Bangladesh Bus Accident: బంగ్లాదేశ్లో బుధవారం సాయంత్రం ఒక భయంకరమైన రోడ్డు ప్రమాదం చోటుచేసుకుంది. సుమారు 50 మంది ప్రయాణికులతో వెళ్తున్న ఒక ప్రైవేట్ బస్సు అదుపుతప్పి పద్మా నది (Padma River) లో పడిపోయింది. రాజ్బరి జిల్లాలోని దౌలత్దియా ఫెర్రీ టెర్మినల్ వద్ద జరిగిన ఈ దుర్ఘటనలో ఇప్పటివరకు 23 మంది ప్రాణాలు కోల్పోయినట్లు అధికారులు ధృవీకరించారు. మృతులలో 11 మంది మహిళలు, 8 మంది చిన్నారులు ఉన్నట్లు సమాచారం.
ప్రమాదం ఎలా జరిగింది?
రాజ్బరి నుండి రాజధాని ఢాకాకు వెళ్తున్న ‘సౌహార్దో పరివాహన్’ (Souhardya Paribahan) కు చెందిన బస్సు, నదిని దాటడం కోసం ఘాట్ నెం.3 వద్ద ఫెర్రీ ఎక్కేందుకు వేచి చూస్తోంది. అదే సమయంలో ‘హస్నా హేనా’ (Hasna Hena) అనే చిన్న యుటిలిటీ ఫెర్రీ వేగంగా వచ్చి పొంటూన్ను (బస్సులు నిలబడే ప్లాట్ఫాం) బలంగా ఢీకొట్టింది. ఈ ఆకస్మిక ధాటికి పొంటూన్పై ఉన్న బస్సు అదుపుతప్పి నేరుగా నదిలోకి దూసుకెళ్లి సుమారు 30 అడుగుల లోతులో మునిగిపోయింది. ఈద్ పండుగ సెలవులు ముగించుకుని ప్రజలు తమ పనుల కోసం ఢాకాకు తిరిగి వెళ్తున్న సమయంలో ఈ విషాదం జరిగింది.
సహాయక చర్యలు – ‘హంజా’ రెస్క్యూ
ప్రమాదం జరిగిన వెంటనే బంగ్లాదేశ్ ఫైర్ సర్వీస్, నౌకాదళం మరియు నదీ పోలీసులు రంగంలోకి దిగారు. సుమారు ఆరు గంటల పాటు శ్రమించి ‘హంజా’ అనే శక్తివంతమైన రెస్క్యూ నౌక సహాయంతో నదిలో మునిగిపోయిన బస్సును బయటకు తీశారు.
-
మృతుల గుర్తింపు: బస్సు డ్రైవర్ అర్మాన్ ఖాన్ కూడా ఈ ప్రమాదంలో మృతి చెందాడు.
-
బతికి బయటపడ్డవారు: సుమారు 11 మంది ప్రయాణికులు బస్సు కిటికీల నుండి బయటకు దూకి ఈదుకుంటూ ప్రాణాలను రక్షించుకున్నారు.
ప్రధాని సంతాపం.. విచారణకు ఆదేశం
ఈ ఘోర ప్రమాదంపై బంగ్లాదేశ్ ప్రధాని తారిఖ్ రెహమాన్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు తన ప్రగాఢ సానుభూతి తెలియజేస్తూ, ఘటనపై సమగ్ర విచారణకు ఆదేశించారు. ఫెర్రీ టెర్మినల్ వద్ద భద్రతా లోపాలపై నివేదిక కోరారు. గల్లంతైన మిగతా ప్రయాణికుల కోసం గాలింపు చర్యలు ఇంకా కొనసాగుతున్నాయి.