Darjeeling: బెంగాల్‌లోని డార్జిలింగ్ ప్రాంతంలో భారీ వర్షాలు బీభత్సం సృష్టించాయి. కొండచరియలు ఒక్కసారిగా విరిగిపడటంతో ఘోరం జరిగింది. ఈ దుర్ఘటనలో దాదాపు 17 మంది ప్రాణాలు కోల్పోయినట్లు సమాచారం.
డార్జిలింగ్: పశ్చిమ బెంగాల్ రాష్ట్రంలో విషాదం చోటుచేసుకుంది. కొద్ది రోజులుగా కురుస్తున్న భారీ వర్షాల కారణంగా డార్జిలింగ్‌లో అనేక చోట్ల కొండచరియలు విరిగిపడ్డాయి. ఈ ఘటనలో 17 మందికి పైగా మరణించారు. శిథిలాల కింద ఇంకా ఎంతమంది చిక్కుకుపోయారో తెలియాల్సి ఉంది.
రాకపోకలు బంద్
కొండచరియలు రోడ్లపై పడటంతో డార్జిలింగ్-సిలిగురి మధ్య రాకపోకలు పూర్తిగా ఆగిపోయాయి. ఎక్కడికక్కడ వాహనాలు నిలిచిపోయాయి. సహాయక చర్యలకు కూడా తీవ్ర ఆటంకం కలుగుతోంది. కొండచరియలు విరిగిపడిన ప్రాంతాల్లో మట్టి, రాళ్లు భారీగా పేరుకుపోవడంతో, వాటిని తొలగించే పనులు వేగంగా జరుగుతున్నాయి.
సహాయక చర్యలు ముమ్మరం
స్థానిక పోలీసులు, జాతీయ విపత్తు ప్రతిస్పందన దళం (NDRF) బృందాలు వెంటనే రంగంలోకి దిగాయి. శిథిలాల కింద చిక్కుకున్న వారిని బయటకు తీసేందుకు సహాయక చర్యలు ముమ్మరం చేశారు. గాయపడిన వారిని ఆసుపత్రులకు తరలిస్తున్నారు.
వర్షాలు ఇంకా కొనసాగుతుండటంతో, కొండ ప్రాంతంలో ఉన్న ప్రజలు అత్యంత జాగ్రత్తగా ఉండాలని, అనవసర ప్రయాణాలు చేయవద్దని అధికారులు హెచ్చరికలు జారీ చేశారు. ఈ దుర్ఘటనతో డార్జిలింగ్ ప్రాంతంలో విషాద ఛాయలు అలుముకున్నాయి. మృతుల కుటుంబాలకు ప్రగాఢ సానుభూతిని తెలియజేస్తున్నారు.