Bhatti Vikramarka: తెలంగాణ శాసనసభ వేదికగా డిప్యూటీ సీఎం భట్టి విక్రమార్క ప్రతిపక్షాలకు గట్టి కౌంటర్ ఇచ్చారు. కాంగ్రెస్ ప్రభుత్వం ఇచ్చిన హామీలను అమలు చేయడం లేదని బీఆర్ఎస్ చేస్తున్న ఆరోపణల్లో వాస్తవం లేదని ఆయన కొట్టిపారేశారు. తమ ప్రభుత్వం ప్రతీ పేద కుటుంబానికి ఏ విధంగా అండగా ఉంటుందో, ఏ పథకం ద్వారా ఎంత లబ్ధి జరుగుతుందో త్వరలోనే పూర్తి వివరాలతో, గణాంకాలతో సహా ప్రజల ముందు ఉంచుతామని ఆయన స్పష్టం చేశారు.
ప్రభుత్వం చేస్తున్న సంక్షేమ కార్యక్రమాలపై ఆయన కీలక వివరాలు వెల్లడించారు. రాష్ట్రంలో ఇప్పటికే 53 లక్షల మందికి 200 యూనిట్ల వరకు ఉచిత విద్యుత్ అందిస్తూ వారి ఆర్థిక భారాన్ని తగ్గిస్తున్నామని చెప్పారు. అలాగే, పేద ప్రజల ఆకలి తీర్చేందుకు ఏకంగా 1.06 కోట్ల మందికి సన్న బియ్యం పంపిణీ చేస్తున్నామని వివరించారు. ఈ పథకాల వల్ల సామాన్యుల జీవితాల్లో సానుకూల మార్పు వస్తోందని, ఇది తమ ప్రభుత్వ చిత్తశుద్ధికి నిదర్శనమని భట్టి విక్రమార్క పేర్కొన్నారు.
మరోవైపు మంత్రి శ్రీధర్ బాబు మాట్లాడుతూ ప్రతిపక్షాల తీరుపై అసహనం వ్యక్తం చేశారు. గవర్నర్ ప్రసంగంపై అర్థవంతమైన చర్చ జరుగుతుందని, ప్రతిపక్షాలు మంచి సలహాలు ఇస్తాయని ఆశించామని, కానీ వారు కేవలం విమర్శలకే పరిమితమయ్యారని అన్నారు. కాంగ్రెస్ అనేది జాతీయ పార్టీ అని, రాష్ట్ర ప్రయోజనాల కోసం ఢిల్లీకి వెళ్లి కేంద్ర మంత్రులను, ప్రధానిని కలవడంలో తప్పులేదని ఆయన స్పష్టం చేశారు. గతంలో ప్రాంతీయ పార్టీగా ఉండి కూడా బీఆర్ఎస్ నేతలు ఎన్నోసార్లు ఢిల్లీ చుట్టూ తిరిగిన విషయాన్ని ఈ సందర్భంగా ఆయన గుర్తు చేశారు.
రాష్ట్ర అభివృద్ధి కోసం, నిధుల సాధన కోసం ఎన్నిసార్లయినా ఢిల్లీకి వెళ్తామని, ఇందులో దాచాల్సింది ఏమీ లేదని శ్రీధర్ బాబు తేల్చి చెప్పారు. ప్రజలకు ఇచ్చిన ప్రతి హామీని నెరవేరుస్తామని, సంక్షేమ పథకాలను పక్కాగా అమలు చేస్తూ రాష్ట్రాన్ని ప్రగతి పథంలో నడిపిస్తామని మంత్రులు ఇద్దరూ పునరుద్ఘాటించారు.