Damien Martyn: ఆస్ట్రేలియా క్రికెట్ దిగ్గజం, క్లాసిక్ బ్యాటర్ డామియన్ మార్టిన్ (54) తీవ్ర అనారోగ్యంతో బ్రిస్బేన్లోని ఆసుపత్రిలో చేరారు. గత కొన్ని రోజులుగా మెనింజైటిస్ (Meningitis) వ్యాధితో బాధపడుతున్న ఆయన పరిస్థితి విషమించడంతో, వైద్యులు ప్రస్తుతం ఆయనను ‘ఇండ్యూస్డ్ కోమా’లో ఉంచి చికిత్స అందిస్తున్నట్లు సమాచారం. ప్రస్తుతం ఆయన గోల్డ్ కోస్ట్ యూనివర్సిటీ ఆసుపత్రిలో చికిత్స పొందుతున్నారు. మార్టిన్ ఆరోగ్య పరిస్థితి ఆందోళనకరంగానే ఉందని ఆసుపత్రి వర్గాలు బుధవారం ధృవీకరించాయి.
మార్టిన్ మాజీ సహచరుడు ఆడమ్ గిల్క్రిస్ట్ ఈ విషయాన్ని అధికారికంగా వెల్లడించారు. మార్టిన్ కుటుంబం తరపున గిల్క్రిస్ట్ ప్రకటన విడుదల చేస్తూ, “మార్టిన్కు అత్యుత్తమ వైద్యం అందుతోంది. ప్రపంచవ్యాప్తంగా ఉన్న అభిమానులు, మిత్రులు ఆయన కోసం ప్రార్థనలు చేస్తున్నారని కుటుంబ సభ్యులకు తెలుసు” అని పేర్కొన్నారు. క్రికెట్ ఆస్ట్రేలియా చీఫ్ ఎగ్జిక్యూటివ్ టాడ్ గ్రీన్బర్గ్ కూడా మార్టిన్ త్వరగా కోలుకోవాలని ఆకాంక్షించారు. ఈ వార్త తెలియగానే భారత మాజీ క్రికెటర్లు వివిఎస్ లక్ష్మణ్, రవిచంద్రన్ అశ్విన్ సోషల్ మీడియా వేదికగా స్పందించారు. “నా ప్రియ మిత్రుడు మార్టిన్ త్వరగా కోలుకోవాలని కోరుకుంటున్నాను. క్రికెట్ ప్రపంచం మొత్తం నీకు అండగా ఉంది” అని లక్ష్మణ్ ట్వీట్ చేశారు.
ఇది కూడా చదవండి: NTR-Neel: లొకేషన్ రెక్కీలో తారక్ ఇంటర్నేషనల్ సినిమా!
ఆస్ట్రేలియా క్రికెట్ చరిత్రలో అత్యంత సొగసైన బ్యాటర్గా డామియన్ మార్టిన్కు పేరుంది. 1992 నుంచి 2006 మధ్య కాలంలో ఆయన ఆస్ట్రేలియా తరపున 67 టెస్టులు ఆడి 46.37 సగటుతో 4,406 పరుగులు చేశారు. ఇందులో 13 సెంచరీలు ఉన్నాయి. ముఖ్యంగా 2004లో భారత్లో ఆస్ట్రేలియా టెస్ట్ సిరీస్ గెలవడంలో మార్టిన్ కీలక పాత్ర పోషించారు. ఆ సిరీస్లో ఆయన ‘ప్లేయర్ ఆఫ్ ది సిరీస్’గా నిలిచారు. స్టీవ్ వా నేతృత్వంలోని తిరుగులేని ఆస్ట్రేలియా జట్టులో మార్టిన్ ఒక ముఖ్యమైన సభ్యుడిగా కొనసాగారు.
టెస్టుల్లోనే కాకుండా వన్డేల్లోనూ మార్టిన్ అద్భుత రికార్డును కలిగి ఉన్నారు. 208 వన్డేలు ఆడిన ఆయన 40.8 సగటుతో పరుగులు సాధించారు. 2003 ప్రపంచకప్ గెలిచిన ఆస్ట్రేలియా జట్టులో ఆయన సభ్యుడు. భారత్తో జరిగిన ఆ మెగా టోర్నీ ఫైనల్లో మార్టిన్ 88 పరుగులు చేసి నాటౌట్గా నిలిచారు. 2006 యాషెస్ సిరీస్ మధ్యలో అంతర్జాతీయ క్రికెట్కు వీడ్కోలు పలికిన మార్టిన్, ఆ తర్వాత వ్యాఖ్యాతగా కొన్ని రోజులు కనిపించినా, ఎక్కువ కాలం వ్యక్తిగత జీవితానికే ప్రాధాన్యత ఇచ్చారు. మైఖేల్ వాన్, డారెన్ లెమాన్ వంటి దిగ్గజాలు కూడా మార్టిన్ ఆరోగ్యంపై ఆందోళన వ్యక్తం చేస్తూ ఆయన త్వరగా తిరిగి రావాలని ఆకాంక్షించారు.