Ap DGP: గత ఏడాదితో పోలిస్తే 2025లో ఆంధ్రప్రదేశ్ రాష్ట్రంలో నేరాల సంఖ్య గణనీయంగా తగ్గిందని డీజీపీ హరీశ్ కుమార్ గుప్తా వెల్లడించారు. పోలీసుల పనితీరుపై రూపొందించిన ప్రత్యేక నివేదికను ఆయన విడుదల చేశారు. ఈ సందర్భంగా మాట్లాడుతూ, రాష్ట్రంలో శాంతి భద్రతల పరిరక్షణలో పోలీసు శాఖ మంచి పురోగతి సాధించిందన్నారు.
ముఖ్యంగా మహిళల భద్రత విషయంలో చేపట్టిన చర్యలు మంచి ఫలితాలు ఇస్తున్నాయని డీజీపీ తెలిపారు. మహిళలపై జరిగే నేరాలు, వేధింపుల కేసులను వేగంగా పరిష్కరించడంలో పోలీసులు అప్రమత్తంగా వ్యవహరిస్తున్నారని చెప్పారు.
అలాగే మత్తు పదార్థాల అక్రమ రవాణాపై ప్రత్యేక దృష్టి పెట్టామని, గంజాయి, డ్రగ్స్ రవాణాను అడ్డుకోవడంలో గణనీయమైన విజయాలు సాధించామని తెలిపారు. దొంగిలించిన మొబైల్ ఫోన్ల రికవరీలో ఆధునిక సాంకేతికతను ఉపయోగించి వేలాది ఫోన్లను బాధితులకు తిరిగి అందించామని వివరించారు.
రాబోయే రోజుల్లో పోలీసింగ్ వ్యవస్థను మరింత ఆధునికంగా తీర్చిదిద్దే దిశగా చర్యలు తీసుకుంటున్నామని డీజీపీ స్పష్టం చేశారు. వచ్చే పదేళ్లలో పోలీసింగ్ ఎలా ఉండాలి, సాంకేతికతను ఎలా వినియోగించాలి అనే అంశాలపై సంక్రాంతి తర్వాత రెండు రోజుల పాటు ప్రత్యేక వర్క్షాప్ నిర్వహించనున్నట్లు వెల్లడించారు. ఈ వర్క్షాప్లో పోలీసు విధుల్లో మార్పులు, ఆధునిక టెక్నాలజీ వినియోగంపై విస్తృత చర్చలు జరుగుతాయని తెలిపారు.
చట్టం ముందు అందరూ సమానమేనని మరోసారి స్పష్టం చేసిన డీజీపీ, చట్టానికి విరుద్ధంగా వ్యవహరించే వారెవరికైనా కఠిన చర్యలు తప్పవని హెచ్చరించారు. రాష్ట్రవ్యాప్తంగా నిరంతర నిఘా కొనసాగిస్తూ మావోయిస్టు కార్యకలాపాలను కూడా కట్టడి చేస్తున్నామని తెలిపారు. ఇటీవల పలువురు మావోయిస్టులను అరెస్టు చేయడం ఇందుకు నిదర్శనమన్నారు.
సైబర్ నేరాలపై కూడా డీజీపీ కీలక వ్యాఖ్యలు చేశారు. ఆన్లైన్ మోసాల వెనుక చైనా కేంద్రంగా పనిచేస్తున్న పెద్ద ముఠాలు ఉన్నాయని, మోసం జరిగిన వెంటనే డబ్బు విదేశాలకు తరలిపోతుండటంతో రికవరీ కష్టంగా మారుతోందన్నారు. అందువల్ల ప్రజలు ఆన్లైన్ లావాదేవీల్లో అత్యంత జాగ్రత్తగా ఉండాలని సూచించారు.
మొత్తంగా మహిళల భద్రత, మత్తు పదార్థాల నియంత్రణ, సైబర్ నేరాల అడ్డుకట్ట, నేరాల నియంత్రణే పోలీసు శాఖ ప్రధాన లక్ష్యమని డీజీపీ హరీశ్ కుమార్ గుప్తా స్పష్టం చేశారు. ప్రజల సహకారంతో రాష్ట్రాన్ని మరింత సురక్షితంగా మార్చగలమని ఆయన విశ్వాసం వ్యక్తం చేశారు.