Ap news: చంద్రబాబు, పవన్ కళ్యాణ్, లోకేశ్, అనితలపై సోషల్ మీడియాలో అసభ్య పోస్టుల వ్యవహారం ఆంధ్రప్రదేశ్ రాజకీయాల్లో సంచలనంగా మారింది. ఈ వ్యవహారంలో వైసీపీ ఎంపీ అవినాశ్ రెడ్డి వ్యక్తిగత కార్యదర్శి (పీఏ) రాఘవరెడ్డిని పోలీసులు అదుపులోకి తీసుకున్నారు. రాఘవరెడ్డిపై అసభ్య పోస్టులు పెట్టించాడనే ఆరోపణలతో పాటు ఎస్సీ ఎస్టీ అట్రాసిటీ కేసులో కూడా ఆయన నిందితుడిగా ఉన్నారు.
పులివెందులలోని రాఘవరెడ్డి నివాసానికి చేరుకున్న పోలీసులు, అతడిని అదుపులోకి తీసుకుని పులివెందుల పోలీస్ స్టేషన్కు తరలించారు. ఇటీవల ఏపీ హైకోర్టు రాఘవరెడ్డి దాఖలు చేసిన ముందస్తు బెయిల్ పిటిషన్ను తిరస్కరించింది. ఈ నేపథ్యంలో, పోలీసులు రాఘవరెడ్డిపై చర్యలు చేపట్టారు.
రాఘవరెడ్డిపై వైసీపీ సోషల్ మీడియా కార్యకర్త వర్రా రవీంద్రారెడ్డితో అసభ్య పోస్టులు పెట్టించాడనే ఆరోపణలున్నాయి. రాఘవరెడ్డిని అరెస్ట్ చేసే అవకాశమున్న నేపథ్యంలో, వైసీపీ కార్యకర్తలు పెద్ద సంఖ్యలో పులివెందుల పోలీస్ స్టేషన్ వద్దకు చేరుకున్నారు.
ఈ వ్యవహారం రాజకీయ ఉత్కంఠను పెంచగా, రాబోయే రోజుల్లో దీనిపై మరింత చర్చ జరుగుతుందని భావిస్తున్నారు.