Jubilee Hills By-Election: జూబ్లీహిల్స్ అసెంబ్లీ నియోజకవర్గం ఉప ఎన్నికకు సంబంధించి బీజేపీ అభ్యర్థి ఎంపికపై కసరత్తు వేగవంతమైంది. ఈ స్థానం నుంచి పార్టీ తరపున ఎవరు పోటీ చేయాలనే దానిపై బీజేపీ నాయకత్వం ఈరోజు కీలక సమావేశాన్ని నిర్వహించింది.
కమిటీ ఆధ్వర్యంలో చర్చ
పార్టీ నియమించిన త్రిసభ్య కమిటీ నేడు (మంగళవారం) బీజేపీ రాష్ట్ర కార్యాలయంలో ముఖ్య నేతలు, కార్యకర్తల అభిప్రాయాలను సేకరించింది. ఈ సమావేశంలో సీనియర్ నాయకులతో పాటు, నియోజకవర్గంలోని డివిజన్ అధ్యక్షులు, కార్పొరేటర్లు పాల్గొన్నారు. జూబ్లీహిల్స్‌లో గెలుపు గుర్రం ఎక్కగలిగే బలమైన నాయకుడు ఎవరు? స్థానికంగా ఎవరికి మంచి పట్టు ఉంది? అనే అంశాలపై కమిటీ సభ్యులు వివరంగా చర్చించి, వారి అభిప్రాయాలను తెలుసుకున్నారు.
రేసులో వీరే..
బీజేపీ అభ్యర్థిత్వం కోసం ప్రస్తుతం కొందరు ముఖ్య నాయకుల పేర్లు ప్రముఖంగా వినిపిస్తున్నాయి. వారిలో దీపక్‌రెడ్డి, కీర్తిరెడ్డి, విజయ, పద్మ వంటివారు ఉన్నారు. ఈ నలుగురిలో ఒకరిని ఎంపిక చేసేందుకు పార్టీ తీవ్రంగా ఆలోచిస్తోంది.
ఈరోజు నివేదిక.. రేపు ప్రకటన!
ఈరోజు సేకరించిన అన్ని అభిప్రాయాలను, వివరాలను క్రోడీకరించి త్రిసభ్య కమిటీ ఈ సాయంత్రం పార్టీ అధిష్ఠానానికి నివేదికను పంపనుంది. అధిష్ఠానం ఈ నివేదికను పరిశీలించిన తర్వాత, రేపు (బుధవారం) బీజేపీ తమ అభ్యర్థి పేరును అధికారికంగా ప్రకటించే అవకాశం ఉంది అని పార్టీ వర్గాలు చెబుతున్నాయి. జూబ్లీహిల్స్ ఎన్నికల బరిలో బీజేపీ తరపున నిలబడేదెవరో రేపటితో తేలిపోనుంది.