AP News: ఆంధ్రప్రదేశ్ పోలీసు అధికారుల సంఘం, మాజీ ముఖ్యమంత్రి జగన్మోహన్ రెడ్డి పోలీసు వ్యవస్థపై చేసిన వ్యాఖ్యలను తీవ్రంగా ఖండించింది. పోలీసులపై తరచుగా విమర్శలు చేయడం జగన్‌కు అలవాటుగా మారిందని ఏపీ పోలీసు అధికారుల సంఘం అధ్యక్షుడు జనకుల శ్రీనివాసరావు ఈరోజు ఒక ప్రకటనలో పేర్కొన్నారు.
“వైసీపీ నాయకులను అరెస్టు చేయడానికి మాత్రమే పోలీసు వ్యవస్థ పనిచేస్తుందని జగన్ అనడం సరైంది కాదు,” అని శ్రీనివాసరావు స్పష్టం చేశారు. అలాగే, జగన్‌కు భద్రత కల్పించకుండా కుట్ర జరుగుతోందని ఆరోపించడం కూడా అవాస్తవమని ఆయన అన్నారు. “చట్టవిరుద్ధంగా వ్యవహరించిన వారిని మాత్రమే పోలీసులు అరెస్టు చేశారు,” అని ఆయన నొక్కి చెప్పారు.
గత ప్రభుత్వ హయాంలోనే పలువురు పోలీసు అధికారులను వీఆర్ (వెయిటింగ్ రిజర్వ్)లో ఉంచారని శ్రీనివాసరావు గుర్తు చేశారు. ఏ అధికారిపై అయినా ఆరోపణలు వస్తే, వారిపై చర్యలు తీసుకోవడం సహజమేనని ఆయన వివరించారు. రాజకీయాలకు అతీతంగా, చట్టబద్ధంగా పోలీసులు తమ విధులను నిర్వర్తిస్తున్నారని శ్రీనివాసరావు పునరుద్ఘాటించారు. పోలీసు వ్యవస్థపై నిరాధారమైన ఆరోపణలు చేయడం సరికాదని ఆయన హితవు పలికారు.