Bigg Boss 9 Telugu: బిగ్బాస్ సీజన్ 9 తుది అంకానికి చేరుకుంది! చివరి ఐదుగురిలో నిలబడేందుకు కంటెస్టెంట్లకు అత్యంత కీలకమైన ‘టికెట్ టు ఫినాలే’ (Ticket to Finale) టాస్కులు రసవత్తరంగా మొదలయ్యాయి. నిన్నటి ఎపిసోడ్ ఈ రేసులో ఎవరు బుద్ధిబలం, ఎవరు బలప్రదర్శన, ఎవరు తెలివితేటలు వాడారో స్పష్టంగా చూపించింది.
భరణిని వెనక్కి లాగిన తనూజ ప్లాన్
తొలి టాస్క్కు కంటెస్టెంట్లే నిర్ణయించుకోవాలని బిగ్బాస్ చెప్పగా, కళ్యాణ్, ఇమ్మూ, డీమాన్లు ముందుకు వచ్చారు. ఆసక్తిగా భరణి కూడా ఆడతాననగా… ఇక్కడే తనూజ మాస్టర్ప్లాన్ మొదలైంది. వెనుక నుండి భరణిని గిల్లి (గోకుతూ), సైగలతో వెనక్కి తగ్గాలని హింట్ ఇచ్చింది. ఆమె వ్యూహానికి కట్టుబడి భరణి వెనక్కి తగ్గడం విశేషం. రీతూ పట్టుబట్టి పోటీకి దిగడంతో డీమాన్ ఆమె కోసం తప్పుకున్నాడు.
మొదటి టాస్క్ మ్యాథ్స్ సామర్థ్యంపై కావడం, రీతూ ముందే చేతులెత్తేయడంతో… కేవలం కళ్యాణ్, ఇమ్మూల మధ్యే పోటీ జరిగింది. ఈ టాస్క్లో ఇమ్మూ అద్భుతంగా రాణించి తొలి విజయాన్ని తన ఖాతాలో వేసుకున్నాడు.
పూల టాస్క్లో రచ్చ రచ్చ!
తర్వాత జరిగిన రెండో టాస్క్… ఫైనల్ టికెట్ రేసులో అసలైన ఉత్కంఠను రేపింది. ఈ టాస్క్లో భరణి, తనూజ, డీమాన్లు పోటీ పడ్డారు. వారికి కేటాయించిన కలర్ పూలను మట్టిలో నాటి, బజర్ మోగే సమయానికి ఎక్కువ పూలు ఎవరి దగ్గర ఉంటే వారే విజేత. అయితే, ఈ టాస్క్కు కళ్యాణ్నే సంచాలక్గా డిసైడ్ చేసింది తనూజే!
ఇది కూడా చదవండి: Hyderabad: ఎల్బీనగర్ పీఎస్లో విషాదం.. గుండెపోటుతో ఎస్సై కన్నుమూత
టాస్క్ ప్రారంభం నుంచే తనూజ తన మైండ్గేమ్ను మొదలుపెట్టింది. డీమాన్ను మాటలతో రెచ్చగొట్టే ప్రయత్నం చేసింది. “నీకు నచ్చినట్లు డెకరేట్ చేశావా?” అంటూ కవ్వించినా, సంచాలక్ అభ్యంతరం చెప్పకపోవడంతో తాత్కాలికంగా ఆగిపోయింది.
భరణి-తనూజ వర్సెస్ డీమాన్ (సింగిల్ హ్యాండ్)
అసలు రచ్చ మొదలైంది డీమాన్ పూలు తీసేయడంతో. ఆ వెంటనే భరణి, తనూజ ఒక్కటైపోయి (స్నేహంగానో, వ్యూహాత్మకంగానో) డీమాన్ పూలు లేకుండా చేయడానికి ప్రయత్నించారు. దీనికి కోపంగా డీమాన్ వారిద్దరినీ పక్కకు లాక్కెళ్లాడు. ఆ సమయంలో తనూజ అరుపులు, వాదనలు ఆపలేదు. డీమాన్ ప్రశాంతంగా మాట్లాడినా, రీతూ అతన్ని ఎంకరేజ్ చేయడంతో ఆమెపై కూడా తనూజ సీరియస్ అయ్యింది, “నువ్వు వచ్చి ఆడేయ్” అంటూ కసురుకుంది.
ఈ టాస్క్లో భరణి, తనూజ ఒక వైపు ఉంటే… డీమాన్ ఒంటరిగా ఇద్దరినీ ఆపేందుకు తీవ్రంగా ప్రయత్నించాడు. చివర్లో తనకు నచ్చినట్టుగా పూలు పట్టుకుని నిలబడిన తనూజను డీమాన్ సంచాలక్ దృష్టికి తీసుకెళ్లినా, ఎప్పటిలాగే తనూజ సమర్థించుకుంది.
తనూజకు మరో విజయం
చివరకు, ఎక్కువ పూలు ఉన్నాయంటూ సంచాలక్ కళ్యాణ్ తనూజనే విజేతగా ప్రకటించాడు. గేమ్ ముగిశాక, “అక్కడ ఇద్దరూ ఒక్కటై ఆడుతుంటే ఎలా గెలవాలి?” అంటూ డీమాన్ తన నిస్సహాయతను వ్యక్తం చేశాడు. తనూజ పూలు తీయకుండా భరణి తన ఫోకస్ మొత్తం నీపైనే పెట్టాడని రీతూ కామెంట్ చేసింది. మరోవైపు, భరణితో మాట్లాడిన తనూజ, “ఎవరి కోసం వాళ్లే ఆడాం కదా?” అని అడగగా, భరణి తలూపాడు. “నాకు అదే రిగ్రెట్… ఎంత ఆడినా ఇలాంటి మాటలే వస్తాయి” అంటూ గెలుపును కవర్ చేసుకునే ప్రయత్నం చేసింది.
మొత్తానికి, మైండ్గేమ్, మాటలు, స్నేహాన్ని కలిపి తనూజ ఈ టాస్క్లో విన్ అయి ఫైనల్ టికెట్కు మరింత దగ్గరైంది. ఇమ్మూ, తనూజల తర్వాత ఈ రేసులో నెక్స్ట్ అడుగు వేసే కంటెస్టెంట్ ఎవరు అనేది ఆసక్తికరంగా మారింది.