Ap News: ఈ నెల 15వ తేదీన (జూన్ 15) నిర్వహించాల్సిన NEET-PG (నేషనల్ ఎలిజిబిలిటీ ఎంట్రన్స్ టెస్ట్ – పోస్ట్ గ్రాడ్యుయేషన్) పరీక్షను కేంద్ర ప్రభుత్వం వాయిదా వేసింది. ఈ మేరకు కేంద్ర ఆరోగ్య, కుటుంబ సంక్షేమ మంత్రిత్వ శాఖ అధికారికంగా ప్రకటన విడుదల చేసింది.
మౌలిక వసతులు, సాంకేతిక మూల్యాంకనాన్ని పునఃసమీక్షించాల్సిన అవసరం ఉన్నందునే పరీక్షను వాయిదా వేస్తున్నట్లు కేంద్రం తెలిపింది. కొత్త పరీక్ష తేదీ త్వరలోనే నేషనల్ బోర్డ్ ఆఫ్ ఎగ్జామినేషన్ ఇన్ మెడికల్ సైన్సెస్ (NBEMS) ప్రకటించనుంది.
కేంద్ర ఆరోగ్య శాఖ ప్రకటన ప్రకారం:
“పరీక్షా నిర్వహణ వ్యవస్థలను మరింత పటిష్టంగా, నమ్మకంగా మార్చాల్సిన అవసరం ఉంది. అభ్యర్థుల భద్రత మరియు న్యాయత్వాన్ని దృష్టిలో ఉంచుకుని ఈ నిర్ణయం తీసుకున్నాం” అని స్పష్టం చేసింది.
ఈ నిర్ణయం లక్షలాది మెడికల్ పీజీ అభ్యర్థులకు ఊహించని షాక్‌గా మారింది. ఇప్పటికే పరీక్షకు సిద్ధమవుతున్న విద్యార్థులు మానసిక ఒత్తిడికి లోనవుతున్నట్టు పలువురు అభిప్రాయపడుతున్నారు.
NEET-UG ప్రశ్నపత్రం లీక్, UGC-NET పరీక్ష రద్దు వంటి పలు పరీక్షలపై కలకలం నేపథ్యంలో, ఈ నిర్ణయానికి సంబంధించి విశ్లేషణలు కొనసాగుతున్నాయి. కేంద్ర ప్రభుత్వం ఈ పరీక్షా వ్యవస్థల పట్ల అవలంబిస్తున్న జాగ్రత్త చర్యలలో భాగంగా ఈ నిర్ణయం తీసుకున్నట్టు కనిపిస్తోంది.