Telangana: కాళోజీ హెల్త్ యూనివర్సిటీలో జరిగిన ఓ సంఘటన ఇప్పుడు రాష్ట్రవ్యాప్తంగా చర్చనీయాంశమైంది. ఇక్కడ చదువుతున్న ఒక పీజీ విద్యార్థినిపై ఒక అసిస్టెంట్ ప్రొఫెసర్ లైంగిక వేధింపులకు పాల్పడినట్లు తేలింది. ఈ విషయంపై వైద్యశాఖ వేసిన విచారణ కమిటీ తమ నివేదికలో సంచలన విషయాలను వెల్లడించింది.
వేధింపులపై ఫిర్యాదు, ఆపై ప్రొఫెసర్ పగ:
సదరు అసిస్టెంట్ ప్రొఫెసర్ తనని లైంగికంగా వేధిస్తున్నాడని, రాత్రిపూట అసభ్యకరమైన మెసేజ్లు పంపి ఇబ్బంది పెట్టాడని విద్యార్థిని యూనివర్సిటీ యాజమాన్యానికి ఫిర్యాదు చేసింది. ఈ ఫిర్యాదు అందిన వెంటనే, యూనివర్సిటీ అధికారులు ఆ ప్రొఫెసర్ను విధుల నుండి తొలగించారు. దీంతో విద్యార్థినిపై పగ పెంచుకున్న ప్రొఫెసర్, ఆమెను ఇబ్బంది పెట్టాలని నిర్ణయించుకున్నాడు.
కావాలనే ఫెయిల్ చేయించిన ప్రొఫెసర్:
ఇటీవల జరిగిన పీజీ పరీక్షల్లో ఆ విద్యార్థిని ఫెయిల్ అయింది. అయితే, ఆమె జవాబు పత్రాలను మళ్లీ పరిశీలించినప్పుడు షాకింగ్ విషయం తెలిసింది. విద్యార్థిని రాసిన జవాబు పత్రాలపై అసిస్టెంట్ ప్రొఫెసర్ ఇంటూ మార్క్లు వేసి, ఆమెను ఉద్దేశపూర్వకంగా ఫెయిల్ చేయించినట్లు కమిటీ విచారణలో బయటపడింది. తాను అన్ని ప్రశ్నలకు బాగానే సమాధానాలు రాశానని, ఫెయిల్ అయ్యే అవకాశమే లేదని విద్యార్థిని పదే పదే విజ్ఞప్తి చేయడంతో, యూనివర్సిటీ అధికారులు ఆమె ఆన్సర్ షీట్ను మళ్లీ వాల్యుయేషన్ చేయించారు. అందులో ఆమె పాస్ అయినట్లు తేలింది.
విచారణ కమిటీ నివేదిక:
మొదట్లో, ఈ విద్యార్థినిని అక్రమంగా పాస్ చేశారని విమర్శలు రావడంతో వైద్యశాఖ అధికారులు ఈ ఘటనపై విచారణకు ఒక కమిటీని వేశారు. కమిటీ తమ విచారణలో, అసిస్టెంట్ ప్రొఫెసర్ విద్యార్థినిని లైంగికంగా వేధించాడనే విషయాన్ని, ఆ పగతోనే ఆమెను పరీక్షల్లో ఫెయిల్ చేయించాడనే విషయాన్ని నిర్ధారించింది. యూనివర్సిటీలో ఈ తరహా ఘటన జరగడం పట్ల సర్వత్రా ఆందోళన వ్యక్తమవుతోంది. ఉన్నత విద్యాసంస్థల్లో మహిళా విద్యార్థినుల భద్రతపై ప్రశ్నలు తలెత్తుతున్నాయి.