Crime News: భద్రాద్రి కొత్తగూడెం జిల్లా అశ్వారావుపేట పట్టణంలో చోటుచేసుకున్న ఒక విషాదకర సంఘటన స్థానికులను కలచివేసింది. రెండేళ్లుగా తల్లిదండ్రుల్ని కలవని యువతి, ఒక్కసారిగా ఆసుపత్రిలో ప్రాణం కోల్పోయిన స్థితిలో కనిపించడంతో అనుమానాలు ముదురుతున్నాయి.
ఘటన వివరాలు
కల్లూరు మండలం ముచ్చవరం పంచాయతీ పరిధిలోని విశ్వన్నాథంపురానికి చెందిన లక్ష్మీప్రసన్న (33), 2015లో ఖాన్‌ఖాన్‌పేట వాసి పూల నరేశ్‌బాబును వివాహం చేసుకుంది. తొమ్మిదేళ్ల క్రితం వారికి కుమార్తె పుట్టింది. మొదట ఆరుగేళ్లు అత్తమామల వద్దే జీవించిన నరేశ్ దంపతులు, తరువాత అశ్వారావుపేటలో బంధువుల ఇంట్లో ఉండడం ప్రారంభించారు.
శనివారం నరేశ్ తన అత్తమామలకు ఫోన్ చేసి, “లక్ష్మీప్రసన్న మెట్ల పైనుంచి పడిపోయింది, ఆసుపత్రిలో చేర్చాం” అని చెప్పాడు. అయితే కుటుంబ సభ్యులు పరుగున చేరుకుని చూసే సరికి ఆమె అప్పటికే మృతి చెందింది.
అనుమానాస్పద పరిస్థితులు
మృతదేహం ఎముకల గూడులా మారిపోయి ఉండటం, శరీరమంతా కొత్త గాయాలు, మానిన గాయాల గుర్తులు కనబడటం తల్లిదండ్రుల హృదయాన్ని పిండేసింది. “మా కుమార్తెను నరేశ్, అతని తల్లి విజయలక్ష్మి, అక్క భూలక్ష్మి, బావ శ్రీనివాసరావు కలిసి అదనపు కట్నం కోసం హింసించి హత్య చేశారు” అని మృతురాలి తండ్రి ముదిగొండ వెంకటేశ్వరరావు పోలీసులకు ఫిర్యాదు చేశారు.
తల్లిదండ్రుల వేదన
“వివాహ సమయంలో రెండెకరాల మామిడితోట, అరెకరం పొలం, రూ.10 లక్షల నగదు, రూ.10 లక్షల విలువైన బంగారు ఆభరణాలు ఇచ్చాం. అయినా మా బిడ్డను కట్నం కోసం వేధించారు. రెండు సంవత్సరాలుగా మాతో మాట్లాడనివ్వలేదు. ఫోన్ చేసినా సమాధానం రాలేదు. మేము వెళ్లినా ఊర్లో లేదని పంపించేవారు. చివరికి ఆకలితో, హింసతో చంపేశారు” అని బాధితుల కుటుంబ సభ్యులు కన్నీళ్ల మధ్య వాపోయారు.
భర్త బావ వాదన
అయితే నరేశ్ బావ మాత్రం వేరే కోణం చెబుతున్నాడు. “లక్ష్మీప్రసన్నకు రక్తహీనత, థైరాయిడ్ సమస్యలు ఉన్నాయి. ఆమెను చూపించలేదన్నది తప్పుడు ఆరోపణ” అని పేర్కొన్నాడు.
పోలీసుల స్పందన
మృతురాలి తండ్రి ఇచ్చిన ఫిర్యాదు మేరకు అశ్వారావుపేట ఎస్సై యయాతి రాజు కేసు నమోదు చేసి, అనుమానాస్పద మృతి కింద దర్యాప్తు చేస్తున్నట్లు తెలిపారు.