CM Chandrababu: పాడేరు కొండ కోనల్లో నివసించే ఆదివాసీల అభివృద్ధి ద్వారానే రాష్ట్రం అభివృద్ధి చెందుతుందని ముఖ్యమంత్రి చంద్రబాబు నాయుడు అన్నారు. అల్లూరి సీతారామరాజు జిల్లాలోని పాడేరులో జరిగిన ‘ప్రజావేదిక’ కార్యక్రమంలో ఆయన పాల్గొన్నారు. పాడేరు ఏజెన్సీ అందాలు, అక్కడి ప్రజల గురించి ప్రశంసిస్తూ, మళ్లీ జన్మంటూ ఉంటే ఇక్కడే పుట్టాలనిపిస్తోందని చెప్పారు.
గిరిజన ఉత్పత్తులకు అంతర్జాతీయ గుర్తింపు
ఏజెన్సీ ప్రాంతాల్లో పండే అరకు కాఫీకి అంతర్జాతీయ గుర్తింపు తీసుకురావడానికి తాను కృషి చేస్తున్నానని చంద్రబాబు తెలిపారు.ఏజెన్సీ ప్రాంతంలోని 11 మండలాల్లో 2.58 లక్షల ఎకరాల్లో కాఫీ సాగు అవుతోందని, దీనిపై 2.46 లక్షల మంది గిరిజనులు ఆధారపడి జీవిస్తున్నారని సీఎం చంద్రబాబు తెలిపారు. సేంద్రీయ వ్యవసాయాన్ని ప్రోత్సహించి, ఈ ఉత్పత్తులను ప్రపంచ మార్కెట్‌లోకి తీసుకెళ్లేందుకు ప్రైవేటు సంస్థలతో ఒప్పందాలు కుదుర్చుకుంటున్నట్లు తెలిపారు. ఈ ప్రయత్నాల వల్ల గిరిజనుల ఆదాయం మూడు రెట్లు పెరుగుతుందని ఆశాభావం వ్యక్తం చేశారు. అలాగే, వెదురు ఉత్పత్తుల ద్వారా 5 వేల మంది డ్వాక్రా మహిళలకు సంవత్సరానికి లక్ష రూపాయల ఆదాయం వచ్చేలా ఒక కొత్త కార్యక్రమాన్ని ప్రారంభిస్తున్నామని ప్రకటించారు.
జీవో నెం. 3కి ప్రత్యామ్నాయం
గతంలో తమ ప్రభుత్వం గిరిజన ప్రాంతాల్లోని ఉద్యోగాలు స్థానిక గిరిజనులకే దక్కేలా తీసుకొచ్చిన జీవో నెం. 3ని కాంగ్రెస్, వైకాపా ప్రభుత్వాల నిర్లక్ష్యం వల్ల రద్దయిందని సీఎం విమర్శించారు. దానిని మళ్లీ పునరుద్ధరించడానికి లేదా దానికి ప్రత్యామ్నాయాన్ని తీసుకురావడానికి నిపుణులతో చర్చిస్తున్నామని, త్వరలో దీనిపై నిర్ణయం తీసుకుంటామని హామీ ఇచ్చారు. గిరిజనులకు మేలు చేసేందుకు పీ4 పథకం కింద బయటి మార్గదర్శకులను తీసుకువస్తామని చెప్పారు.
రాష్ట్రంలో గంజాయి సాగును పూర్తిగా అరికట్టామని, వైకాపా హయాంలో ఈ ప్రాంతానికి వచ్చిన చెడ్డ పేరును ఇప్పుడు తొలగిస్తున్నామని చంద్రబాబు స్పష్టం చేశారు. గంజాయి సాగు చేసి పిల్లల జీవితాలను నాశనం చేయాలనుకున్నవారిని వదిలిపెట్టబోమని, నేరస్థులు రాజకీయ ముసుగులో ఉన్నా వారిని చట్టం ముందు నిలబెడతామని తీవ్ర హెచ్చరికలు జారీ చేశారు. వైఎస్ వివేకానందరెడ్డి హత్య కేసును ప్రస్తావిస్తూ, గతంలో తాను మోసపోయానని, కానీ ఇప్పుడు అలా జరగదని చెప్పారు.
అనేక అభివృద్ధి కార్యక్రమాలకు శంకుస్థాపనలు
ఈ కార్యక్రమంలో సీఎం పలు అభివృద్ధి పనులకు శంకుస్థాపనలు, ప్రారంభోత్సవాలు చేశారు. గిరిజన గ్రామాల ప్రజల కోసం డోలీ మోతలు లేని పరిస్థితిని కల్పిస్తామని హామీ ఇచ్చారు. ఉప ముఖ్యమంత్రి పవన్ కళ్యాణ్ గిరిజనుల సంక్షేమానికి కూటమి ప్రభుత్వం కట్టుబడి ఉందని ఒక ప్రకటనలో తెలిపారు. మంత్రి లోకేష్ గిరిజనుల హక్కుల పరిరక్షణకు కృషి చేస్తామని, గత ఆర్థిక సంవత్సరంలో రూ. 7,557 కోట్లు ఖర్చు చేశామని వెల్లడించారు. గిరిజన సంక్షేమం కోసం తమ ప్రభుత్వం కట్టుబడి ఉందని, గిరిజనుల పోస్టులు గిరిజనులకే అనే నినాదంతో మళ్లీ జీవో 3ని తీసుకువస్తామని, దాని కోసం ఎంతవరకైనా పోరాడతామని సీఎం స్పష్టం చేశారు.
Also Read: Dhulipalla vs Agnyathavasi: ధూళిపాళ్లపై వస్తున్న ఆరోపణల వెనుక అజ్ఞాతవాసి
ప్రజా సంక్షేమ పథకాలు, మౌలిక సదుపాయాల కల్పన
గిరిజనుల కోసం తాము అమలు చేస్తున్న పథకాలను ముఖ్యమంత్రి వివరించారు:
గతంలో రూ. 2,000 ఉన్న పెన్షన్‌ను తమ ప్రభుత్వం రూ. 4,000కు పెంచిందని సీఎం చంద్రబాబు తెలిపారు. గిరిజనుల పెన్షన్ల కోసం ఏడాదికి రూ. 1,595 కోట్లు ఖర్చు చేస్తున్నామని, ఇది ఇతర రాష్ట్రాల కంటే చాలా ఎక్కువని ఆయన పేర్కొన్నారు.
తల్లికి వందనం పథకం కింద ఏజెన్సీలో చదువుకుంటున్న 4,86,803 మంది పిల్లలకు ఇప్పటి వరకు రూ. 643 కోట్లు అందజేశామని, ఎక్కువ మంది పిల్లలు ఉన్న గిరిజన కుటుంబాలకు ఈ పథకం చాలా ఉపయోగకరంగా ఉందని ముఖ్యమంత్రి అన్నారు.
విద్య: 373 కొత్త భవనాలకు రూ. 45 కోట్లు కేటాయించామని, గిరిజన విద్యార్థుల కోసం రూ. 1,337 కోట్లు వెచ్చించామని తెలిపారు. గిరిజన విద్యార్థుల కోసం విశాఖ, విజయవాడ, తిరుపతి నగరాల్లో స్టడీ సర్కిళ్లు ఏర్పాటు చేశామని సీఎం చంద్రబాబు తెలిపారు. త్వరలో ఏజెన్సీలోని విద్యాలయాల్లో 10+2 (ఇంటర్మీడియట్) కోర్సులను కూడా ప్రారంభిస్తామని ఆయన హామీ ఇచ్చారు.
వైద్యం: డోలీ మోతలు నివారించడానికి ఐదు ప్రాంతాల్లో (సీతంపేట, పార్వతీపురం, రంపచోడవరం, కేఆర్ పురం, శ్రీశైలం) మల్టీ స్పెషాలిటీ ఆస్పత్రులు నిర్మిస్తున్నామని తెలిపారు. ఏజెన్సీలో పనిచేసే డాక్టర్లకు ప్రోత్సాహకాలు ఇచ్చి పోస్టులు భర్తీ చేస్తామని చెప్పారు. సికిల్ సెల్ వ్యాధితో బాధపడుతున్న 1,487 మందికి నెలకు రూ. 10,000 పెన్షన్ ఇస్తున్నామన్నారు.
గిరిజన సంక్షేమాన్ని దృష్టిలో ఉంచుకుని, 4.82 లక్షల గిరిజన కుటుంబాలకు నెలకు 200 యూనిట్ల ఉచిత విద్యుత్‌ను అందిస్తున్నట్లు ముఖ్యమంత్రి తెలిపారు. భవిష్యత్తులో వారికి ఉచితంగా రూఫ్‌టాప్‌ సోలార్‌ యూనిట్లను కూడా అందజేస్తామని ప్రకటించారు. దీనివల్ల వారు పెట్రోల్ ఖర్చు లేకుండా ఎలక్ట్రిక్ వాహనాలను ఛార్జ్ చేసుకోవచ్చని చెప్పారు.
ఈ నెల 15వ తేదీ నుంచి మహిళలకు ఉచిత బస్సు ప్రయాణం ఉంటుందని, ఏజెన్సీలో 7 అన్న క్యాంటీన్లు ఏర్పాటు చేసి రూ. 5కే భోజనం అందిస్తామని చెప్పారు. నెలాఖరులోగా డీఎస్సీ ద్వారా టీచర్లను నియమిస్తామని, రాష్ట్రంలో పది లక్షల కోట్ల పెట్టుబడులతో 9 లక్షల ఉద్యోగ అవకాశాలు వస్తాయని వివరించారు.