు మంగళగిరి బస్టాండ్ వేదికగా ఈ పథకానికి శ్రీకారం చుట్టనున్నారు. ఈ కార్యక్రమంలో మంత్రులతో పాటు ఇతర ముఖ్య నేతలు కూడా పాల్గొంటున్నారు. ఈ పథకం ద్వారా రాష్ట్రవ్యాప్తంగా ఉన్న లక్షలాది మంది దివ్యాంగులకు రవాణా సౌకర్యం మరింత సులభతరం కానుంది.
ఉచిత ప్రయాణం ఎవరికి వర్తిస్తుంది?
ఈ పథకం కింద 40 శాతం కంటే ఎక్కువ వైకల్యం ఉన్న దివ్యాంగులందరికీ ఏపీఎస్ ఆర్టీసీ బస్సుల్లో ఉచిత ప్రయాణ సౌకర్యం కల్పిస్తారు. గతంలో కేవలం 4 వర్గాల వారికి మాత్రమే ఈ వెసులుబాటు ఉండేది, కానీ ఇప్పుడు ప్రభుత్వం దీనిని ఏకంగా 21 వర్గాల దివ్యాంగులకు విస్తరించింది. దీనివల్ల గతంలో ప్రయోజనం పొందని మరెంతో మందికి ఇప్పుడు ఉచితంగా ప్రయాణించే అవకాశం దక్కుతుంది. రాష్ట్రవ్యాప్తంగా సుమారు 12.76 లక్షల మంది దీనివల్ల లాభం పొందుతారని ప్రభుత్వం అంచనా వేస్తోంది.
సహాయకులకు కూడా భారీ రాయితీ..
దివ్యాంగులతో పాటు ప్రయాణించే వారి సహాయకులకు కూడా ప్రభుత్వం ఊరటనిచ్చింది. దివ్యాంగులకు తోడుగా వచ్చే వారికి బస్సు టికెట్ ధరలో 50 శాతం రాయితీ ఇస్తారు. అంటే వారు సగం ధరకే ప్రయాణం చేయవచ్చు. దివ్యాంగుల రక్షణ మరియు సౌకర్యం కోసం ప్రభుత్వం ఈ నిర్ణయం తీసుకుంది. ఈ పథకాన్ని అమలు చేయడం వల్ల ప్రభుత్వంపై ఏడాదికి సుమారు రూ. 207 కోట్ల అదనపు భారం పడనుంది, అయినప్పటికీ దివ్యాంగుల సంక్షేమమే లక్ష్యంగా ప్రభుత్వం ముందుకు సాగుతోంది.
రాష్ట్రవ్యాప్తంగా ప్రారంభోత్సవాలు..
ముఖ్యమంత్రి చంద్రబాబు నాయుడు మంగళగిరిలో ఈ పథకాన్ని ప్రారంభించిన తర్వాత, దివ్యాంగులతో కలిసి స్వయంగా బస్సులో ప్రయాణించనున్నారు. అదే సమయంలో రాష్ట్రంలోని ప్రతి నియోజకవర్గంలో స్థానిక ఎమ్మెల్యేల ఆధ్వర్యంలో ఈ కార్యక్రమాలు జరగనున్నాయి. దివ్యాంగులు గౌరవంగా, ఆర్థిక ఇబ్బందులు లేకుండా ప్రయాణించేలా చేయడమే ఈ ‘దివ్యాంగ శక్తి’ పథకం ముఖ్య ఉద్దేశం. సమాజంలో వెనుకబడిన వారికి అండగా నిలవడంలో ఈ పథకం కీలక పాత్ర పోషిస్తుందని ప్రభుత్వం భావిస్తోంది.