Ustaad Bhagat Singh: తెలుగు సినీ పరిశ్రమలో మరోసారి సమ్మె సైరన్‌ మోగింది. తెలుగు ఫిల్మ్‌ ఇండస్ట్రీ ఎంప్లాయీస్‌ ఫెడరేషన్ తమ వేతనాలను 30 శాతం పెంచాలని డిమాండ్ చేస్తుండగా, దీనిపై ఫిలిం ఫెడరేషన్, ఫిలిం ఛాంబర్ మధ్య ఆదివారం జరిగిన చర్చలు విఫలమయ్యాయి. దీంతో సోమవారం నుంచి టాలీవుడ్‌లో అన్ని సినిమా షూటింగ్‌లు నిలిచిపోయాయి. తమ డిమాండ్లకు అంగీకరించిన నిర్మాతల సినిమాలకు మాత్రమే పని చేస్తామని ఫెడరేషన్ స్పష్టం చేసింది. ఈ పరిణామం సినీ పరిశ్రమలో ఆందోళన కలిగిస్తోంది. షూటింగ్‌లు నిలిచిపోవడం వల్ల నిర్మాతలు భారీగా నష్టపోయే పరిస్థితి ఏర్పడింది. దీంతో ఫిలిం ఛాంబర్‌లో నిర్మాతల మండలి అత్యవసరంగా సమావేశమైంది. అల్లు అరవింద్, మైత్రీ రవి, శివలెంక కృష్ణ ప్రసాద్ వంటి ప్రముఖ నిర్మాతలు ఈ సమావేశానికి హాజరయ్యారు. మరోవైపు, ఫెడరేషన్ షరతులకు అంగీకరిస్తూ ఇప్పటికే కొంతమంది నిర్మాతలు లేఖలు ఇచ్చినట్లు తెలుస్తోంది.
సినీ కార్మికుల సమ్మె నేపథ్యంలో ఉస్తాద్ భగత్ సింగ్ షూటింగ్‌కు అడ్డంకులు ఏర్పడ్డాయి. పవన్ కళ్యాణ్ డేట్స్ ఇచ్చిన సమయంలోనే కార్మికుల వేతనం డిమాండ్ తెరపైకి రావడం పట్ల పలు అనుమానాలు వ్యక్తమవుతున్నాయి. పవన్ కళ్యాణ్ సినిమాలనే ఎందుకు టార్గెట్ చేస్తున్నారని ఆయన అభిమానులు ప్రశ్నిస్తున్నారు. గతంలో హరిహర వీరమల్లు విడుదల సమయంలో థియేటర్ల బంద్ అంశం తెరపైకి రావడం, ఇప్పుడు ఉస్తాద్ భగత్ సింగ్ షూటింగ్ సమయంలో ఈ సమస్య రావడం వెనుక కుట్ర ఉందా అనే చర్చ జరుగుతోంది. మరోవైపు టాలీవుడ్‌లో షూటింగ్‌లు నిలిచిపోవడంతో పలు భారీ బడ్జెట్ చిత్రాలపై ప్రభావం పడనుంది. ఉస్తాద్ భగత్ సింగ్ వంటి పెద్ద సినిమాల షూటింగ్ ఆగిపోవడం వల్ల నిర్మాతలు భారీగా నష్టపోవాల్సి వస్తుంది. పవన్ కళ్యాణ్ లాంటి స్టార్ హీరోలకు కాల్షీట్లు చాలా విలువైనవి. ఈ బంద్ వల్ల వారి డేట్స్ వేస్ట్ అయ్యే అవకాశం ఉంది. ఈ సమస్య త్వరగా పరిష్కారం కాకపోతే సినీ పరిశ్రమకు కోట్ల రూపాయల నష్టం వాటిల్లే అవకాశం ఉందని సినీరంగానికి చెందిన పలువురు చెబుతున్నారు.
Also Read: Kavitha vs Jagadeesh: కవితను కారు దించేసేందుకు రంగం సిద్ధమైందా?
ఉస్తాద్ భగత్ సింగ్ షూటింగ్‌లో పవన్ కళ్యాణ్ పాల్గొంటున్న సమయంలోనే కార్మికులు అడ్డుకోవడానికి ప్రయత్నించడంపై అనేక సందేహాలు వ్యక్తమవుతున్నాయి. పవన్ కళ్యాణ్‌ను కలిసేందుకు ఫెడరేషన్ ఉద్యోగులు అన్నపూర్ణ సెవెన్ ఎకర్స్ వద్ద ఉద్రిక్తతకు కారణమయ్యారు. ఓవైపు నిర్మాతల మండలి సమావేశం జరుగుతుండగా, మరోవైపు ఫెడరేషన్ కార్మికుల ఈ చర్యలు వివాదాస్పదం అయ్యాయి. ఈ సమ్మె వల్ల కేవలం ఉస్తాద్ భగత్ సింగ్ వంటి భారీ బడ్జెట్ చిత్రాలే కాకుండా, చిన్న సినిమాలు, వెబ్ సిరీస్‌ల షూటింగ్‌లు కూడా నిలిచిపోయాయి. ఇప్పటికే ఆన్-ఫ్లోర్‌లో ఉన్న నాలుగు సినిమాలు, ఒక సినిమా ఓపెనింగ్, రెండు యాడ్ ఫిలింస్‌పై కూడా ఈ బంద్ ప్రభావం పడింది. ఇది సినీ పరిశ్రమ ఆర్థిక వ్యవస్థపై తీవ్ర ప్రభావాన్ని చూపే అవకాశం ఉంది. ఈ సమస్య త్వరగా పరిష్కారం కాకపోతే, టాలీవుడ్ పరిశ్రమ మరింత నష్టపోతుందని నిపుణులు హెచ్చరిస్తున్నారు.