Amazon: ప్రపంచ ప్రఖ్యాత ఇ-కామర్స్‌ దిగ్గజం అమెజాన్‌ (Amazon) మరోసారి భారీ స్థాయిలో ఉద్యోగులను తొలగించేందుకు సిద్ధమవుతోంది. కంపెనీ తాజా పునర్‌వ్యవస్థీకరణ చర్యల్లో భాగంగా మానవ వనరుల విభాగం (HR Department)లో సుమారు 15 శాతం సిబ్బందిని తగ్గించనున్నట్లు సమాచారం వెలువడింది.
ఇదే విషయంపై అమెజాన్‌ లోపలి వర్గాలు చెబుతున్న వివరాల ప్రకారం – ఈ కోతలు కేవలం హెచ్‌ఆర్‌ విభాగానికే పరిమితం కాకుండా ఇతర విభాగాలపైనా ప్రభావం చూపే అవకాశం ఉందని తెలుస్తోంది. అయితే, ఈ ఉద్యోగ కోతలు ఎప్పుడు ప్రారంభమవుతాయి, మొత్తం ఎంతమందిని ప్రభావితం చేస్తాయి అన్నదానిపై కంపెనీ ఇంకా అధికారిక ప్రకటన చేయలేదు.
కంపెనీ ప్రతినిధి కెల్లీ నాంటెల్‌ ఈ విషయం మీద వ్యాఖ్యానించడానికి నిరాకరించారు. కానీ అమెజాన్‌ సీఈఓ యాండీ జెస్సీ (Andy Jassy) తీసుకుంటున్న వ్యూహాత్మక నిర్ణయాలు మాత్రం స్పష్టంగా కనపడుతున్నాయి. ఆయన బాధ్యతలు స్వీకరించిన తర్వాత కంపెనీ పునర్‌వ్యవస్థీకరణ చర్యల పేరుతో ఇప్పటికే 27,000 మందికి పైగా ఉద్యోగులను ఇంటికి పంపించింది.
ఇక మరోవైపు, అమెజాన్‌ తన కృత్రిమ మేధ (AI), క్లౌడ్ టెక్నాలజీ, డేటా సెంటర్‌లు వంటి రంగాల్లో భారీగా పెట్టుబడులు పెట్టనుంది. ఈ ఏడాదిలోనే సంస్థ 100 బిలియన్ డాలర్లకు పైగా మూలధన వ్యయం చేయాలని నిర్ణయించింది. దాదాపు మొత్తం పెట్టుబడి తరువాతి తరం డేటా సెంటర్‌ల నిర్మాణం కోసం ఉపయోగించనుంది.
Also Read: CBN History Repeat: షాక్‌లో జాతీయ, అంతర్జాతీయ మీడియా వర్గాలు!
సీఈఓ యాండీ జెస్సీ స్పష్టంగా పేర్కొన్నట్లుగా, “ప్రస్తుతం ప్రపంచం ఏఐ యుగంలోకి అడుగుపెడుతోంది. ప్రతి ఉద్యోగి ఈ మార్పును అంగీకరించి, టెక్నాలజీతో కలిసి ముందుకు సాగాలి” అని చెప్పారు. అయితే, ఏఐ సదుపాయాల విస్తరణతో కొంతమంది ఉద్యోగుల అవసరం తగ్గిపోతుందనే విషయాన్ని కూడా ఆయన అంగీకరించారు.
ఇంతకముందు ఉద్యోగ కోతలతో కంపెనీ ఉద్యోగుల్లో ఆందోళన నెలకొన్నా, మరోవైపు అమెజాన్‌ పండుగ సీజన్‌ కోసం భారీగా సీజనల్‌ ఉద్యోగులను నియమించుకోవడానికి ప్రణాళికలు సిద్ధం చేసింది. అమెరికాలోని గిడ్డంగులు, లాజిస్టిక్స్‌ నెట్‌వర్క్‌లలో 2.5 లక్షల మంది సీజనల్‌ ఉద్యోగులను నియమించనున్నట్లు సంస్థ ప్రకటించింది.
ఇకపోతే, టెక్‌ రంగంలో గత కొన్నేళ్లుగా లేఆఫ్‌ల వేవ్‌ కొనసాగుతోంది. మెటా, గూగుల్, మైక్రోసాఫ్ట్, అమెజాన్‌ వంటి దిగ్గజాలు వ్యయ నియంత్రణ చర్యల పేరుతో వేలాది ఉద్యోగులను ఇంటికి పంపుతున్నాయి. ఆర్థిక మందగమనం, ఏఐ ప్రభావం, వ్యాపార వ్యూహాల మార్పు వంటి కారణాలతో ఈ పరిస్థితి మరింత వేగంగా విస్తరిస్తోంది.