Bird Flu: ఆంధ్రప్రదేశ్‌లో తొలి బర్డ్‌ఫ్లూ (H5N1) మరణం నమోదైంది. పల్నాడు జిల్లా నరసరావుపేటలో రెండేళ్ల చిన్నారి ఈ ప్రమాదకర వైరస్ కారణంగా ప్రాణాలు కోల్పోయింది. భారత వైద్య పరిశోధన మండలి (ICMR) మరియు నేషనల్ ఇన్స్టిట్యూట్ ఆఫ్ వైరాలజీ ఈ మరణాన్ని ధృవీకరించాయి. చిన్నారి పచ్చి కోడి మాంసం తినడం, రోగ నిరోధక శక్తి తక్కువగా ఉండటం వల్ల ఈ విషయంలో ప్రభావం చూపిందని వైద్యులు తెలిపారు.
చిన్నారి చికిత్స వివరాలు
మార్చి 4న చిన్నారి జ్వరం, శ్వాస తీసుకోవడంలో ఇబ్బంది, ముక్కు కారడం, మూర్ఛ, విరేచనాలు, ఆహారం తినలేని లక్షణాలతో మంగళగిరిలోని ఎయిమ్స్‌ ఆసుపత్రికి తల్లిదండ్రులు తీసుకెళ్లారు. అక్కడ వైద్యులు ఆక్సిజన్‌ సాయంతో చికిత్స అందించినప్పటికీ, చిన్నారి ఆరోగ్యం క్షీణించిపోయింది. మార్చి 16న చిన్నారి మృతి చెందింది.
వైరస్ నిర్ధారణ ఎలా జరిగింది?
చిన్నారి మృతికి ముందు మార్చి 7న ఆమె గొంతు, ముక్కు నుంచి స్వాబ్ నమూనాలను సేకరించి పరీక్షించారు. మొదట ఇది సాధారణ ఇన్‌ఫ్లుయెంజా అనుకున్నారు. అయితే, మరింత ఖచ్చితమైన పరీక్షల కోసం మార్చి 15న ఢిల్లీలోని ల్యాబ్‌కు శాంపిల్స్ పంపించగా, బర్డ్‌ఫ్లూ అనుమానం వ్యక్తమైంది. ఐసీఎంఆర్ అప్రమత్తమై మార్చి 24న పూణెలోని నేషనల్ ఇన్స్టిట్యూట్ ఆఫ్ వైరాలజీకి నమూనాలను పంపించగా, హెచ్‌5ఎన్‌1 వైరస్‌గా నిర్ధారణ అయింది.
ఇది కూడా చదవండి: Nithyananda Swami Passed Away: స్వయం ప్రకటిత దైవం నిత్యానంద స్వామి కన్నుమూశారు?
ప్రభుత్వ చర్యలు
చిన్నారి మృతితో రాష్ట్ర వైద్యారోగ్య శాఖ అప్రమత్తమైంది. మృతిచెందిన చిన్నారి ఇంటి పరిసరాల్లో ఆరోగ్య సర్వే నిర్వహించారు. అనుమానిత లక్షణాలు ఉన్న వారెవరూ లేరని వైద్యులు నిర్ధారించారు. అదనపు జాగ్రత్తలుగా, స్థానికంగా మాంసం దుకాణాలపై పర్యవేక్షణ పెంచారు.
బర్డ్‌ఫ్లూ పై ప్రజలకు సూచనలు
బర్డ్‌ఫ్లూ వైరస్ మానవులకు సంక్రమించడమే కాకుండా, మృత్యువుకూ దారితీయగలదని వైద్యులు హెచ్చరిస్తున్నారు. ఈ నేపథ్యంలో ప్రజలు జాగ్రత్తలు పాటించాలి:
- కోడి మాంసం, గుడ్లను 100 డిగ్రీల ఉష్ణోగ్రతలో పూర్తిగా ఉడికించి తినాలి.
- జబ్బు పడిన పక్షులు, జంతువులకు దూరంగా ఉండాలి.
- చిన్న పిల్లలు, వృద్ధులు ఇలాంటి వైరస్ ప్రబలిన ప్రాంతాలకు వెళ్లకుండా చూసుకోవాలి.
- జ్వరంతో పాటు జలుబు, దగ్గు ఉన్నవారు తక్షణమే డాక్టర్‌ను సంప్రదించాలి.
- కోవిడ్‌ సమయంలో మాదిరిగా ఆక్సిజన్‌ స్థాయిలను గమనించుకోవాలి.
- పచ్చి మాంసం తినడాన్ని నివారించాలి.
ఈ చర్యలు తీసుకుంటే ప్రజలు ఆరోగ్యంగా ఉండగలరని వైద్య నిపుణులు సూచిస్తున్నారు.