TS BJP President: తెలంగాణ రాజకీయాల్లో బీజేపీ హైకమాండ్ నిర్ణయాలు ఆ పార్టీ సానుభూతిపరుల్లో అయోమయం, ఆందోళనకు కారణమవుతున్నాయి. ఈ నిర్ణయాలు పార్టీ బలోపేతం కోసం కాక, ఇతర పార్టీలకు పరోక్షంగా సహకరిస్తున్నాయన్న అభిప్రాయం వ్యక్తమవుతోంది. గత తెలంగాణ అసెంబ్లీ ఎన్నికల సమయంలో బండి సంజయ్ నేతృత్వంలో బీజేపీ ఊపందుకుంటున్న వేళ, హఠాత్తుగా ఆయనను తప్పించి కిషన్ రెడ్డికి అధ్యక్ష బాధ్యతలు అప్పగించారు. దీంతో పార్టీ ఊపు చల్లారి, ఎనిమిది సీట్లతో సరిపెట్టుకోవాల్సి వచ్చింది. కాంగ్రెస్ అధికారంలోకి రాగా, పార్లమెంట్ ఎన్నికల్లో కిషన్ రెడ్డి నేతృత్వంలో బీజేపీ ఎనిమిది సీట్లు గెలుచుకుంది. బీఆర్ఎస్ ఓటు బ్యాంక్ బీజేపీకి మళ్లుతోందని, బీఆర్ఎస్ దెబ్బతిన్న ప్రతి చోటా బీజేపీ గెలిచిందని ఫలితాలు చూపించాయి. ఈ సమయంలో బీఆర్ఎస్‌ను బలహీనపరిచే అవకాశాన్ని బీజేపీ సద్వినియోగం చేసుకుంటుందని అందరూ ఊహించారు. కానీ, అలాంటి వ్యూహం ఏదీ కనిపించలేదు.
తెలంగాణ బీజేపీ అధ్యక్ష పదవి కోసం ఈటల రాజేందర్, బండి సంజయ్, ధర్మపురి అర్వింద్ పేర్లు ప్రచారంలో ఉండగా, అనూహ్యంగా రామచంద్రరావుకు అవకాశం దక్కింది. ఈ నిర్ణయం బీఆర్ఎస్‌కు పరోక్షంగా ఊపిరి పోస్తుందని, ఆ పార్టీ తిరిగి ఓటు బ్యాంకును సమీకరించుకునే అవకాశం ఉందని విశ్లేషకులు అంటున్నారు. బీజేపీ హైకమాండ్ నిర్ణయాలపై పార్టీ నేతలు, కార్యకర్తలు ఆశ్చర్యం వ్యక్తం చేస్తున్నారు. ఈ నిర్ణయాలు బీజేపీని బలోపేతం చేయడానికి బదులు, బీఆర్ఎస్‌కు లాభం చేకూర్చేలా ఉన్నాయన్న గుసగుసలు బీజేపీ అభిమానుల్లోనే వినిపిస్తున్నాయి.
ఈ నిర్ణయంతో ఈటల రాజేందర్‌కు హైకమాండ్ షాక్ ఇచ్చింది. అసెంబ్లీ ఎన్నికల్లో సీఎం అభ్యర్థిని తానే అని పరోక్షంగా ప్రచారం చేసుకున్న ఈటల, ఆ తర్వాత మల్కాజిగిరి నుంచి ఎంపీగా గెలిచినా, కేంద్ర మంత్రి పదవి దక్కలేదు. బండి సంజయ్, కిషన్ రెడ్డిలకు కేంద్ర మంత్రి వర్గంలో అవకాశాలు రాగా, ఈటలకు తెలంగాణ అధ్యక్ష పదవి దక్కుతుందని ఆశించారు. కానీ, హైకమాండ్‌లో ఈటలకు వ్యతిరేక లాబీ బలంగా పనిచేసింది. ఆయన బీజేపీలో చేరకముందు కాంగ్రెస్‌లో చేరి ఉంటే, రేవంత్ రెడ్డితో మంచి సంబంధాల కారణంగా కేబినెట్‌లో స్థానం దక్కేదని అభిప్రాయాలు వినిపిస్తున్నాయి. ఇప్పుడు ఈటల ఎంపీగానే నాలుగేళ్లు కాలం గడపాల్సి ఉంది. ఈ మధ్య బీఆర్ఎస్‌కు మద్దతుగా మాట్లాడుతున్నారన్న ఊహాగానాల నడుమ, బీఆర్ఎస్ మళ్లీ బలపడితే.. ఈటల పూర్వాశ్రమానికి చేరుకునే అవకాశం ఉందని మరికొందరు అంటున్నారు.
Also Read: Delimitation: డీలిమిటేష‌న్‌పై తెలుగు రాష్ట్రాల్లో ఉత్కంఠ.. మార‌నున్న రాజ‌కీయ స‌మీక‌ర‌ణాలు
TS BJP President: రాజాసింగ్ విషయంలోనూ బీజేపీ నిర్ణయాలు ఆశ్చర్యం కలిగిస్తున్నాయి. అధ్యక్ష పదవి నిర్ణయాన్ని వ్యతిరేకిస్తూ ఆవేశంతో రాజీనామా ప్రకటించిన రాజాసింగ్, తనకు కనీసం నామినేషన్ వేసే అవకాశం ఇవ్వలేదని ఆరోపించారు. కానీ, బీజేపీ నేతలు ఆయన రాజీనామాను పట్టించుకోలేదు. రాజాసింగ్ కల్ట్ హిందూత్వ వాదిగా పేరుగాంచారు. గతంలో 14 నెలల పాటు సస్పెన్షన్‌లో ఉంచిన బీజేపీ, ఎన్నికల ముందు సస్పెన్షన్ ఎత్తివేసి గోషామహల్ సీటు ఇచ్చింది. ఆ నియోజకవర్గంలో ఆయన తప్ప మరెవరూ గెలవలేరన్న నమ్మకంతో ఈ నిర్ణయం తీసుకున్నారు. అయినా, రాజాసింగ్‌ను ఇతర పార్టీ కార్యక్రమాల్లో పెద్దగా పాల్గొననివ్వరు. అధ్యక్ష పదవి కోసం ఆయన డిమాండ్ చేసినా, హైకమాండ్ చాలా లైట్‌ తీసుకుంది. ప్రస్తుతానికి రాజీనామా ప్రకటించినా, రాజాసింగ్ తిరిగి బీజేపీలోనే కొనసాగుతారని నేతలు భావిస్తున్నారు.